ରଘୁନାଥପୁର, ୨୯। ୮ (ଡି.ଏନ.ଏ.)- ମହାନଦୀ ସାଉଥ ଜଳସମ୍ପଦ ବିଭାଗ ଅଧୀନରେ ଥିବା ରାଘୁନାଥପୁର ବ୍ଲକ ତାରପୁରସ୍ଥିତ ମହାନଦୀ ବ୍ରିଜ୍ ସ୍ପାନ ଜଏଣ୍ଟ ମୁଣ୍ଡରେ ଗର୍ତ୍ତ ସୃଷ୍ଟି ହୋଇ ଯାତାୟାତରେ ସମସ୍ୟା ସୃଷ୍ଟି କରୁଥିଲା। ଆରଆଣ୍ଡବି ବିଭାଗ ପକ୍ଷରୁ ୧୯୯୭ରେ ୬୨୩ ମିଟର ବ୍ରିଜ୍ର ନିର୍ମାଣ କାର୍ଯ୍ୟ ଶେଷ ହୋଇଥିଲା। ଦୁଇବର୍ଷ ତଳେ ଯାତାୟାତକୁ ଦୃଷ୍ଟିରେ ରଖି ଆରଆଣ୍ଡବି ବିଭାଗ ପକ୍ଷରୁ ଏହାର ମରାମତି କରାଯାଇଥିଲେ ସୁଧା ପୁନର୍ବାର ପିଲରକୁ ପିଲର ବ୍ରିଜ ସଂଯୋଗ ସ୍ଥାନରେ ଖାଲ ସୃଷ୍ଟି ହୋଇଥିଲା। ଗତ ୧୫ ଦିନ ତଳେ ବିଶ୍ୱବ୍ୟାଙ୍କ ମୁଖ୍ୟଯନ୍ତ୍ରୀ ଅନିଲ ତ୍ରିପାଠୀ ବ୍ରିଜ ସମସ୍ୟା ସମ୍ପର୍କରେ ଅନୁଧ୍ୟାନ କରିବାକୁ ଆସି ଡ୍ରୋନ୍ କ୍ୟାମେରା ଦ୍ୱାରା ଫଟୋ ଗ୍ରାଫି କରାଯାଇ ଏହାର ସର୍ବେକ୍ଷଣ କରାଯିବ ବୋଲି ପ୍ରକାଶ କରିଥିଲେ। ଗୁରୁବାର ଉକ୍ତ ବିଭାଗ ପକ୍ଷରୁ ଇନଭେଣ୍ଟଗ୍ରୀଡର ଦୁଇ ଟେକନିକାଲ ଏକ୍ସପର୍ଟ ଡ୍ରୋନ୍ କ୍ୟାମେରା ଦ୍ୱାରା ସମୁଦାୟ ବ୍ରିଜର ଭିଡିଓ ଗ୍ରାଫି କରିଛନ୍ତି। ଏହା ମଧ୍ୟରେ ସୁପରଷ୍ଟ୍ରକ୍ଚର ଓ ବିୟରିଂ କଣ୍ଡିଶନର ପର୍ଯ୍ୟାୟକ୍ରମେ ଭିଡିଓ ଗ୍ରାଫି ହେବା ସହ ବ୍ରିଜ ତଳେ ନିର୍ମିତ ବକ୍ସ ଗାର୍ଡର ମଧ୍ୟରେ କ୍ୟାମେରା ପ୍ରବେଶ କରି ସମ୍ପୂର୍ଣ୍ଣ ଫଟୋ ଉଠାଇବ ବୋଲି ପ୍ରକାଶ କରିଥିଲେ। ଏହି ଥର୍ମାଲ ଇମେଜିଂ ୪ କେ ସାଇଜ ଭିଡିଓ ଏବଂ ଫଟୋଗୁଡିକ ସ୍ପେସିଆଲ ସପ୍ଟଓ୍ବାର ଦ୍ୱାରା ଆର୍ଟିଫେସିଆଲ ଇଣ୍ଟେଲଜେନ୍ସିକୁ ଯାଇ ପ୍ରକୃତ ଅସୁବିଧା ସମ୍ପର୍କରେ ଜଣାପଡିବ ବୋଲି ଏକ୍ସପର୍ଟମାନେ ପ୍ରକାଶ କରିଥିଲେ। ଏହାର ତଦନ୍ତ ପ୍ରକ୍ରିୟା ୧୫ ଦିନ ଭିତରେ ସରିବ ବୋଲି କହିଥିଲେ। ଜେଇ ବିନୟ କୁମାର ସାହୁଙ୍କ ତତ୍ତ୍ୱାବଧାନରେ ଭିଡିଓ ଗ୍ରାଫି ଚାଲିଥିବା ବେଳେ ଫକୀରପଡା ଏସ୍ଡିଓ ରତିକାନ୍ତ ବେହେରା ଓ କର୍ମଚାରୀ ବିଶ୍ୱନାଥ ମହାନ୍ତି, ମନୋଜ ପରିଡା ଏଥିରେ ସହଯୋଗ କରିଥିଲେ।