ଭୁବନେଶ୍ୱର,୧୬।୧୨(ବ୍ୟୁରୋ): ଭାଜପା ରାଜ୍ୟ ପ୍ରଭାରୀ ଅରୁଣ ସିଂ ରାଜ୍ୟ ସଭା ସଦସ୍ୟଭାବେ ନିର୍ବାଚିତ ହେବାପରେ ପ୍ରଥମ ଥର ଲାଗି ରବିବାର ଓଡିଶା ଗସ୍ତରେ ଆସିଛନ୍ତି। ଏହି ଅବସରରେ ତାଙ୍କୁ ଦଳ ପକ୍ଷରୁ ବ୍ୟାପକ ସ୍ବାଗତ ସମ୍ବର୍ଦ୍ଧନା ଦିଆଯାଇଛି। ଗଣମାଧ୍ୟମକୁ ସୂଚନା ଦେଇ ଅରୁଣ କହିଛନ୍ତି ଯେ, ଭାଜପା ରାଜ୍ୟ ସାଙ୍ଗଠନିକ ନିର୍ବାଚନ ପ୍ରକ୍ରିୟା ଖୁବଶୀଘ୍ର ସରିବ। ଡିସେମ୍ବର ଶେଷ ସୁଦ୍ଧା ରାଜ୍ୟ ସଭାପତି ନିର୍ବାଚନ ହେବ। ସଭାପତିି ପଦ ପାଇଁ ଏକ ମତଦାତା ସୂଚୀ ତିଆରି କରାଯାଇଥାଏ। ଏଥିରେ ସମସ୍ତ ସାଙ୍ଗଠନିକ ଜିଲାର ସଭାପତି ଓ ରାଜ୍ୟ ପରିଷଦର ସଦସ୍ୟମାନେ ରହିଥାନ୍ତି। ଏହି ମତଦାତା ସୂଚୀର ସଦସ୍ୟମାନେ ରାଜ୍ୟ ସଭାପତି ବାଛିଥାନ୍ତି। ଭାଜପାରେ କେବଳ ଆଭ୍ୟନ୍ତରୀଣ ଗଣତନ୍ତ୍ର ରହିଛି। ସଭାପତି କିଏ ହେବ ତାହା ଏବେଠାରୁ କହି ହେବନାହିଁ। ଏହି ମତଦାତା ସୂଚୀରେ ଥିବା ମତଦାତାମାନେ ଏନେଇ ସ୍ଥିର କରିବେ ବୋଲି ଅରୁଣ କହିଛନ୍ତି।
ଅନ୍ୟପକ୍ଷରେ ଭାଜପାର ଜିଲା ସଭାପତି ନିର୍ବାଚନ ପ୍ରକ୍ରିୟା ଆରମ୍ଭ ହୋଇଯାଇଛି। ଦଳର ୩୬ ସାଙ୍ଗଠନିକ ଜିଲା ମଧ୍ୟରୁ ରବିବାର ସୁଦ୍ଧା ୧୭ ଜିଲାର ସଭାପତି ଚୟନ ପାଇଁ ପ୍ରକ୍ରିୟା ଶେଷ ହୋଇଯାଇଛି। ସୋମବାର ବାକି ୧୯ଟି ଜିଲା ସଭାପତି ଚୟନ ପ୍ରକ୍ରିୟା ସରିବ ବୋଲି ରାଜ୍ୟ ସହ ନିର୍ବାଚନ ଅଧିକାରୀ ସୁଦୀପ୍ତ ରାୟ ସୂଚନା ଦେଇଛନ୍ତି। ସେ ଆହୁରି କହିଛନ୍ତି, ୧୭ ତାରିଖ ସୁଦ୍ଧା ଜିଲା ସଭାପତି ଚୟନ ପ୍ରକ୍ରିୟା ସମ୍ପୂର୍ଣ୍ଣ ସରିବ। ଏହାପରେ କେନ୍ଦ୍ରମନ୍ତ୍ରୀ ନରେନ୍ଦ୍ର ସିଂ ତୋମାର ଏବଂ ପୂର୍ବତନ କେନ୍ଦ୍ରମନ୍ତ୍ରୀ ରାଜୀବ ପ୍ରତାପ ରୁଡ୍ଡୀଙ୍କଠାରୁ ସମୟ ଲୋଡାଯିବ। ସେମାନେ ଯେବେ ସମୟ ଦେବେ ସେହି ଅନୁଯାୟୀ ରାଜ୍ୟ ସଭାପତି ନିର୍ବାଚନ କରାଯିବ। ଗତ ସପ୍ତାହରେ ୯ଟି ଗ୍ରୁପ୍ କରାଯାଇ ପ୍ରତ୍ୟେକଙ୍କୁ ୪ଟି ଲେଖାଏ ଜିଲାର ଦାୟିତ୍ୱ ବଣ୍ଟାଯାଇଥିଲା। କାହାକୁ କେଉଁ ଜିଲାର ସଭାପତି କଲେ ଭଲ ହେବ ସେ ନେଇ ସେହି ଗ୍ରୁପଗୁଡିକ କର୍ମୀଙ୍କ ସହ ଆଲୋଚନା କରି ମତାମତ ସଂଗ୍ରହ କରିଛନ୍ତି। ଅନ୍ୟପଟେ ରାଜ୍ୟସ୍ତରରେ ଏକ ୬ ଜଣିଆ ଗ୍ରୁପ କରାଯାଇଛି। ଉକ୍ତ ଗ୍ରୁପରେ ରାଜ୍ୟ ସଭାପତି ବସନ୍ତ ପଣ୍ଡା, ରାଜ୍ୟ ନିର୍ବାଚନ ଅଧିକାରୀ ରଞ୍ଜନ ପଟେଲ, ସୁଦୀପ୍ତ ରାୟ, ସମୀର ମହାନ୍ତି, ପୃଥ୍ବୀରାଜ ହରିଚନ୍ଦନ ଏବଂ ଭୃଗୁବକ୍ସି ପାତ୍ର ରହିଛନ୍ତି। ଏହି ଟିମ୍ ସହ ରବିବାର ବିଧାୟକ, ଏମ୍ପି, ଦଳର ସାଧାରଣ ସମ୍ପାଦକ ପ୍ରମୁଖ ଭେଟିଛନ୍ତି। ଏହି ପ୍ରକ୍ରିୟା ସରିବାପରେ ପୁନର୍ବାର ସବୁ ଜିଲାସ୍ତରରେ ଯେଉଁଠାରେ ଜଣେ ଲେଖା ସଭାପତି ଆବେଦନକାରୀ ଏବଂ ଦୁଇଜଣ ଲେଖା ଅଛନ୍ତି ସେହି ସ୍ଥାନଗୁଡିକର ସମୀକ୍ଷା କରାଯାଇ ଚୂଡାନ୍ତ ଜିଲା ସଭାପତି ରିପୋର୍ଟ ପ୍ରକାଶ ପାଇବ ବୋଲି ରାୟ କହିଛନ୍ତି।
