ଢେଙ୍କାନାଳ ଅଫିସ, ୩।୪ – କୋଭିଡ୍-୧୯ ସଂକ୍ରମଣରେ ପ୍ରଭାବିତ ହୋଇଛି ସମଗ୍ର ଶିଳ୍ପ ଜଗତ। ଏଥିରୁ ବାଦ୍ ପଡ଼ିନି ପାରମ୍ପରିକ ହସ୍ତଶିଳ୍ପ। ଖାସ୍ କରି ଲକ୍ଡାଉନ ପରେ ଡୋକ୍ରା ଭଳି କୁଟୀରଶିଳ୍ପକୁ ପୁଞ୍ଜି କରି ପରିବାର ପୋଷୁଥିବା ଶିଳ୍ପୀଙ୍କ ହାତ ଖାଲି। ପର୍ଯ୍ୟଟକ ଆସୁ ନ ଥିବାରୁ ମାନ୍ଦା ଧରିଛି ବେପାର। ଏପରି କି ଦୈନିକ ଗୁଜରାଣ ମେଣ୍ଟାଇବା ବି ସେମାନଙ୍କ ପକ୍ଷରେ ହୋଇଯାଇଛି କାଠିକର ପାଠ।
ଢେଙ୍କାନାଳ ଜିଲା ସପ୍ତଶଯ୍ୟା ପଞ୍ଚାୟତର ଡୋକ୍ରା ଶିଳ୍ପୀଗ୍ରାମ ଭାବେ ପରିଚିତ ନୂଆଗାଁ । ନବଜୀବନପୁରରୁ ଉଠିଆସି ଏଠାରେ ବସତି ସ୍ଥାପନ କରି ରହୁଛନ୍ତି ୪୦ ଶିଳ୍ପୀ ପରିବାର। ଢେଙ୍କାନାଳ ଡୋକ୍ରା ହସ୍ତଶିଳ୍ପର ଖାସ୍ ଚାହିଦା ରହିଛି। ଜିଲା ପରିଭ୍ରମଣରେ ଆସୁଥିବା ବିଦେଶୀ ପର୍ଯ୍ୟଟକମାନେ ନୂଆଗାଁ ଆସି ଶିଳ୍ପୀଙ୍କ ସହ ଭାବ ବିନିମୟ କରିବା ସହିତ ହସ୍ତଶିଳ୍ପ ସାମଗ୍ରୀ କିଣି ନେଇଥାନ୍ତି। ସେହିପରି ମେଳା ମହୋତ୍ସବରେ କାରିଗରମାନେ ହାତ ତିଆରି ସାମଗ୍ରୀ ବିକ୍ରି କରି ବେଶ୍ ଦୁଇପଇସା ପାଇଥାନ୍ତି। ହେଲେ ଲକ୍ଡାଉନ୍ ଘୋଷଣା ପରେ ଏବେ ଶିଳ୍ପୀ ଗ୍ରାମ ଖାଁ ଖାଁ । ପର୍ଯ୍ୟଟକ ଆସୁ ନ ଥିବାରୁ ପ୍ରଭାବିତ ହୋଇଛି ଡୋକ୍ରା କାରିଗରଙ୍କ ଜୀବିକା। ସେହିପରି କରୋନା ସଂକ୍ରମଣ ପ୍ରତିରୋଧ ନେଇ କୌଣସି ବ୍ୟବସ୍ଥା କରାଯାଇ ନ ଥିବା କେତେଜଣ ଶିଳ୍ପୀ ଅଭିଯୋଗ କରିଛନ୍ତି।
ଏ ସଂକ୍ରାନ୍ତରେ ବରିଷ୍ଠ ଡୋକ୍ରା ହସ୍ତଶିଳ୍ପ କାରିଗର ଦୁଃଶାସନ ବେହେରା (୬୭) କୁହନ୍ତି, ୧୫ଦିନ ତଳେ ବ୍ୟବସାୟ ସ୍ବାଭାବିକ ଚାଲିଥିଲା। କିନ୍ତୁ କଟକଣା ଲାଗୁହେବା ପରେ କେହି ଆସୁନାହାନ୍ତି।
ସରକାରଙ୍କ ପକ୍ଷରୁ କେବଳ ଚାଉଳ ଯୋଗାଣ ହୋଇଛି। ଅତ୍ୟାବଶ୍ୟକ ସାମଗ୍ରୀ ଚଢ଼ା ଦରରେ ବିକ୍ରି ହେଉଥିବାରୁ ଭାତ, ଡାଲି ସହ ଆଳୁ ଖାଇବା ବି କଷ୍ଟକର ହୋଇପଡୁଛି। ହସ୍ତଶିଳ୍ପ ତିଆରି ପାଇଁ ୩୦୦ ଟଙ୍କା ଦେଇ ଆଣୁଥିବା ମହମ ଓ ପିତଳକୁ ବାଧ୍ୟହୋଇ ୧୫୦ ଟଙ୍କାରେ ବିକି ଦେଉଛୁ। ବ୍ୟବସାୟ ନ ଥିବାରୁ ସାମଗ୍ରୀ ତିଆରି କରି ରଖିବା ଲାଭ ନାହିଁ ବୋଲି ଦୁଃଶାସନ କହିଛନ୍ତି। ସରପଞ୍ଚ ଯେଶସ ସାହୁ କୁହନ୍ତି, ଡୋକ୍ରା କାରିଗର ରହୁଥିବା ବସ୍ତି ଉପରେ ନଜର ରଖାଯାଇଛି। ସେମାନଙ୍କୁ ୩ମାସର ଚାଉଳ ସାଙ୍ଗକୁ ଭତ୍ତା ଦିଆଯାଇଛି। ସରକାରଙ୍କ ପକ୍ଷରୁ ମାସ୍କ ମିଳି ନ ଥିବାରୁ ଦିଆଯାଇପାରି ନାହିଁ। ଭୂତାଣୁ ସଂକ୍ରମଣରୁ ସଚେତନ କରିବାକୁ ମାଇକ୍ ଯୋଗେ ପ୍ରଚାର କରାଯାଇଥିବା ସେ ସୂଚନା ଦେଇଛନ୍ତି।