ନୂଆଦିଲ୍ଲୀ, ୨୫ା୨ (ପି.ଟି.)-କ୍ରୋଏସିଆ ବିପକ୍ଷ ଡେଭିସ୍ କପ୍ ମ୍ୟାଚ ପାଇଁ ଭାରତୀୟ ଟେନିସ ଦଳ ଘୋଷଣା କରାଯାଇଛି। ସର୍ବଭାରତୀୟ ଟେବୁଲ ଟେନିସ ଆସୋସିଏଶନ (ଆଇଟା) ସିଲେକ୍ସନ କମିଟି ୫ଜଣିଆ ପ୍ଲେଇଂ ସ୍କ୍ବାର୍ଡରେ ଭେଟେରାନ ଲିଆଣ୍ଡର ପେସ୍ଙ୍କୁ ସ୍ଥାନ ଦେଇଛି। ଡିଭିଜ ଶରନ ରିଜର୍ଭ ଖେଳାଳି ରହିଛନ୍ତି। ଆଇଟା ମଙ୍ଗଳବାର ଖେଳାଳି ତାଲିକା ଅନ୍ତର୍ଜାତୀୟ ଟେନିସ ମହାସଂଘ (ଆଇଟିଏଫ୍) ନିକଟକୁ ପଠାଇ ଦେଇଛି। ଜାଗ୍ରେବଠାରେ ହାର୍ଡକୋର୍ଟରେ ମାର୍ଚ୍ଚ ୬-୭ରେ ଖେଳାଯିବାକୁଥିବା ଏହି କ୍ୱାଲିଫାୟର୍ସ ମ୍ୟାଚ ପାଇଁ ଜାତୀୟ ମହାସଂଘ ପ୍ରଥମେ ୬ ଜଣିଆ ଦଳ ଘୋଷଣା କରିଥିଲା। ୨୪ଟି ଦଳକୁ ନେଇ ହେବାକୁଥିବା କ୍ୱାଲିଫାୟର୍ସରେ କ୍ରୋଏସିଆ ଟପ୍ ସିଡ୍ ମାନ୍ୟତାପ୍ରାପ୍ତ ଦଳ। ଏଥିରୁ ୧୨ ବିଜୟୀ ଦଳ ଡେଭିସ୍ କପ୍ ଫାଇନାଲକୁ ଯୋଗ୍ୟତା ଅର୍ଜନ କରିବେ। ପରାଜିତ ଦଳ ଓ୍ବାଲର୍ଡ ଗ୍ରୁପ୍-୧ରେ ସ୍ଥାନ ପାଇବେ। ରିଜର୍ଭ ଖେଳାଳି କିଏ ରହିବ ସେ ନେଇ ଅଧିନାୟକ ରୋହିତ ରାଜପାଲ ସମସ୍ତ ଖେଳାଳିଙ୍କ ସହିତ ଆଲୋଚନା କରିଥିଲେ। ଏପରିକି ସେ ଡିଭିଜଙ୍କ ସହିତ ମଧ୍ୟ ଆଲୋଚନା କରିଥିଲେ। ଜାଗ୍ରେବ ଗସ୍ତ କରିବାକୁ ଥିବା ଦଳର ୬ଷ୍ଠ ସଦସ୍ୟ ହେବାକୁ ସେ ରାଜି ହୋଇଥିବା ଆଇଟା ସୂତ୍ରରୁ ପ୍ରକାଶ। ସୁମିତ ନାଗାଲ, ପ୍ରଜନେଶ ଗୁଣେସ୍ବରନ ଏବଂ ରାମକୁମାର ରମାନାଥନ ଦଳରେ ସିଙ୍ଗଲ୍ସ ଖେଳାଳି ଭାବେ ସ୍ଥାନ ପାଇଥିବା ବେଳେ ପେସ୍ ଓ ରୋହନ ବୋପାନ୍ନା ଡବଲ୍ସ ଖେଳିବେ। ପାକିସ୍ତାନ ବିପକ୍ଷ ଗତ ମୁକାବିଲାରେ ଇଞ୍ଜୁରୀ କାରଣ ଦର୍ଶାଇ ବୋପାନ୍ନା ଓହରିଯାଇଥିଲେ। କାଜାଖସ୍ତାନର ନୁର୍ ସୁଲ୍ତାନରେ ଖେଳାଯାଇଥିବା ଏହି ମ୍ୟାଚରେ ପେସ୍ ଓ ଜୀବନ ନେଦୁନ୍ଚେଝିଆନ ଖେଳିଥିଲେ। ଅଣଖେଳାଳି ଅଧିନାୟକ ରାଜପାଲ କହିଛନ୍ତି ଚଳିତ ସିଜନରେ ପେସ୍ଙ୍କ ପ୍ରଦର୍ଶନ ଭଲ ରହିଛି। ପୁଣେଠାରେ ଟାଟା ଓପନ ମହାରାଷ୍ଟ୍ରରେ ସେ ଡିଭିଜଙ୍କୁ ପରାସ୍ତ କରିଛନ୍ତି। ବେଙ୍ଗାଲୁର ଓପନ ଚ୍ୟାଲେଞ୍ଜରରେ ମଧ୍ୟ ସେ ଫାଇନାଲକୁ ଉନ୍ନୀତ ହୋଇଥିଲେ। ଦେଶ ପାଇଁ ସେ ଦୀର୍ଘ ୩୦ବର୍ଷ ହେଲା ଖେଳିଆସୁଛନ୍ତି। ତାଙ୍କ ପ୍ରତି ସମ୍ମାନ ରହିଛି। ଡିଭିଜ ମଧ୍ୟ ତାହା ଅନୁଭବ କରିଛନ୍ତି। ଡେଭିସ୍ କପ୍ରେ ଭାରତ ଓ କ୍ରୋଏସିଆ ମଧ୍ୟରେ ଦ୍ୱିତୀୟ ଥର ମୁକାବିଲା ହେବାକୁ ଯାଉଛି। ଗତଥର ୧୯୯୫ରେ ନୂଆଦିଲ୍ଲୀରେ ହୋଇଥିବା ମୁକାବିଲାରେ ଭାରତ ୩-୨ରେ ବିଜୟୀ ହୋଇଥିଲା। ପେସ୍ ତାଙ୍କର ଉଭୟ ସିଙ୍ଗଲ୍ସ ଏବଂ ମହେଶ ଭୂପତିଙ୍କ ସହ ଡବଲ୍ସ ଜିତିଥିଲେ। ଏଥର କ୍ରୋଏସିଆ ଦଳରେ ର଼୍ୟାଙ୍କିଙ୍ଗ ତାଲିକାର ଟପ୍ ୫୦ରେ ସ୍ଥାନ ପାଇଥିବା ଦୁଇଜଣ ଖେଲାଳି ରହିଛନ୍ତି। ସେମାନେ ହେଲେ ବୋର୍ନା କୋରିକ୍ (୨୬ ର଼୍ୟାଙ୍କିଙଙ୍ଗ) ଏବଂ ମାରିନ୍ ସିଲିକ୍ (୩୬ତମ ର଼୍ୟାଙ୍କିଙ୍ଗ)।