ବମ୍ବେ: ବଡ଼ ପରଦାରେ ଭଲ ପ୍ରଦର୍ଶନ କରି ହିଟ୍ ସାବ୍ୟସ୍ତ ହୋଇଥିଲା ଅଭିନେତା ଆୟୁଷ୍ମାନ୍ ଖୁରାନ୍ନାଙ୍କ ଫିଲ୍ମ ‘ଡ୍ରିମ୍ ଗର୍ଲ’। ମାତ୍ର ୩୦ କୋଟି ବଜେଟରେ ନିର୍ମାଣ ହୋଇଥିଲେ ସୁଦ୍ଧା ଏହା ୧୨୦ କୋଟିରୁ ଅଧିକ ବ୍ୟବସାୟ କରିଥିଲା। ଫିଲ୍ମକୁ ରାଜ୍ ଶାଣ୍ଡିଲ୍ୟ ନିର୍ଦ୍ଦେଶନା ଦେଇଥିବା ବେଳେ ଏକତା କପୁର ପ୍ରଯୋଜନା କରିଥିଲେ। ଏବେ ଫିଲ୍ମର ସଫଳତାକୁ ନେଇ ନିର୍ଦ୍ଦେଶକ ରାଜ୍ଙ୍କୁ ଏକ ଲାଲ୍ ରଙ୍ଗର ଜାଗୁଆର୍ ଭେଟି ଦେଇଛନ୍ତି ଏକତା କପୁର। ଉଭୟେ ଗାଡ଼ି ସମ୍ମୁଖରେ ଛିଡ଼ା ହୋଇଥିବା ବେଳର ଫଟୋ ସୋସିଆଲ ମିଡିଆରେ ଭାଇରାଲ ହେଉଛି। ଆଗାମୀ ଦିନରେ ମଧ୍ୟ ଏକତା ରାଜ୍ଙ୍କ ସହ ଆଉ ଏକ ଫିଲ୍ମ କରିପାରନ୍ତି ବୋଲି ଚର୍ଚ୍ଚା ହେଉଛି।
ଏକତାଙ୍କ ବାଲାଜୀ ପ୍ରଡକ୍ସନ ସଂସ୍ଥା ଅଧୀନରେ ନିର୍ମିତ ହୋଇଥିଲା ‘ଡ୍ରିମ୍ ଗର୍ଲ’। ଏହି ଫିଲ୍ମ ଉଭୟ ଏକତା ଓ ଆୟୁଷ୍ମାନ୍ଙ୍କ ଜୀବନର ସବୁଠାରୁ ବଡ଼ ହିଟ୍ ହୋଇଥିଲା। ପୂର୍ବରୁ ପ୍ରଯୋଜନା ସଂସ୍ଥାରେ ନିର୍ମିତ ଫିଲ୍ମ ‘ଏକ୍ ଭିଲେନ୍’ ହିଟ୍ ହୋଇଥିବା ବେଳେ ଏହାକୁ ଆୟୁଷ୍ମାନ୍ଙ୍କ ଫିଲ୍ମ କାଟିଥିଲା। ଫିଲ୍ମରେ ଆୟୁଷ୍ମାନ୍ଙ୍କ ସହ ନୁସରତ ଭରୁଚା ପ୍ରମୁଖ ଭୂମିକାରେ ନଜରକୁ ଆସିଥିଲେ। ଝିଅଙ୍କ କଣ୍ଠରେ ଅଭିନୟ ସହ କଥା ହୋଇପାରୁଥିବା ପୁଅଙ୍କ ଭୂମିକାରେ ଆୟୁଷ୍ମାନ୍ ନଜରକୁ ଆସିଥିଲେ।