ବାଲେଶ୍ୱର ଅଫିସ,୧୧।୩- ବାଲେଶ୍ୱର ପ୍ରିମିୟର ଲିଗ୍-୧୧ର ଫାଇନାଲ ମ୍ୟାଚ୍ ଡେକାନ ୱାରିୟର୍ସ ଓ ସି ଟାଇଗର୍ସ ମଧ୍ୟରେ ସ୍ଥାନୀୟ ପରମିିଟ୍ ପଡ଼ିଆରେ ଅନୁଷ୍ଠିତ ହୋଇଥିଲା। ନିର୍ଦ୍ଧାରିତ ୨୦ ଓଭରରେ ଡେକାନ ୱାରିୟର୍ସ ବ୍ୟାଟିଂ କରି ୧୨୦ ରନ୍ ସଂଗ୍ରହ କରିଥିବାବେଳେ ସି ଟାଇଗର୍ସ ନିର୍ଦ୍ଧାରିତ ଓଭରରେ ୯ ଉଇକେଟ୍ ହରାଇ ୧୦୭ ରନ୍ କରି ପରାସ୍ତ ହୋଇଛି। ଫଳରେ ଡେକାନ ୱାରିୟର୍ସ ଚାମ୍ପିୟନ ଓ ସି ଟାଇଗର୍ସ ରନର୍ସଅପ୍ ହୋଇଥିଲା।
ମ୍ୟାଚ୍ରେ ଡେକାନ ୱାରିୟର୍ସ ଟସ୍ ହାରି ପ୍ରଥମେ ବ୍ୟାଟିଂ କରି ୨୦ ଓଭରରେ ସମସ୍ତ ଉଇକେଟ୍ ହରାଇ ୧୨୦ ରନ୍ କରିଥିଲା। ଦଳ ତରଫରୁ ରୋନାଲ୍ଡ ଦାସ ୨୬ ରନ୍, ପ୍ରଦୀପ୍ତ ଦାସ ୪୪ ରନ୍ କରିଥିବାବେଳେ ସି ଟାଇଗର୍ସ ତରଫରୁ ଆଇଏସ୍ ଗିରି ସର୍ବାଧିକ ୪ଟି ଓ ଚନ୍ଦନ ସାହୁ ୨ଟି ଉଇକେଟ୍ ନେଇଥିଲେ। ଜବାବରେ ସି-ଟାଇଗର୍ସ ସମ୍ପୂର୍ଣ୍ଣ ୨୦ ଓଭର ଖେଳି ମଧ୍ୟ ୯ଟି ଉଇକେଟ୍ ହରାଇ ୧୦୭ ରନ୍ କରିବାକୁ ସମର୍ଥନ ହୋଇ ୧୩ ରନ୍ରେ ପରାଜୟ ବରଣ କରିଛି। ଦଳ ତରଫରୁ ଏମ୍ଡ଼ି ଆକ୍ରାମ ୨୦ ରନ୍, ଚନ୍ଦନ ସାହୁ ୨୯ ରନ୍ କରିଥିବାବେଳେ ଡେକାନ ତରପରୁ ଲେଲିନ କୁମାର ବଳ ଓ ନିର୍ବିଶଙ୍କର ବାରିକ ୩ଟି ଲେଖାଏଁ ଓ ପ୍ରଦୀପ୍ତ ଦାସ ୨ଟି ଉଇକେଟ୍ ନେଇଥିଲେ। ପ୍ରଦୀପ୍ତ ଦାସଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ଘୋଷଣା କରାଯାଇଥିଲା।
