ଆନନ୍ଦପୁର,୧୫। ୭(ସ୍ବ.ପ୍ର.)-ଆନନ୍ଦପୁର ପୌରପରିଷଦର ଖପରାଖାଇଠାରୁ ଘସିପୁରା ଗ୍ୟାରେଜ ଛକ ଭିଆଇପି ରୋଡ ପାଇଁ ବିବାଦ ପିଛା ଛାଡୁନି। ନିକଟରେ ସାମାନ୍ୟ ବର୍ଷାରେ ଭିଆଇପି ରୋଡ ଫାଟିବା ଠାରୁ ଆରମ୍ଭ କରି ସାଇଡ୍ ଓାଲ୍ ସତ୍ତ୍ୱେ ରାସ୍ତା ଧସିବା ଘଟଣାର ଚର୍ଚ୍ଚା ଥମି ନ ଥିବାବେଳେ ଏବେ ଡ୍ରେନ୍ ଭିତରେ ପାନୀୟ ଜଳ ପାଇପ ରହିବା ସଙ୍ଗିନ ଘଟଣା ପାଲଟିଛି। ରାସ୍ତା ନିର୍ମାଣ ସମୟରେ ଠିକଣା ଭାବେ ସରକାରୀ ଜବରଦଖଲ ସମସ୍ୟାକୁ ଦୃଷ୍ଟିକୁ ନିଆଯାଇ ନ ଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ରାସ୍ତାର ଡାହାଣପାର୍ଶ୍ୱରେ ଥିବା ସରକାରୀ ଜାଗା ଜବରଦଖଲକୁ ଉଚ୍ଛେଦ କରା ନ ଯାଇ ବାମପାର୍ଶ୍ୱରେ ଥିବା ଘରୋଇ ଜାଗା ସଂଲଗ୍ନ ରାସ୍ତା ନିର୍ମାଣ କରାଯାଇଥିବାରୁ ଡ୍ରେନ୍ ପାଇଁ ସମସ୍ୟା ସୃଷ୍ଟି ହୋଇଛି। ଫଳରେ ରାସ୍ତାର କିଛି ଅଂଶ କଟାଯାଇ ଡ୍ରେନ୍ ନିର୍ମାଣ କରାଯାଇଛି। ଏହିକ୍ରମରେ ବର୍ତ୍ତମାନ ନିର୍ମାଣ ହେଉଥିବା ଭିଆଇପି ରୋଡର ଡ୍ରେନ୍ ଭିତରେ ପାନୀୟ ଜଳର ପାଇପ୍ ରହିଯାଇଛି, ଯାହା ଏକ ଗୁରୁତର ସମସ୍ୟା। ପାନୀୟ ଜଳ ପାଇପ୍ କୌଣସି କାରଣରୁ ଲିକ୍ ହେଲେ ଡ୍ରେନ୍ ପାଣିସବୁ ଏଥିରେ ମିଶିବା ନିଶ୍ଚିତ ହୋଇଛି, ଯାହାକି ରୋଗକୁ ସିଧାସିଧା ନିମନ୍ତ୍ରଣ ବୋଲି କହିଲେ ଅତ୍ୟୁକ୍ତି ହେବନାହିଁ। ଏଭଳି ଗୁରୁତର ସମସ୍ୟା ପ୍ରତି ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।