ଭୁବନେଶ୍ୱର,୨୮।୨(ବ୍ୟୁରୋ): ନୟାପଲ୍ଲୀ ଥାନା ଅଞ୍ଚଳରେ ଥିବା ଗ୍ରୁପ ଡ୍ୟାନ୍ସ କ୍ଲାସର ମାଲିକିଆଣୀଙ୍କୁ ଗାଳିଗୁଲଜ ଓ ସଂସ୍ଥାର ଜଣେ କର୍ମଚାରୀଙ୍କୁ ବୁଧବାର ୨ ଜଣ ଯୁବକ ମାଡ଼ ମାରିଥିଲେ। ସେମାନଙ୍କୁ ପୋଲିସ ଗିରଫ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ ଏହି ଥାନା ଅନ୍ତର୍ଗତ ଗଣପତିନଗର ଅଞ୍ଚଳର ଦୁଃଖଶ୍ୟାମ ରେଡ୍ଡୀ ଓ ଶକ୍ତିବିହାର ଅଞ୍ଚଳର କାଳନ୍ଦୀ ଭୋଇ।
ପୋଲିସ ସୂଚନା ମୁତାବକ, ଗିରଫ ଅଭିଯୁକ୍ତଦ୍ୱୟ ଗ୍ରୁପ ଡ୍ୟାନ୍ସ କ୍ଲାସର ସଦସ୍ୟ ଥିଲେ। ସେମାନେ ବିଭିନ୍ନ କାର୍ଯ୍ୟକ୍ରମରେ ପାରିଶ୍ରମିକ ନେଇ କାର୍ଯ୍ୟ କରିଥାନ୍ତି। କିଛି ବକେୟା ପାରିଶ୍ରମିକକୁ ନେଇ ଉକ୍ତ ଡ୍ୟାନ୍ସ ସ୍କୁଲର ମାଲିକିଆଣୀଙ୍କ ସହ ଝଗଡା ହୋଇଥିଲା। ବୁଧବାର ସନ୍ଧ୍ୟାରେ ଅଭିଯୁକ୍ତଙ୍କୁ ନିଶାସକ୍ତ ଅବସ୍ଥାରେ ସାଲିଆସାହି ଅଞ୍ଚଳରେ ଥିବା ଡ୍ୟାନ୍ସ କ୍ଲାସ ପରିସରରେ ପହଞ୍ଚତ୍ ପାଟିତୁଣ୍ଡ କରିଥିଲେ। ସେଠାରେ ଉପସ୍ଥିତ ମାଲିକିଆଣୀ ଓ ଜଣେ ଯୁବତୀଙ୍କୁ ଗାଳିଗୁଲଜ କରିଥିଲେ। ସେହି ସମୟରେ ସେଠାରେ ଉପସ୍ଥିତ କର୍ମଚାରୀ ପ୍ରଭାତ କୁମାର ପ୍ରଧାନ ଅଭିଯୁକ୍ତଦ୍ୱୟଙ୍କୁ ଅଟକାଇବାରୁ ସେମାନେ ଉତ୍କ୍ଷିପ୍ତ ହୋଇ ତାଙ୍କୁ ମାଡ ମାରିଥିଲେ। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ୨ ଅଭିଯୁକ୍ତଙ୍କୁ ଥାନାକୁ ଉଠାଇ ଆଣିଥିଲା। ସେମାନେ ନିଜକୁ ନିର୍ଦ୍ଦୋଷ କହିବା ସହ ଥାନାରେ ପାଟିତୁଣ୍ଡ କରିଥିଲେ। ଏଥିସହ ଥାନା ବାହାରେ ସେମାନଙ୍କ ପରିବାର ଲୋକ ଓ ସାଙ୍ଗ ସାଥୀ ଏକାଠି ହୋଇ ଅଭିଯୁକ୍ତଙ୍କୁ ଛାଡି ଦେବାକୁ ଜିଦ୍ ଧରିଥିଲେ। ପୋଲିସ ନଂ. ୧୧୨/୨୦ରେ ମାମଲା ରୁଜୁ କରି ଘଟଣାର ତଦନ୍ତ କରିବା ପରେ ସେମାନଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଥିଲା।