ବେଙ୍ଗାଲୁରୁ,୧୫।୩(ପି.ଟି.)- ଏକ ଭଲ ତଥା ଦୃଢ ଡିଫେନ୍ସ ମ୍ୟାଚ୍ ଜିତାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ ବୋଲି ଭାରତୀୟ ହକି କୋଚ୍ ଗ୍ରାହମ ରିଡ ବିଶ୍ୱାସ କରନ୍ତି ବୋଲି ଅଭିଜ୍ଞ ଓଡ଼ିଆ ଡିଫେଣ୍ଡର ବୀରେନ୍ଦ୍ର ଲାକ୍ରା କହିଛନ୍ତି। ଆକ୍ରମଣାତ୍ମକ ହକି ଖେଳିବା ଉପରେ ରିଡ୍ ସାଧାରଣତଃ ଜୋର ଦେଇଥାନ୍ତି। କିନ୍ତୁ ବିଜୟୀ ହେବା ପାଇଁ ଭଲ ଡିଫେନ୍ସ ନିହାତି ଜରୁରୀ ବୋଲି ରିଡ ବିଶ୍ୱାସ କରନ୍ତି ବୋଲି ଶନିବାର ବୀରେନ୍ଦ୍ର ସ୍ପଷ୍ଟ କରିଛନ୍ତି।
ଗତମାସ ଭୁବନେଶ୍ୱରରେ ଖେଳାଯାଇଥିବା ଏଫ୍ଆଇଏଚ୍ ହକି ପ୍ରୋ ଲିଗ୍ ମ୍ୟାଚ୍ଗୁଡିରେ ଭାରତ ଆକର୍ଷଣୀୟ ପ୍ରଦର୍ଶନ କରି ଅଷ୍ଟ୍ରେଲିଆ ଓ ବେଲଜିୟମ ଭଳି ଦଳଗୁଡିକୁ ପରାସ୍ତ କରିଥିଲା। ଆକ୍ରମଣାତ୍ମକ ହକି ଖେଳିବା ସହ ଗୋଲ ଦେବାକୁ ପୁସ୍ କରିବା ଓ ପ୍ରତିପକ୍ଷ ସର୍କଲ ଭିତରକୁ ପ୍ରବେଶ କରିବା ଉପରେ ଆମେ ଦଳଗତ ଭାବେ ପ୍ରୟାସ କରିବା ଉପରେ ଗୁରୁତ୍ୱ ଦେଉଛୁ ବୋଲି ସେ କହିଛନ୍ତି। ଦଳର ଡିଫେନ୍ସ ଉପରେ ରିଡ୍ ଅଧିକ ଆଶା ପୋଷଣ କରନ୍ତି। ଆଟାକ୍ ଉପରେ ଅଧିକ ଗୁରୁତ୍ୱ ଦେଉଥିଲେ ମଧ୍ୟ ରିଡ୍ ଡିଫେ୍ନ୍ସକୁ ଆହୁରି ସଜାଡିବାକୁ ପ୍ରୟାସ ଆରମ୍ଭ କରିଛନ୍ତି। ଏକ ଦୃଢ ଓ ଶକ୍ତିଶାଳୀ ଡିଫେନ୍ସ ହିଁ ଦଳକୁ ଜିତାଇବାରେ ସହାୟ ହୋଇଥାଏ ବୋଲି ରିଡ ଆମକୁ କହିଛନ୍ତି। ରିଡ୍ଙ୍କ ତତ୍ତ୍ୱାବଧାନରେ ଦଳ ଉନ୍ନତି କରୁଛି ବୋଲି ବୀରେନ୍ଦ୍ର କହିଛନ୍ତି।
ପୂର୍ବରୁ ମ୍ୟାଚ୍ର ଅନ୍ତିମ ସମୟରେ ଆମେ ଡିଫେନ୍ସକୁ ହାଲ୍କା କରିଥାଉ। ତେବେ ଗତ କେତେମାସ ମଧ୍ୟରେ ଏ ଦୃଷ୍ଟିକୋଣୁ ଆମେ ଯଥେଷ୍ଟ ଉନ୍ନତି କରିଛୁ। ଫରଓ୍ବାର୍ଡ ଲାଇନ୍ରୁ ଡିଫ୍ସେନ୍ସ ଆରମ୍ଭ ହୋଇଥାଏ ବୋଲି କୋଚ୍ ଆମକୁ ଅବଗତ କରାଇଛନ୍ତି। ଆଣ୍ଠୁରେ ଆଘାତ ସମସ୍ୟା କାରଣରୁ ବୀରେନ୍ଦ୍ର ୨୦୧୬ ରିଓ ଅଲିମ୍ପିକ୍ସ ଖେଳିପାରି ନ ଥିଲେ। ଏବେ ଟୋକିଓ ଅଲିମ୍ପିକ୍ସ ଦଳରେ ସ୍ଥାନ ପାଇବା ପାଇଁ ସେ କଠିନ ପରିଶ୍ରମ କରୁଛନ୍ତି। ଦଳରେ ମୁଁ ସବୁଠାରୁ ଅଭିଜ୍ଞ ଡିଫେଣ୍ଡର। କିନ୍ତୁ ତା ମାନେ ନୁହେଁ ଯେ, ଦଳରେ ମୋର ସ୍ଥାନ ପକ୍କା। ଅଲିମ୍ପିକ ପାଇଁ ଏକ ଶ୍ରେଷ୍ଠ ଦଳ ଘୋଷଣା କରାଯିବ। ତେଣୁ କାହାର ସ୍ଥାନ ସ୍ଥାୟୀ ନୁହଁ। ତେଣୁ ସମସ୍ତଙ୍କୁ ଶତପ୍ରତିଶତ ପ୍ରଦର୍ଶନ କରିବାକୁ ହେବ। ଦୁର୍ଭାଗ୍ୟବଶତଃ ରିଓ ଅଲିମ୍ପିକ୍ସ ଖେଳିପାରି ନ ଥିଲି। ତେବେ ଏଥର କଠିନ ପରିଶ୍ରମ କରୁଛି ଓ ଦଳ ପାଇଁ ଶ୍ରେଷ୍ଠ ପ୍ରଦର୍ଶନ କରିବାକୁ ପ୍ରୟାସ କରିବି ବୋଲି ବୀରେନ୍ଦ୍ର କହିଛନ୍ତି।
