ଦେଢ଼ ବର୍ଷରୁ ଉର୍ଦ୍ଧ୍ୱ ସମୟ ଧରି ସମଗ୍ର ବିଶ୍ୱରେ କରୋନା ତା’ର କରାଳ ରୂପ ଦେଖାଇ ଚାଲିଛି। ଅବଶ୍ୟ କେତେକ ଦେଶରେ ଏହା ନିୟନ୍ତ୍ରଣକୁ ଆସିଥିବା ବେଳେ ଏହାର ନୂଆ ରୂପ ଚିନ୍ତା ବଢ଼ାଇଛି। ଅନ୍ୟପକ୍ଷରେ ଡେଙ୍ଗୁ ତାହାର ମଧ୍ୟ କାୟା ବିସ୍ତାର କରିଛି। ଡେଙ୍ଗୁର ନୂଆ ରୂପ ଭାବରେ ‘ଡିଇଏନଭି-୨’ ଭୂତାଣୁ ମାନବ ସମାଜ ପାଇଁ ଅଧିକ କ୍ଷତିକାରକ ବୋଲି ଜଣାପଡିଛି। ସାଧାରଣତଃ ଘରର ଆଖପାଖରେ ପାଣି ଜମି ରହିଲେ ଡେଙ୍ଗୁ ପାଇଁ ଦାୟୀ ଏଡିସ୍ ମଶା ସେମାନଙ୍କର ବଂଶ ବିସ୍ତାର କରିଥାଆନ୍ତି। ଏହି ନୂତନ ଭୂତାଣୁରେ ଆକ୍ରାନ୍ତ ହୋଇଥିବା ରୋଗୀଙ୍କୁ ଅଧିକ ଜ୍ୱର ହେବା ସହ ସେମାନଙ୍କଠାରେ ରକ୍ତସ୍ରାବ ମଧ୍ୟ ଦେଖାଦିଏ। ଏହା ସହ ବାନ୍ତି ଲାଗିବା, କାମ କରିବାକୁ ଆଗ୍ରହ ନ ଲାଗିବା, ଆଣ୍ଠୁ ଗଣ୍ଠି ଭୀଷଣ ପୀଡ଼ା ହେବା ଆଦି ଲକ୍ଷଣମାନ ମଧ୍ୟ ଦେଖାଦିଏ। ପୂର୍ବରୁ ଡେଙ୍ଗୁ କିମ୍ବା ଡାଇବେଟିସ୍ରେ ଆକ୍ରାନ୍ତ ଥିବା ଲୋକଙ୍କୁ ଯଦି ଏହି ଭୂତାଣୁ ଥିବା ମଶା କାମୁଡ଼େ, ତେବେ ସେହି ରୋଗୀଙ୍କ ଅବସ୍ଥା ଭୟଙ୍କର ହେବାର ଆଶଙ୍କା ରହିଛି। ତେଣୁ ନିଜେ ରହୁଥିବା ପରିବେଶକୁ ପରିଷ୍କାର ରଖିବା, ପର୍ଯ୍ୟାପ୍ତ ପରିମାଣର ପାଣି ପିଇବା, ଶୋଇବା ସମୟରେ ଶରୀରକୁ ସମ୍ପୂର୍ଣ୍ଣ ଘୋଡ଼ାଇ ରଖିବା, ମଶାରି ଟାଣି ଶୋଇବା ଦରକାର। ଏଣୁ ଏହି ଭୂତାଣୁ ଦ୍ୱାରା ଆକ୍ରାନ୍ତ ହେବା ମାତ୍ରେ ବିଳମ୍ବ ନ କରି ଡାକ୍ତରଙ୍କ ପରାମର୍ଶ କରିବାକୁ ଭୁଲନ୍ତୁ ନାହିଁ।