ଲଣ୍ଡନ, ୮ା୬- ଦକ୍ଷିଣ ଆଫ୍ରିକୀୟ କ୍ରିକେଟର ଏବି ଡି’ଭିଲର୍ସଙ୍କ ସମ୍ପର୍କରେ ପୂର୍ବତନ ପାକିସ୍ତାନ ପେସର ଶୋଏବ ଅଖତର ଶନିବାର ବଡ଼ ବୟାନ ଦେଇଛନ୍ତି। ପୂର୍ବତନ ଦକ୍ଷିଣ ଆଫ୍ରିକା ଅଧିନାୟକ ଦେଶ ବଦଳରେ ଟଙ୍କାକୁ ବାଛି ନେଇଛନ୍ତି ବୋଲି ୟୁଟ୍ୟୁବର ଏକ ଭିଡ଼ିଓରେ ଅଖତର କହିଛନ୍ତି। ଆଇପିଏଲ ଓ ପିଏସ୍ଏଲ ଚୁକ୍ତି ଛାଡ଼ି ନିଜକୁ ବିଶ୍ୱକପ୍ ଲାଗି ଉପଲବ୍ଧ କରାଇବାକୁ ଚାହୁଁ ନ ଥିଲେ। ଏଣୁ ସେ ପିଏସ୍ଏଲ ଓ ଆଇପିଏଲ ଆରମ୍ଭ ହେବା ପୂର୍ବରୁ ଅବସର ଘୋଷଣା କରିଥିଲେ। ଏହାର ଅର୍ଥ ନିଜର ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ସେ ଅବସର ନିଷ୍ପତ୍ତି ନେଇଥିଲେ। ତାଙ୍କ ନିଷ୍ପତ୍ତି ନେବାର ସମୟ ବହୁତ ଗୁରୁତ୍ୱପୂର୍ଣ୍ଣ ଥିଲା। ବର୍ଷେ ପୂର୍ବରୁ ଅବସର ନେଇଥିଲେ ମଧ୍ୟ ତାଙ୍କ ଦଳ ଏପର୍ଯ୍ୟନ୍ତ ଖରାପ ଫର୍ମ ଦେଇ ଗତି କରୁଛି। ମାତ୍ର ତାଙ୍କ ମନେ ରଖିବା କଥା ଯେ, ଦେଶ ତାଙ୍କୁ ଦରକାର କରୁଛି। ଟଙ୍କା ଆଜି ଅଛି, କାଲି ମଧ୍ୟ ରହିବ। ହେଲେ ଟଙ୍କା ପାଇଁ ବିଶ୍ୱକପ୍କୁ ହେୟ ଜ୍ଞାନ କରିବା ଉଚିତ ନୁହେଁ ବୋଲି ଅଖତର କହିଛନ୍ତି। ସେ ଆହୁରି କହିଛନ୍ତି, ବିଶ୍ୱକପ୍ ଲାଗି ଦଳ ଘୋଷଣା ହେବ ପୂର୍ବରୁ ସେ ଫେରିବାକୁ ଉଦ୍ୟମ କରିଥିଲେ। କିନ୍ତୁ ମୋ ମତରେ ଦଳୀୟ ମ୍ୟାନେଜମେଣ୍ଟ ଠିକ୍ କରିଛନ୍ତି। ଉଲ୍ଲେଖଥାଉ କି, ଚଳିତ ବିଶ୍ୱକପ୍ରେ ଦକ୍ଷିଣ ଆଫ୍ରିକା ହ୍ୟାଟ୍ରିକ ପରାଜୟବରଣ କରିବା ପରେ ଡି’ଭିଲର୍ସ ଜାତୀୟ ଦଳକୁ ଫେରିବା ପାଇଁ ପ୍ରସ୍ତାବ ଦେଇଥିଲେ ବୋଲି ଜଣାପଡ଼ିଥିଲା।
