ପୁରୁଷୋତ୍ତମପୁର,୧ା୭(ଡି.ଏନ୍.ଏ.)-ଗଞ୍ଜାମ ଜିଲା ପୁରୁଷୋତ୍ତମପୁର ସହର ସମେତ ଆଖପାଖ ଅଞ୍ଚଳରେ ବିନା ଅନୁମତିରେ ବେଆଇନ ଭାବେ ବହୁଳ ମାତ୍ରାରେ ଡିଜେ ବ୍ୟବହାର ହେଉଥିଲା। ଶନିବାର ଏନେଇ ଏକ ଖବର ଧରିତ୍ରୀରେ ପ୍ରକାଶ ପାଇବା ପରେ ପୁରୁଷୋତ୍ତମପୁର ପୋଲିସ ପକ୍ଷରୁ ତତ୍ପରତା ପ୍ରକାଶ ପାଇଛି। ବିଭିନ୍ନ ସ୍ଥାନରେ ବେଆଇନ ଭାବେ ବାଜୁଥିବା ଡିଜେ ଉପରେ ଚଢାଉ କରାଯାଇଛି। ରବିବାର ପୁରୁଷୋତ୍ତମପୁର ସହର ମଧ୍ୟ ଗଡସାହିରେ ନିର୍ବନ୍ଧ ଲାଗି ଏକ ଶୋଭାଯାତ୍ରା ବାହାରିଥିଲା। ଏଠାରେ ବିନା ଅନୁମତିରେ ଉଚ୍ଚ ଶବ୍ଦରେ ଡିଜେ ବାଜୁଥିଲା। ପୋଲିସ ଚଢାଉ କରି ଡିଜେ ସହ ସମ୍ପୃକ୍ତ ଗାଡି (ନଂ.ଓଡି ୦୭ ଏଏ-୨୮୨୪) କୁ ଜବତ କରି ଥାନାକୁ ଆଣିବା ସହ ଗାଡି ଚାଳକଙ୍କୁ ଅଟକ ରଖିଛି। ପୋଲିସ ଚଢାଉ କରିବାବେଳେ ଉପସ୍ଥିତ ଲୋକେ ପ୍ରତିରୋଧ କରିଥିଲେ। ଫଳରେ ପୋଲିସ ଓ ଡିଜେ ବଜାଉଥିବା ବ୍ୟକ୍ତିମାନଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏସ୍ଆଇ ସୁନିଲ କୁମାର ପ୍ରଧାନ କହିଛନ୍ତି ଯେ, ବେଆଇନ ଭାବେ ଡିଜେ ବଜାଉଥିବା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରାଯିବା ସହ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାଯୋଗ୍ୟ ଯେ, ଅଞ୍ଚଳରେ ବିଭିନ୍ନ ଶୋଭାଯାତ୍ରାରେ ଡିଜେ ବ୍ୟବହାର ଯୋଗୁ ବୟସ୍କ, ରୋଗୀ ଓ ଶିଶୁମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିଲେ। ତତ୍କାଳୀନ ତହସିଲଦାର ତଥା ଏକ୍ଜିକ୍ୟୁଟିଭ ମାଜିଷ୍ଟ୍ରେଟ ଓ ଥାନା ଅଧିକାରୀଙ୍କ ନିକଟରେ ଅଭିଯୋଗ ପହଞ୍ଚତ୍ଥିଲା। ଉଭୟ ଅଧିକାରୀ ଏହାକୁ ଗୁରୁତର ସହ ନେଇ ଡିଜେ ଉପରେ ରୋକ ଲଗାଇଥିଲେ। ମାତ୍ର ତତ୍କାଳୀନ ତହସିଲଦାର ଓ ଥାନା ଅଧିକାରୀ ବଦଳି ହୋଇଯିବା ପରେ ଏହି କଟକଣାକୁ ଆଉ କେହି ନ ମାନି ବହୁଳ ମାତ୍ରାରେ ଉଚ୍ଚ ଶବ୍ଦରେ ବେଆଇନ ଭାବେ ଡିଜେ ବ୍ୟବହାର କରୁଥିଲେ।