ନୂଆଦିଲ୍ଲୀ, ୧୭ା୩ (ପି.ଟି.)- ନ୍ୟାଶନାଲ ଆଣ୍ଟି ଡୋପିଙ୍ଗ ଏଜେନ୍ସି (ନାଡା) ଦ୍ୱାରା ହୋଇଥିବା ଡୋପ୍ ଟେଷ୍ଟରେ ଧରାପଡ଼ି ୪ ନାବାଳକ ଆଥ୍ଲେଟ ସାମୟିକ ସସ୍ପେଣ୍ଡ ହୋଇଛନ୍ତି। ଏମାନଙ୍କ ମଧ୍ୟରେ ଦୁଇଜଣ ଟ୍ରାକ୍ ଆଣ୍ଡ୍ ଫିଲ୍ଡ ଆଥଲେଟ୍ ରହିଛନ୍ତି। ଗତ ନଭେମ୍ବରରେ ଆନ୍ଧ୍ର ପ୍ରଦେଶର ତିରୁପତିଠାରେ ୧୭ତମ ମିଲୋ ଜାତୀୟ ଆନ୍ତଃ ଜିଲା ଜୁନିୟର ଆଥଲେଟିକ୍ସ ମିଟ୍ ଅନୁଷ୍ଠିତ ହୋଇଥିଲା। ସେତେବେଳେ ହୋଇଥିବା ଡୋପ୍ ଟେଷ୍ଟରେ ଏହି ଦୁଇ ଟ୍ରାକ୍ ଆଣ୍ଡ୍ ଫିଲ୍ଡ ଆଥଲେଟ୍ଙ୍କ ପଜିଟିଭ୍ ଆସିଥିଲା। ଉଭୟଙ୍କୁ ପିଛିଲା ଜାନୁୟାରୀ ୩୧ରୁ ସାମୟିକ ସସ୍ପେଣ୍ଡ କରାଯାଇଥିବା ନାଡା ମଙ୍ଗଳବାର ପ୍ରକାଶ କରିଛି। ଅନ୍ୟ ଦୁଇ ନାବାଳକଙ୍କ ମଧ୍ୟରେ ଜଣେ ବକ୍ସର ଓ ଜଣେ ଭଲିବଲ୍ ଖେଳାଳି ଅଛନ୍ତି। ଗତବର୍ଷ ନଭେମ୍ବରରେ ୬୫ତମ ନ୍ୟାଶନାଲ ସ୍କୁଲ ଗେମ୍ସ (୧୪ବର୍ଷରୁ କମ୍ ବକ୍ସିଂ) ଚାମ୍ପିୟନଶିପ୍ ସମୟରେ ହୋଇଥିବା ବକ୍ସର ଜଣକ ଡୋପ୍ ଟେଷ୍ଟରେ ଧରାପଡ଼ିଥିଲେ। ତାଙ୍କୁ ଫେବୃୟାରୀ ୬ରୁ ସାମୟିକ ସସ୍ପେଣ୍ଡ କରାଯାଇଛି। ଗତବର୍ଷ ଅନୁଷ୍ଠିତ ୬୫ତମ ନ୍ୟାନାଲ ସ୍କୁଲ ଗେମ୍ସ ଚାମ୍ପିୟନଶିପ୍ ବେଳେ ହୋଇଥିବା ଡୋପ୍ ଟେଷ୍ଟରେ ଭଲିବଲ ଖେଳାଳି ଜଣକ ଧରାପଡ଼ିଥିଲେ। ତାଙ୍କୁ ଜାନୁୟାରୀ ୩୧ରୁ ସାମୟିକ ସସ୍ପେଣ୍ଡ କରାଯାଇଛି। ଟେଷ୍ଟ ବେଳେ ଏସିଆନ ଜୁନିୟର ହାମର ଥ୍ରୋ ଚାମ୍ପିୟନ ଆଶିଷ ଝାକରଙ୍କର ମଧ୍ୟ ପଜିଟିଭ ଆସିଥିଲା। ଗତ ସେପ୍ଟେମ୍ବରରେ ପୁଣେଠାରେ ଅନୁଷ୍ଠିତ ସର୍ଭିସେସ୍ ଆଥଲେଟିକ୍ସ ଚାମ୍ପିୟନଶିପ୍ ବେଳେ ତାଙ୍କର ଡୋପ୍ ଟେଷ୍ଟ ହୋଇଥିଲା। ଆଶିଷଙ୍କୁ ମଧ୍ୟ ସାମୟିକ ବାସନ୍ଦ କରାଯାଇଛି।
