ଭୁବନେଶ୍ୱର, ୨୪।୧୧(ବ୍ୟୁରୋ): ଡିସେମ୍ବର ପହିଲାରୁ ସାରା ଦେଶରେ ଲାଗୁ ହେବ ଏକକ ଟୋଲ ଦେୟ ବ୍ୟବସ୍ଥା। ଓଡ଼ିଶାର ବିଭିନ୍ନ ଜାତୀୟ ରାଜପଥରେ ମଧ୍ୟ ଜାତୀୟ ଇଲେକ୍ଟ୍ରୋନିକ ଟୋଲ କଲେକ୍ସନ(ଏନ୍ଇଟିସି) ବ୍ୟବସ୍ଥାକୁ ଲାଗୁ କରାଯିବ। ରେଡିଓ ଫ୍ରିକ୍ୱେନ୍ସି ଆଇଡେଣ୍ଟିଫିକେଶନ (ଆର୍ଏଫ୍ଆଇଡି) ଜରିଆରେ ଫାଷ୍ଟଟ୍ୟାଗ୍ ମାଧ୍ୟମରେ ଏଣିକି ଦେୟ ପୈଠ କରାଯାଇପାରିବ। ଭାରତୀୟ ରାଜପଥ ପରିଚାଳନା କମ୍ପାନୀ(ଆଇଏଚ୍ଏମ୍ସିଏଲ୍) ଏହି ଡିଜିଟାଲ ବ୍ୟବସ୍ଥାକୁ କାର୍ଯ୍ୟକାରୀ କରିବ। କେନ୍ଦ୍ର ପରିବହନ ମନ୍ତ୍ରୀ ନୀତିନ୍ ଗଡକାରୀ ରାଜ୍ୟ ସରକାରଙ୍କୁ ଏ ନେଇ ଚିଠି ଲେଖିବା ପରେ ଅକ୍ଟୋବର ୧୪ରେ କେନ୍ଦ୍ର-ରାଜ୍ୟ ମଧ୍ୟରେ ଏହି ବ୍ୟବସ୍ଥା ଲାଗୁ ସମ୍ପର୍କିତ ବୈଠକ ଅନୁଷ୍ଠିତ ହୋଇଥିଲା। ପୁରୁଣା ପଦ୍ଧତିରେ ଟୋଲ ଦେୟ ଆଦାୟ ଦ୍ୱାରା ଭିଡ଼ ସମସ୍ୟା ରହୁଛି। ଟୋଲ ଦେବା, ବିଲ୍ କାଟିବା, ଫାଟକ ପାରି ହେବା ଇତ୍ୟାଦି ପାଇଁ ବହୁ ସମୟ ଲାଗିଥାଏ, ନୂତନ ବ୍ୟବସ୍ଥା ଯାତ୍ରୀଙ୍କ ସମୟ ବଞ୍ଚାଇବ ବୋଲି କୁହାଯାଉଛି। ଏ ନେଇ ଜନସଚେତନତା ଆରମ୍ଭ କରାଯାଇଛି। ବିଭିନ୍ନ ଆନିମେଶନ ଜରିଆରେ ଏହାର ବ୍ୟବହାର ଓ ଉପକାରିତା ନେଇ ଜନଗଣଙ୍କୁ ଅବଗତ କରାଯାଉଛି। କିଛି ଦିନ ପରେ ରାଜ୍ୟ ରାଜପଥଗୁଡିକରେ ଇଲେକଟ୍ରୋନିକ୍ ଟୋଲ କଲେକ୍ସନ(ଇଟିସି)କୁ ପ୍ରାଥମିକତା ଦିଆଯିବ। ଏହି ବ୍ୟବସ୍ଥା କେତେକ ଟୋଲରେ ଫାଙ୍କା ଯାଉଥିବା ଟିକସ ଉପରେ ରୋକ୍ ଲଗାଇବ ବୋଲି ପ୍ରଶାସନ ଆଶା କରୁଛି। ଏକକ ଟୋଲ ଦେୟ ବ୍ୟବସ୍ଥା ଭଳି ପାର୍କିଂ ଦେୟର ଏକୀକରଣ ନେଇ ଚିନ୍ତା କରାଯାଉଥିବା କୁହାଯାଉଛି।
ଓଡ଼ିଶାର ୧୨ଟି ଜାତୀୟ ରାଜପଥରେ ଇଟିସି ଲାଗୁ ହେବ। ୧୨ଟି ଟୋଲ ଗେଟ୍ରେ ନୂଆ ବ୍ୟବସ୍ଥା ସହ ଏକ ହାଇବ୍ରିଡ୍ ଲେନ୍ ରହିବ। ଏହାଦ୍ୱାରା ପୁରୁଣା ପଦ୍ଧତିରେ ମଧ୍ୟ ଦେୟ ଦେଇହେବ। ଲୋକେ ଅଭ୍ୟସ୍ତ ହେଲା ପରେ ପାରମ୍ପରିକ ବ୍ୟବସ୍ଥା ଉଠାଯିବ। ଫାଷ୍ଟଟ୍ୟାଗ୍ ପଦ୍ଧତିରେ ପ୍ରତି ଯାନରେ ଏକ ଚିପ୍ ଲାଗିବ। ଏକକ କର ବ୍ୟବସ୍ଥାର ଅନ୍ତର୍ଭୁକ୍ତ ହୋଇଥିବା ଯାନର ଦେୟ ଆପେ କଟିଯିବା ସହ ଅଟକାଉଥିବା ଇଲେକ୍ରଟିକ୍ ମୁଭର ଆପେ ଖୋଲିଯିବ ବୋଲି ଏନ୍ଏଚ୍ଏଆଇର ଜଣେ ଅଧିକାରୀ କହିଛନ୍ତି। https://www.npci.org.in/netc ଜରିଆରେ ଏହି ବ୍ୟବସ୍ଥା ସହ ଅନୁବନ୍ଧିତ ହେବାକୁ ପଡ଼ିବ। ହେଲେ ଏହା ପୂର୍ବରୁ ସମସ୍ତଙ୍କୁ ନିଜ ଯାନ ପାଇଁ ଫାଷ୍ଟଚ୍ୟାଗ୍ ବ୍ୟବସ୍ଥା ଆପଣେଇବା ଆବଶ୍ୟକ।