ରୋମ୍, ୧୯|୭ (ଏଏଫ୍ପି)- ଡଚ୍ ସେଣ୍ଟ୍ରାଲ ଡିଫେଣ୍ଡର ମ୍ୟାଥିସ୍ ଡି’ ଲିଟ୍ ୭୫ ନିୟୁତ ୟୁରୋ (୮୪.୨ ନିୟୁତ ଡଲାର) ଫି ବିନିମୟରେ ଆଜାକ୍ସ ଫୁଟ୍ବଲ ଟିମ୍ରୁ ଆସି ଜୁଭେଣ୍ଟସ୍ ଦଳରେ ଯୋଗଦେଇଛନ୍ତିି। ଇଟାଲିଆନ ଚାମ୍ପିୟନ ଦଳ ପକ୍ଷରୁ ଏହି ସୂଚନା ଦିଆଯାଇଛି। ଜୁଭେଣ୍ଟସ ଇତିହାସରେ ଡି’ ଲିଟ୍ ହେଉଛନ୍ତି ସବୁଠାରୁ ତୃତୀୟ ଦାମୀ ଖେଳାଳି। କ୍ଲବ କ୍ରିଷ୍ଟିଆନୋ ରୋନାଲ୍ଡୋଙ୍କୁ ସର୍ବାଧିକ ୧୦୫ ନିୟୁତ ୟୁରୋ ଫି’ ବିନିମୟରେ ସ୍ବାକ୍ଷର କରିଥିବାବେଳେ ଗୋଞ୍ଜାଲେଜ୍ ହିଗୁଏନ୍ଙ୍କ ସହିତ ୯୦ ନିୟୁତ ୟୁରୋ ବିନିମୟରେ ଚୁକ୍ତି କରିଥିଲା। ସୂଚନାଯୋଗ୍ୟ, ଗତ ସିଜନରେ ଆଜାକ୍ସ ଦଳକୁ ଚାମ୍ପିୟନ୍ସ ଲିଗ୍ ସେମିଫାଇନାଲରେ ପହଞ୍ଚାଇବାରେ ୧୯ ବର୍ଷୀୟ ଡି’ ଲିଟ୍ଙ୍କର ବିଶେଷ ଭୂମିକା ରହିଥିଲା। ତାଙ୍କର ଏହି ପ୍ରଭାବୀ ପ୍ରଦର୍ଶନ ପାଇଁ ୟୁରୋପର ଅଗ୍ରଣୀ କ୍ଲବଗୁଡ଼ିକ ଏହି ଯୁବ ଖେଳାଳିଙ୍କ ସହିତ ଯୋଗାଯୋଗ କରିଥିଲେ। ଡି’ ଲିଟ୍ ଆଜାକ୍ସ ପକ୍ଷରୁ ୧୧୭ଟି ଗେମ୍ ଖେଳିଛନ୍ତି। ସମସ୍ତ ପ୍ରତିଯୋଗିତାରେ ମୋଟ ୧୩ଟି ଗୋଲ ସ୍କୋର କରିଛନ୍ତି। ନେଦରଲାଣ୍ଡ୍ସ ପକ୍ଷରୁ ସେ ୧୭ ଥର ପ୍ରତିନିଧିତ୍ୱ କରିଛନ୍ତି।