ଜୋହାନ୍ସବର୍ଗ, ୧୪ା୪ (ପି.ଟି.)- ଦକ୍ଷିଣ ଆଫ୍ରିକାର ବିସ୍ଫୋରକ ବ୍ୟାଟ୍ସମ୍ୟାନ ଏବି ଡି’ଭିଲର୍ସଙ୍କ କ୍ରିକେଟକୁ ପୁନଃ ପ୍ରତ୍ୟାବର୍ତ୍ତନକୁ ନେଇ ଅନିଶ୍ଚିତତା ଦେଖାଦେଇଛି। କୋଭିଡ୍-୧୯ ମହାମାରୀର ଆବିର୍ଭାବ ଯୋଗୁ ବିଶ୍ୱରେ ବହୁ କ୍ରୀଡ଼ା ଇଭେଣ୍ଟ ବର୍ତ୍ତମାନ ପାଇଁ ସ୍ଥଗିତ ରଖାଯାଇଛି ଓ ଅନ୍ୟ କେତେକ ବାତିଲ କରାଯାଇଛି। ଅଷ୍ଟ୍ରେଲିଆରେ ହେବାକୁଥିବା ଟି୨୦ ବିଶ୍ୱକପ୍ ସ୍ଥଗିତ ହେବା ସମ୍ଭାବନା ଦେଖା ଦେଇଛି। ଆଇସିସି ଟି୨୦ ବିଶ୍ୱକପ୍ ଚଳିତ ବର୍ଷ ଅକ୍ଟୋବର ୧୮ରୁ ନଭେମ୍ବର ୧୫ ପର୍ଯ୍ୟନ୍ତ ଖେଳାଯିବା କାର୍ଯ୍ୟକ୍ରମ ରହିଛି। ସେତେବେଳେ କରୋନା ଭାଇରସ୍ ଜନିତ ପରିସ୍ଥିତି କ’ଣ ଥିବା କହିହେବ ନାହିଁ। ଡି’ଭିଲର୍ସ କହିଛନ୍ତି,ବର୍ତ୍ତମାନ ସ୍ଥିତିରେ ମୁଁ ଦକ୍ଷିଣ ଆଫ୍ରିକା ପାଇଁ ଖେଳିବା ଲାଗି ପ୍ରସ୍ତୁତ ଅଛି। ଟୁର୍ନାମେଣ୍ଟ ଯଦି ଆସନ୍ତା ବର୍ଷକୁ ଘୁଞ୍ଚାଇ ଦିଆଯାଏ ତେବେ ସେତେବେଳେ ଅନେକ କିଛି ପରିବର୍ତ୍ତନ ଘଟି ସାରିଥିବ। ୬ ମାସ ପରେ ମୁଁ କେତେଦୂର ଫିଟ୍ ଥିବି ତାହା କହିହେବ ନାହିଁ। ଟି୨୦ ବିଶ୍ୱକପ୍ରେ ଦକ୍ଷିଣ ଆଫ୍ରିକା ଦଳର ଅଭିଯାନରେ ମୁଁ ପ୍ରମୁଖ ଭୂମିକା ଗ୍ରହଣ କରେ ବୋଲି କୋଚ୍ ମାର୍କ ବାଉଚର ଚାହାନ୍ତି। ତେବେ ମୁଁ ଏବେଠାରୁ ତାଙ୍କୁ ପ୍ରତିଶ୍ରୁତି ଦେଇ ବୃଥା ଆଶା ସୃଷ୍ଟି କରିବାକୁ ଚାହେଁନା। ଡି’ଭିଲର୍ସ କହିଛନ୍ତି, ମୁଁ ୮୦ ପ୍ରତିଶତ ଫିଟ୍ ଥିଲେ ମଧ୍ୟ ଖେଳିବାକୁ ପସନ୍ଦ କରେନି। ଶତପ୍ରତିଶତ ସୁସ୍ଥ ଥିଲେ ଉପଲବ୍ଧ ହୋଇଥାଏ।