ନୂଆଦିଲ୍ଲୀ,୧୫ା୧୦: ରାଜନୈତିକ ଦୃଷ୍ଟିରୁ ସମ୍ବେଦନଶୀଳ ରାମ ଜନ୍ମଭୂମି-ବାବ୍ରୀ ମସ୍ଜିଦ ମାମଲାର ଶୁଣାଣି ଶେଷ ପର୍ଯ୍ୟାୟରେ ପହଞ୍ଚତ୍ଥିବାବେଳେ ହିଂସାକାଣ୍ଡ ସୃଷ୍ଟି ହେବା ଆଶଙ୍କାରେ ଅଯୋଧ୍ୟାରେ ୧୪୪ ଧାରା ଜାରି କରାଯାଇଛି। କୌଣସି ସ୍ଥାନରେ ୪ କିମ୍ବା ତାହାଠାରୁ ଅଧିକ ଲୋକ ଏକାଠି ହେବାକୁ ବାରଣ କରାଯାଇଛି। ଶନିବାର ରାତିରୁ ଲାଗୁ ହୋଇଥିବା ଏହି କଟକଣାକୁ ଡିସେମ୍ବର ୧୦ ପର୍ଯ୍ୟନ୍ତ ବଢ଼ାଇ ଦିଆଯାଇଛି। ଅଯୋଧ୍ୟା ଜମିବିବାଦ ରାୟ ପ୍ରକାଶ ପାଇବାକୁ ଥିବାରୁ ଉକ୍ତ ଅଞ୍ଚଳରେ ସୁରକ୍ଷା ଓ ନିରାପତ୍ତାକୁ ବିଚାରକୁ ନେଇ କଟକଣା ଲାଗୁ କରାଯାଇଥିବା କୁହାଯାଇଛି। ସୁଟିଂ ପାଇଁ ଡ୍ରୋନ୍ ବ୍ୟବହାରକୁ ମଧ୍ୟ ନିଷିଦ୍ଧ କରାଯାଇଛି। ସୁପ୍ରିମକୋର୍ଟର ପ୍ରଧାନ ବିଚାରପତି (ସିଜେଆଇ) ରଞ୍ଜନ ଗୋଗୋଇ ନଭେମ୍ବର ୧୭ରେ ଅବସର ଗ୍ରହଣ କରୁଥିବାରୁ ଏହା ପୂର୍ବରୁ ଅଯୋଧ୍ୟା ରାୟ ପ୍ରକାଶ ପାଇବ ବୋଲି ଆଶା କରାଯାଉଛି।
କଟକଣାକୁ ନେଇ ବିଶ୍ୱ ହିନ୍ଦୁ ପରିଷଦ (ଭିଏଚ୍ପି) ଅସନ୍ତୋଷ ବ୍ୟକ୍ତ କରିଛି। ଦିଓ୍ବାଲିରେ ଦୀପ ଜାଳିବା ଲାଗି ଅନୁମତି ଦେବାକୁ ଉକ୍ତ ସଂଗଠନ ଦାବି କରିଛି। ଦିଓ୍ବାଲିରେ ସାରା ଅଯୋଧ୍ୟା ଆଲୋକମୟ ହେବାକୁ ଥିଲାବେଳେ ରାମଲାଲା କ’ଣ ପାଇଁ ଅନ୍ଧକାରରେ ରହିବେ ବୋଲି ମହନ୍ତ ନୟନ ଦାସ ପ୍ରଶ୍ନ କରିବା ସହ ଏନେଇ ସେ ଡିଭିଜନାଲ କମିଶନରଙ୍କୁ ଭେଟିଛନ୍ତି। ଅନ୍ୟପକ୍ଷରେ ଯଦି ବିବାଦୀୟ ସ୍ଥାନରେ ଦୀପ ଜାଳିବାକୁ ଭିଏଚ୍ପିକୁ ଅନୁମତି ମିଳେ ତେବେ ମୁସଲମାନ ମଧ୍ୟ ନମାଜ ପଢ଼ିବା ଲାଗି ଅନୁମତି ଲୋଡିବେ ବୋଲି ହାଜି ମେହବୁବ୍ କହିଛନ୍ତି।
ହିନ୍ଦୁ ପକ୍ଷଙ୍କୁ ପ୍ରଶ୍ନ କରା ନ ଯାଇ କେବଳ ମୁସଲମାନ ପକ୍ଷଙ୍କୁ ପ୍ରଶ୍ନ କରାଯାଉଥିବା ସୋମବାର ସୁପ୍ରିମକୋର୍ଟରେ ଅଭିଯୋଗ ହୋଇଛି। ସିଜେଆଇଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ ସାମ୍ବିଧାନିକ ପୀଠରେ ଅଯୋଧ୍ୟା ମାମଲାର ୩୮ତମ ଦିବସର ଶୁଣାଣି ବେଳେ ମୁସଲମାନ ପକ୍ଷଙ୍କ ତରଫରୁ ବରିଷ୍ଠ ଆଇନଜୀବୀ ରାଜୀବ ଧାଓ୍ବନ ଏଭଳି ଅଭିଯୋଗ କରିଛନ୍ତି। ଅନ୍ୟପକ୍ଷରେ ରାମଲାଲା ପକ୍ଷର ଓକିଲ ସି.ଏସ୍. ବୈଦ୍ୟନାଥନ ଏହାର ବିରୋଧ କରିଥିଲେ। ବିବାଦୀୟ ସ୍ଥଳର ଭିତର ଅଗଣାକୁ ବାହାର ଅଗଣାଠାରୁ ଅଲଗା କରିବା ଲାଗି ଲୁହା ରେଲିଂ ଲଗାଇବାର ଚିନ୍ତାଧାରା କରାଯାଇଥିବା ସାମ୍ବିଧାନିକ ପୀଠ କହିବାରୁ ଧାଓ୍ବନ ଉପରୋକ୍ତ ଅଭିଯୋଗ ଆଣିଥିଲେ।