ଲାଉସାନେ, ୧୪ା୬ (ଏଏଫ୍ପି)-ଡୋପିଙ୍ଗ ନିରୋଧୀ ନିୟମ ଉଲ୍ଲଂଘନ କରିଥିବା ଭିଯୋଗରେ ଦୋଷୀ ସାବ୍ୟସ୍ତ ହୋଇଛନ୍ତି ସ୍ପେନ୍ର ସାଇକ୍ଲିଷ୍ଟ ଜୁଆନ କୋବୋ। ଫଳରେ ତାଙ୍କଠାରୁ ୨୦୧୧ ଭୁଏଲ୍ଟା ଟାଇଟଲ ପ୍ରତ୍ୟାହାର କରି ନିଆଯାଇପାରେ ବୋଲି ଇଣ୍ଟରନ୍ୟାଶନାଲ ସାଇକ୍ଲିଂ ୟୁନିୟନ (ୟୁସିଆଇ) ଗୁରୁବାର ପ୍ରକାଶ କରିଛି। ଯଦି ନିଷ୍ପତ୍ତି ନିଆଯାଏ ତେବେ ରେସ୍ରେ ଦ୍ୱିତୀୟ ସ୍ଥାନ ଅଧିକାର କରିଥିବା ଖ୍ରିସ୍ ଫ୍ରୁମ୍ଙ୍କୁ ଚାମ୍ପିୟନ ବୋଲି ଘୋଷଣା କରାଯିବ। କୋବୋ କିନ୍ତୁ ଏବେ ଅବସରପ୍ରାପ୍ତ। ୨୦୦୯-୨୦୧୧ ମଧ୍ୟରେ ତାଙ୍କ ବ୍ଲଡ୍ ବାୟୋପାସ୍ପୋର୍ଟରେ ନିଷିଦ୍ଧ ଦ୍ରବ୍ୟ ଆନୋମାଲିଜ ଠାବ କରାଯାଇଛି। ଫ୍ରୁମ୍ ବର୍ତ୍ତମାନ ଫ୍ରାନ୍ସର ସେଣ୍ଟ୍-ଏଟିନିସ୍ଥିତ ଏକ ହସ୍ପିଟାଲରେ ଭର୍ତ୍ତି ହୋଇଛନ୍ତି। ସେ ଗୁରୁବାର କ୍ରାଇଟେରିଅମ୍ ଡୁ ଡଫିନେ ଚତୁର୍ଥ ଷ୍ଟେଜ୍ ପାଇଁ ଅଭ୍ୟାସ କରୁଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇ ଗୁରୁତର ଭାବେ ଆହତ ହୋଇଛନ୍ତି। କୋବୋଙ୍କୁ ବର୍ତ୍ତମାନ ୩୮ବର୍ଷ। ସାଉନିର-ଡୁଭାଲ ଟିମ୍ରେ ଡେଭିଡ ଡି ଲା ଫୁଏଣ୍ଟେଙ୍କ ସହ ସେ ତାଙ୍କ ପ୍ରଫେଶନାଲ ପଦାର୍ପଣ କରିଥିଲେ। ୨୦୦୫ରେ ସେ ତାଙ୍କ ପ୍ରଥମ ଗ୍ରାଣ୍ଡ୍ ଟୁର୍ ଦି ଗିରୋରେ ଅଂଶଗ୍ରହଣ କରିଥିଲେ। ୨୦୧୧ରେ ସେ ତାଙ୍କର ସବୁଠାରୁ ବଡ଼ ସଫଳତା ଜିଓସ୍କ-ଟିଏମ୍ସି ଟିମ୍ ସହିତ ହାସଲ କରିଥିଲେ। ଭୁଏଲ୍ଟାରେ ସେ ବିଜୟ ହାସଲ କରିଥିଲେ।