ଡ୍ରିମ୍ସ ଇଞ୍ଜିନିୟରିଂ କଲେଜରେ ହେବ ସ୍ବତନ୍ତ୍ର କରୋନା ହସ୍ପିଟାଲ
41 କଟକ ଅଫିସ,୨୮ା୩: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। ରାଜ୍ୟରେ ମଧ୍ୟ ଗୁରୁବାର ତୃତୀୟ କରୋନା ରୋଗୀ ଚିହ୍ନଟ ହୋଇଛନ୍ତି। ପରିସ୍ଥିତିକୁ ନିୟନ୍ତ୍ରଣରେ ରଖିବା ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ନେଉଛନ୍ତି। ବିଶେଷକରି କରୋନା ଆକ୍ରାନ୍ତଙ୍କ ଚିକିତ୍ସାକୁ ଦୃଷ୍ଟିରେ ରଖି ସରକାର ଗୁରୁବାର ଭୁବନେଶ୍ୱର କିମ୍ସ ଏବଂ ସମ୍ ହସ୍ପିଟାଲ ସହାୟତାରେ ହଜାରେ ଶଯ୍ୟା ବିଶିଷ୍ଟ ୨ଟି କୋଭିଡ-୧୯ହସ୍ପିଟାଲ୍ ସ୍ଥାପନ ନେଇ ବୁଝାମଣାପତ୍ର ସ୍ବାକ୍ଷର କରିଥିଲେ। ଏହାର ଦିନକ ପରେ କଟକ ଜିଲାରେ ସ୍ବତନ୍ତ୍ର କରୋନା ହସ୍ପିଟାଲ ପ୍ରତିଷ୍ଠା ପାଇଁ ଡ୍ରିମ୍ସ ଇଞ୍ଜିନିୟରିଂ କଲେଜ କର୍ତ୍ତୃପକ୍ଷ ଓ ସ୍ବାସ୍ଥ୍ୟ ବିଭାଗ ମଧ୍ୟରେ ଆଉ ଏକ ବୁଝାମଣାପତ୍ର ସ୍ବାକ୍ଷର କରାଯାଇଛି। ଏହି ହସ୍ପିଟାଲ ଟାଙ୍ଗୀଠାରେ ଖୁବ୍ ଶୀଘ୍ର ଆରମ୍ଭ କରାଯିବ। କେନ୍ଦ୍ରାଞ୍ଚଳ ଆର୍ଡିସି ଅନିଲ କୁମାର ସାମଲ, କଟକ ଜିଲାପାଳ ଭବାନୀ ଶଙ୍କର ଚୟନୀ, ଏସ୍ସିବି ସୁପରିଣ୍ଟେଣ୍ଡେଣ୍ଟ ଡାକ୍ତର ଅନ୍ନଦା ପ୍ରସାଦ ପଟ୍ଟନାୟକ, ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ଅବଦୁଲ ଅଖତର,ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ଏମ୍. ଆର. ଖାନଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଶୁକ୍ରବାର ଡ୍ରିମ୍ସ କଲେଜ ପରିସର ବୁଲି ଅନୁଧ୍ୟାନ କରିବା ପରେ ଏହି ନିଷ୍ପତ୍ତି ନିଆଯାଇଛି। ଏଥିନିମନ୍ତେ କଲେଜର ଉଭୟ ମହିଳା ଓ ପୁରୁଷ ଛାତ୍ରାବାସର ପ୍ରାୟ ୪୫୦ଟି ପ୍ରକୋଷ୍ଠ ବ୍ୟବହାର କରାଯିବ ବୋଲି ଡ୍ରିମ୍ସ ଗ୍ରୁପ୍ ଅଧ୍ୟକ୍ଷ ପ୍ରମୋଦ ରାଉତ ଘୋଷଣା କରିଛନ୍ତି। ଏହି ପ୍ରସ୍ତାବିତ ହସ୍ପିଟାଲରେ ସମସ୍ତ ଆନୁଷଙ୍ଗିକ ବ୍ୟବସ୍ଥା କରାଯାଇ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟକ୍ଷମ କରାଯିବ।
ଶୁକ୍ରବାର କଲେଜ ତରଫରୁ ପୂର୍ତ୍ତ ବିଭାଗକୁ ଦାୟିତ୍ୱ ହସ୍ତାନ୍ତର କରାଯିବା ପରେ ନିର୍ମାଣ କାର୍ଯ୍ୟ ଆରମ୍ଭ କରାଯାଇଛି। ହସ୍ପିଟାଲରେ ୪୫୦ଟି ସାଧାରଣ ଶଯ୍ୟା ସହ ସ୍ବତନ୍ତ୍ର ଭାବେ ୫୦ଟି ପ୍ରକୋଷ୍ଠରେ ୫୦ଆଇସିୟୁର ବ୍ୟବସ୍ଥା କରାଯିବ। ଏହାବ୍ୟତୀତ ବହିଃ ବିଭାଗ, ନିଦାନ ଓ ଲଣ୍ଡ୍ରି ଆଦି ସମସ୍ତ ସୁବିଧା ରୋଗୀମାନଙ୍କୁ ଦିଆଯିବ। ରୋଗୀ ସେବାରେ ନିୟୋଜିତ ହେବାକୁ ଥିବା ଡାକ୍ତର, ନର୍ସ ଓ ଅନ୍ୟାନ୍ୟ ସ୍ବାସ୍ଥ୍ୟକର୍ମୀଙ୍କ ରହିବାର ବ୍ୟବସ୍ଥା ପୃଥକ୍ ଭାବେ କଲେଜର ଅନ୍ୟ ଏକ କ୍ୟାମ୍ପସରେ କରାଯିବ। ପ୍ରକାଶ ଯେ, ଏହି ପ୍ରସ୍ତାବିତ ହସ୍ପିଟାଲ କିଛି ଦିନ ପୂର୍ବେ ଏସ୍ସିବିର ବିଏସ୍ସି ନର୍ସିଂ କଲେଜ ବିଲ୍ଡିଂରେ କାର୍ଯ୍ୟକ୍ଷମ ହେବାର ଥିଲା। କିନ୍ତୁ ପରବର୍ତ୍ତୀ ସମୟରେ କିଛି ବିବାଦ ଦେଖାଦେବାରୁ ଏସ୍ସିବି ସୁପରିଣ୍ଟେଣ୍ଡେଣ୍ଟ ଏହାକୁ ଅନ୍ୟତ୍ର ସ୍ଥାନାନ୍ତର କରାଇବା ପାଇଁ ନିଷ୍ପତ୍ତି ନେଇଥିଲେ।