ଅମିତ ଅମିତାଭ ମହାକୁଡ଼, ଅଶ୍ୱିନୀ ସାମଲ ଓ ପ୍ରୀତିରଞ୍ଜନ ବିଜୟ ସିଂ ମ୍ୟାଚ ପରିଚାଳନା କରିଥିବାବେଳେ ସୌମେନ୍ଦ୍ର ସାହୁ ଓ ରାହୁଲ ସିଂ ସ୍କୋରର ଦାୟିତ୍ୱରେ ଥିଲେ। ମ୍ୟାଚ୍ ପରେ ସଂଗଠନ ତରଫରୁ ଆୟୋଜିତ ଉଦ୍ଯାପନୀ ସମାରୋହରେ ମୁଖ୍ୟଅତିଥି ଭାବେ ଅତିରିକ୍ତ ଜିଲାପାଳ ସମ୍ବିତ କୁମାର ନାୟକ, ସମ୍ମାନନୀୟ ଅତିଥି ଭାବେ କଳିଙ୍ଗ ଗ୍ରୁପ୍ ଅଫ୍ ପ୍ରୋପଟିସ୍ଜ ଅଧ୍ୟକ୍ଷ ମନୋଜ କୁମାର ଜେନା, ଅର୍ବାନ କୋ. ବ୍ୟାଙ୍କର ଶାଖା ପରିଚାଳକ ଘଡ଼ାଇ ଏବଂ ପଲ୍ଲଭି ଗ୍ରୁପ୍ର ପରିଚାଳକ ପ୍ରକାଶ ନାୟକ ଉପସ୍ଥିତ ରହି ଚାମ୍ପିୟନ ଦଳକୁ ୫୫,୫୫୫ ଓ ରନର୍ସଅପ୍ ଦଳକୁ ୪୪,୪୪୪ ଟଙ୍କା ସହ ଟ୍ରଫି ପ୍ରଦାନ କରିଥିଲେ। ଦିବ୍ୟଶକ୍ତି ଚକ୍ରବର୍ତ୍ତୀଙ୍କୁ ବେଷ୍ଟ ବ୍ୟାଟ୍ସମ୍ୟାନ୍, ନିର୍ବିଶଙ୍କର ବାରିକଙ୍କୁ ବେଷ୍ଟ ବୋଲର, ମ୍ୟାନ୍ ଅଫ୍ ଦି ଲିଗ୍ ପାଇଁ ନରୋତ୍ତମ ଭଞ୍ଜଙ୍କୁ ପୁରସ୍କୃତ କରାଯାଇ ଥିଲା। ୧୬ ବର୍ଷରୁ କମ୍ ଓଡ଼ିଶା ଦଳରେ ସ୍ଥାନ ପାଇଥିବା ଭବିଷ୍ୟ ବେହେରା ଏବଂ ୧୬ ବର୍ଷରୁ କମ୍ ମହିଳା ଦଳ ଓଡ଼ିଶାରେ ସ୍ଥାନ ପାଇଥିବାଅଙ୍କିତା ଗିରି, ରାଷ୍ଟୀୟ କବାଡ଼ି ଦଳରେ ସ୍ଥାନ ପାଇଥିବା ଲକ୍ଷ୍ମୀଧର ଜେନାଙ୍କୁ ସମ୍ମାନୀତ କରାଯାଇଥିଲା। ସିଦ୍ଧେଶ୍ୱର ଟୁଡୁ, ସତ୍ୟଜିତ ସିଂ, ସବିଲା ଖାତୁନ, ଜଗନ୍ନାଥ ମୁର୍ମୁଙ୍କୁ ଜାତୀୟ ଖୋଖୋ ଦଳକୁ ମନୋନୀତ ହୋଇଥିବାରୁ ସମ୍ମାନୀତ କରାଯାଇଥିଲା। ଶେଷରେ ସଂଗଠନର ଅଧ୍ୟକ୍ଷ ଲକ୍ଷ୍ମୀନାରାୟଣ ମହାନ୍ତି ଧନ୍ୟବାଦ ଅର୍ପଣ କରିଥିଲେ। ଅଭ୍ୟୁଦୟ ଦାସ ମଞ୍ଚ ପରିଚାଳନା କରିଥିଲେ।
