ଖଣ୍ଡପଡା,୧୫।୯(ସ୍ବ.ପ୍ର.) -ଖଣ୍ଡପଡା ସହରର ୧ନଂ ୱାର୍ଡରେ ସିମେଣ୍ଟ କଂକ୍ରିଟ ରାସ୍ତା ଉପରେ ୫ ଇଞ୍ଚ ଓସାରର ଏକ ଡ୍ରେନ ନିର୍ମାଣକୁ ନେଇ ସ୍ଥାନୀୟ ୱାର୍ଡ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହି ଅନିୟମିତତା କାର୍ଯ୍ୟର ତଦନ୍ତ ପାଇଁ ସ୍ଥାନୀୟ ଦୁର୍ନୀତି ନିବାରଣ ସଂଘ ପକ୍ଷରୁ ଦାବି କରାଯାଇଛି । ନିର୍ମାଣାଧୀନ ସିମେଣ୍ଟ ଡ୍ରେନର ସ୍ଥାୟିତ୍ୱ ନେଇ ସାଧାରଣରେ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ଏନଏସି କର୍ତ୍ତୃପକ୍ଷ ଉକ୍ତ ଡ୍ରେନ କାର୍ଯ୍ୟ ବାବଦରେ ନିୟୋଜିତ ଠିକାଦାରଙ୍କୁ ପାଖାପାଖି ୨.୫ ଲକ୍ଷ ଟଙ୍କା ପ୍ରଦାନ କରିବା ପାଇଁ ମସୁଧା ଚଳାଇଥିବା ଅଭିଯୋଗ ହେଉଛି । ଉକ୍ତ ଡ୍ରେନ କାର୍ଯ୍ୟଟି ଖଣ୍ଡପଡା ପ୍ରଥମଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ସରକାରୀ ବାସଭବନ ପଛପାଖ ସିମେଣ୍ଟ କଂକ୍ରିଟ ରାସ୍ତା ଉପରେ ନିର୍ମାଣ ହୋଇଛି । ଅଣଓସାରିଆ ଡ୍ରେନଟି ପାଣି ନିଷ୍କାସନରେ କେତେଦୂର ସହାୟକ ହେବ ତାହା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିିଛି । ତେବେ ଖଣ୍ଡପଡା ଦୁର୍ନୀତି ନିବାରଣ ସଂଘର ସଦସ୍ୟମାନେ ଡ୍ରେନ ନିର୍ମାଣରେ ହୋଇଥିବା ଅନିୟମିତତାର ତଦନ୍ତ ସହ କାର୍ଯ୍ୟାନୁଷ୍ଠାନ ନିମନ୍ତେ ଦାବି କରିଛନ୍ତି । ସଂଘର ସଦସ୍ୟମାନେ ଖଣ୍ଡପଡା ଏନଏସି କାର୍ଯ୍ୟ ନିର୍ବାହୀ ଅଧିକାରିଣୀଙ୍କ ଦୃଷ୍ଟି ଆକର୍ଷଣ କରି କୌଣସି ସୁଫଳ ନ ପାଇବା ପରେ ଡ୍ରେନ ନିର୍ମାଣରେ ହୋଇଥିବା ଅନିୟମିତତାର ତଦନ୍ତ ନିମନ୍ତେ ନୟାଗଡ ଜିଲାପାଳ, ଭିଜିଲାନ୍ସ ଏସପି, କ୍ୱାଲିଟି କଣ୍ଟୋ୍ରଲ ଅଥରିଟି, ରାଜ୍ୟ ଗୃହ ଓ ନଗର ଉନ୍ନୟନ ବିଭାଗ ସଚିବ, ଏନଏସି କାର୍ଯ୍ୟ ନିର୍ବାହୀ ଅଧିକାରୀ ପ୍ରମୁଖଙ୍କୁ ଦାବିପତ୍ର ପ୍ରଦାନ କରିଥିବା ଜଣାଯାଇଛି ା ଏ ସମ୍ପର୍କରେ ଖଣ୍ଡପଡା ଏନଏସି କାର୍ଯ୍ୟ ନିର୍ବାହୀ ଅଧିକାରୀ ଇତିଶ୍ରୀ ଷଡଙ୍ଗୀଙ୍କ ସହ ଯୋଗାଯୋଗ କରିବାରେ ଉକ୍ତ ଡ୍ରେନ କାର୍ଯ୍ୟ ସମ୍ପନ୍ନ ହୋଇ ନ ଥିବା ବେଳେ ଏ ବାବଦରେ କୌଣସି ବିଲ୍ ପୈଠ ହୋଇ ନାହିଁ । ଅଭିଯୋଗ ପାଇବା ପରେ ସେ ଉକ୍ତ କାର୍ଯ୍ୟ ତଦାରଖ କରିବାକୁ ଯାଇଥିଲେ । ଏହାର ଉପର ସ୍ଲାବ ମଧ୍ୟ ପଡି ନ ଥିବା ସେ ସୂଚନା ଦେଇଥିବା ବେଳେ ଉକ୍ତ କାର୍ଯ୍ୟ ପାଇଁ ୨ଲକ୍ଷ ୪୬ ହଜାର ଟଙ୍କା ଅଟକଳ ହୋଇଛି । ତେବେ କାର୍ଯ୍ୟ ସମ୍ପନ୍ନ ପରେ ଯେତିକି କାର୍ଯ୍ୟ ହୋଇଥିବ ମାପ ଅନୁସାରେ ତାହାର ବିଲ୍ ହେବ ବୋଲି କହିଥିଲେ ।