କରାଚି,୧୧।୧୧(ପି.ଟି.)- ଭାରତ ବିପକ୍ଷ ଡେଭିସ କପ୍ ଟାଇ ସ୍ଥାନାନ୍ତର ନିଷ୍ପତ୍ତି ବିରୋଧରେ ପାକିସ୍ତାନ ଚ୍ୟାଲେଞ୍ଜ୍ କରିଛି। ଡେଭିସ୍ କପ୍ ପ୍ରଥମେ ପାକିସ୍ତାନ ରାଜଧାନୀ ଇସ୍ଲାମାବାଦରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ସୁରକ୍ଷା ତଥା ନିରାପତ୍ତା କାରଣରୁ ଏହି ଟାଇକୁ ନିରପେକ୍ଷ ଭେନ୍ୟୁକୁ ସ୍ଥାନାନ୍ତର କରିବାକୁ ଅନ୍ତର୍ଜାତୀୟ ଟେନିସ ଫେଡେରେଶନ (ଆଇଟିଏଫ୍) ନିଷ୍ପତ୍ତି ନେଇଥିଲା। ଏବେ ପାକିସ୍ତାନ ଆଇଟିଏଫ୍ର ଏହି ନିଷ୍ପତ୍ତିକୁ ଚ୍ୟାଲେଞ୍ଜ୍ କରିଛି। ଓପଚାରିକ ଭାବେ ଆମେ ଆଇଟିଏଫ୍ ବିରୋଧରେ ଅପିଲ କରିଛୁ ବୋଲି ପାକିସ୍ତାନ ଟେନିସ ଫେଡେରେଶନ (ପିଟିଏଫ୍) ଅଧ୍ୟକ୍ଷ ସଲିମ ସୈଫୁଲା କହିଛନ୍ତି। ଆସନ୍ତା ୧୫ ତାରିଖ ସୁଦ୍ଧା ଆମେ ଏକ ସକାରାତ୍ମକ ଉତ୍ତର ପାଇବୁ ବୋଲି ଆଶା କରୁଛୁ।
ଭାରତ ବିପକ୍ଷ ଡେଭିସ୍ କପ୍ ଟାଇ ଆୟୋଜନ କରିବାକୁ ଆମେ ପ୍ରସ୍ତୁତ ଅଛୁ। ନିରାପତ୍ତା ନେଇ କୌଣସି ସମସ୍ୟା ନାହିଁ। ସେହିପରି ଦୁଇ ଦେଶ ମଧ୍ୟରେ ଥିବା ରାଜନୈତିକ ସମ୍ପର୍କ ମଧ୍ୟ ଏହା ଉପରେ ପ୍ରଭାବ ପକାଇବ ନାହିଁ। ତେଣୁ ଏପରିସ୍ଥଳେ ଭେନ୍ୟୁ ସ୍ଥାନାନ୍ତର ହେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସେ କହିଛନ୍ତି। ଉଲ୍ଲେଖଥାଉ କି, ଏହି ଡେଭିସ୍ କପ୍ ଏସିଆ ଓସେନିଆ ଗ୍ରୁପ୍-୧ ଟାଇ ସେପ୍ଟେମ୍ବର ୧୪-୧୫ ତାରିଖରେ ଇସ୍ଲାମାବାଦର ପାକିସ୍ତାନ ସ୍ପୋଟର୍ସ କମ୍ପ୍ଲେକ୍ସରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ୨୦୧୭ରେ ଏଠାରେ ଉଜ୍ବେକିସ୍ତାନ, କୋରିଆ ଓ ଥାଇଲାଣ୍ଡ ବିପକ୍ଷ ମ୍ୟାଚ୍ ବେଶ୍ ସଫଳତାର ସହ ଆୟୋଜିତ ହୋଇଥିଲା। ତେବେ ଚଳିତ ମାସ ଆରମ୍ଭରେ ଭେନ୍ୟୁ ସ୍ଥାନାନ୍ତର ନେଇ ଆଇଟିଏଫ୍ ଘୋଷଣା କରିଥିଲା। ସୁରକ୍ଷା କାରଣରୁ ଅଲ ଇଣ୍ଡିଆ ଟେନିସ ଆସୋସିଏଶନ (ଏଆଇଟିଏ) ଭେନ୍ୟୁ ସ୍ଥାନାନ୍ତର କରିବାକୁ ଅନୁରୋଧ କରିବା ପରେ ଆଇଟିଏଫ୍ ଏହି ନିଷ୍ପତ୍ତି ନେଇଥିଲା। ପାକିସ୍ତାର ଆଗଧାଡିର ଖେଳାଳି ଏଇସାମ- ଉଲ- ହକ ଓ ଅକିଲ ଖାଁ ଆଇଟିଏଫ୍ର ଏହି ଭେନ୍ୟୁ ସ୍ଥାନାନ୍ତର ନିଷ୍ପତ୍ତିକୁ ସମାଲୋଚନା କରିଛନ୍ତି।