କଟକ ଅଫିସ, ୪ା୭: କଟକ ସହରରେ ଜଣ୍ଡିସ ପରେ ଏବେ ଡେଙ୍ଗୁ ପ୍ରାଦୁର୍ଭାବ ଦେଖିବାକୁ ମିଳିଛି। ଏହାକୁ ନେଇ ସହରବାସୀ ଆତଙ୍କିତ ହୋଇପଡିଛନ୍ତି। ସହରରେ ବିଶୁଦ୍ଧ ପାନୀୟଜଳର ଅଭାବ ଓ ବିପର୍ଯ୍ୟୟ ପରିମଳ ବ୍ୟବସ୍ଥା ଯୋଗୁ ବିଭିନ୍ନ ସମୟରେ ସଂକ୍ରାମକ ରୋଗ ବଢିବାରେ ଲାଗିଛି। ଗତ କିଛି ବର୍ଷ ଧରି କଟକ ସହରରେ ଡେଙ୍ଗୁ, ଜଣ୍ଡିସ ଭଳି ସଂକ୍ରାମକ ରୋଗ ବ୍ୟାପିବା ଦ୍ୱାରା ଅତୀତରେ କେତେକ ଜନସାଧାରଣ ପ୍ରାଣ ହରାଇଥିବାର ନଜିର ମଧ୍ୟ ରହିଛି। ବୁଧବାର କଟକ ମହାନଗର ନିଗମ(ସିଏମ୍ସି)ର ୫୨ନଂ. ୱାର୍ଡ ରାଜେନ୍ଦ୍ରନଗରରେ ଡେଙ୍ଗୁ ରୋଗୀ ଚିହ୍ନଟ ହୋଇଥିବା ଜଣାପଡ଼ିଛି। ଉକ୍ତ ୱାର୍ଡର ଲଲାଟେନ୍ଦୁ ମହାପାତ୍ରଙ୍କ ପୁଅ ସାହିଲ ମହାପାତ୍ରଙ୍କ ଦେହ ହଠାତ ଅସୁସ୍ଥ ହୋଇପଡ଼ିବାରୁ ଚିକିତ୍ସା ନିମନ୍ତେ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ରକ୍ତ ନମୁନା ପରୀକ୍ଷା ପରେ ଡେଙ୍ଗୁ ପଜିଟିଭ ଚିହ୍ନଟ ହୋଇଥିବା ଜଣାପଡିଥିଲା।
ସହରରେ ଆବର୍ଜନା ପରିଚାଳନା, ଜଳ ନିଷ୍କାସନ କ୍ଷେତ୍ରରେ ସମସ୍ୟା ସୃଷ୍ଟି ହେବାରୁ ଏଡିସ ମଶାଙ୍କ ପ୍ରାଦୁର୍ଭାବ ବୃଦ୍ଧି ପାଇଛି। ଏଥିପାଇଁ ପୂର୍ବରୁ ଜିଲା ପ୍ରଶାସନ, ସିଏମ୍ସି ପକ୍ଷରୁ ବାରମ୍ବାର ବୈଠକ ଡକାଯାଇ ବିଭାଗୀୟ ଅଧିକାରୀଙ୍କ ସହ ଆଲୋଚନା ହୋଇଥିଲା। ଚଳିତବର୍ଷ ମୌସୁମୀ ବର୍ଷା ଆସିବା ପୂର୍ବରୁ ସହରରେ ଯେଭଳି ଜଳବନ୍ଦୀ ସମସ୍ୟା ନ ହେବ, ପରିବେଶ ପ୍ରଦୂଷଣ ଦୂର କରାଯିବା, ବିଶୁଦ୍ଧ ପାନୀୟଜଳ ଯୋଗାଇଦେବା, ସଂକ୍ରାମକ ରୋଗର ନିରାକରଣ ନିମନ୍ତେ ଆଗୁଆ ପଦକ୍ଷେପ ଗ୍ରହଣ କରାଯିବା ଓ ଲୋକଙ୍କୁ ସଚେତନ କରିବା ସମ୍ପର୍କରେ ଆଲୋଚନା ହୋଇଥିଲା। ହେଲେ ଏ ଦିଗରେ ପ୍ରଶାସନ ଫେଲ୍ ମାରିବାରୁ ଡେଙ୍ଗୁଭଳି ମାରାତ୍ମକ ରୋଗ ବୃଦ୍ଧି ପାଉଥିବା ଦେଖିବାକୁ ମିଳିଛି। କଟକ ସହରରେ ଡେଙ୍ଗୁ ନିୟନ୍ତ୍ରଣ କରିବା ପାଇଁ ପ୍ରଶାସନ ଏବେଠାରୁ ତତ୍ପରତା ପ୍ରକାଶ ନ କଲେ ଆଗକୁ ପରିସ୍ଥିତି ଅସମ୍ଭାଳ ହୋଇପଡ଼ିବ ବୋଲି ବୁଦ୍ଧିଜୀବୀମାନେ ପ୍ରକାଶ କରିଛନ୍ତି।
କଟକ ଜିଲାରେ ଗତ ଜାନୁୟାରୀରୁ ଜୁନ ମଧ୍ୟରେ ୬ଜଣ ଡେଙ୍ଗୁ ରୋଗୀଙ୍କୁ ଚିହ୍ନଟ କରାଯାଇଥିଲା। ତେବେ ସିଏମ୍ସି ଅଞ୍ଚଳରେ ପ୍ରଥମଥର ଡେଙ୍ଗୁ ରୋଗୀ ଚିହ୍ନଟ ହେବା ପରେ ଲୋକେ ଭୟଭୀତ ହୋଇପଡ଼ିଛନ୍ତି। ୩ ମାସ ତଳୁ ମଶା ମାରିବା ପାଇଁ ପଦକ୍ଷେପ ନେଉଥିବା ନେଇ ଡିଣ୍ଡିମ ପିଟୁଥିବାବେଳେ ଏବେ ସହରରେ ଡେଙ୍ଗୁମଶା ବୃଦ୍ଧିପାଇବା ସିଏମ୍ସି ପଦକ୍ଷେପକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ସିଏମ୍ସି ସ୍ବାସ୍ଥ୍ୟ ଅଧିକାରୀ ଡା. ଉମେଶ ପାଣିଗ୍ରାହୀଙ୍କୁ ପଚାରିବାରୁ କଟକ ସହରରେ ଡେଙ୍ଗୁ ବ୍ୟାପିବା ଘଟଣାକୁ ଅସ୍ବୀକାର କରିବା ସହ ଏହା ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି। କଟକ ବଡ଼ମେଡ଼ିକାଲକୁ କିଛିଦିନ ତଳେ ୨ଜଣ ଡେଙ୍ଗୁରୋଗୀ ଚିକିତ୍ସା ପାଇଁ ଆସିଥିଲେ। ମାତ୍ର ସେମାନେ କଟକ ସହରର ବାସିନ୍ଦା ନୁହନ୍ତି।