ବାମରା,୧୬।୬ (ସ୍ବ.ପ୍ର.): ସମ୍ବଲପୁର ଜିଲା ବାମରା ବ୍ଲକ ଲରିଆପାଲି ପଁଚେତ୍ ରେଙ୍ଗାଲବେଡ଼ାର କେଁଦୁପତର ଫଡିରେ କେଁଦୁପତର ଖୁଲାମେଲା ପଡ଼ିଛେ। ପଶ୍ଚିମ ଓଡ଼ିଶାରେ ସବୁଜ ହୀରା ହିସାବେ କେଁଦୁପତର ନଁା କରିଛେ। ହେଲେ ଫଡି ଘରେ ଥିବାର ଲାଖ୍ ଲାଖ୍ ଟଁକାର କେଁଦୁପତର ଖୁଲାମେଲା ଛାଡ଼ି ଦିଆଯାଉଛେ। ପାହାଡ଼ ଜଂଗଲ ଘେରା ଗଁାଗଁଡ଼ାରୁ ଉତ୍ପାଦନ ହେଉଥିବାର କେଁଦୁପତର ଯେ ଖାଲି ରାଏଜ୍ ସରକାରକଁର ରାଜସ୍ବ ବଢ଼ଉଛେ ସେଟା ନୁହେ, ଗଁାଗଁଲିରେ ବାସ କରୁଥିବାର ଗରିବ୍ ଦୁଖି ବି କେଁଦୁପତର ତୁଲାରେ ନିୟୋଜିତ ହେଇ ନିଜର ଜୀବନ୍ ଜୀବ୍କାକେ ମଜବୁତ କରିପାରୁଛନ୍। ଖରାଦିନେ ପାଖାପାଖି ୩ ମାସ ତକ୍ କେଁଦୁପତର ତୁଲାଲିମାନେ ନିୟୋଜିତ ହେଇ ନିଜର ଜୀବନ୍ ଜୀବ୍କାକେ ମଜବୁତ କରବାର ସଂଗେ ରାଏଜ୍ ସରକାରକଁର ରାଜ୍କୋଷ ଭରବାରେ ବି ସାହାଯ୍ କରୁଛନ୍। କେଁଦୁପତର ଉତ୍ପାଦନରେ ଗୁଛାକଟା, ପତରତୁଲା, ପତର ଶୁଖା, ଥାକ୍ମରା ଆର ବିଡ଼ା ବଁଧେଇ ଉତାରୁ ପ୍ୟାକିଂ କରବାରେ ପତର ତୁଲାଲି, ମୁନସୀ, ଓ୍ବାଚରମାନକର ବଡ଼ଭାରି ଭୂମିକା ରହିଛେ। ପତର ପ୍ୟାକିଂ ଉତାରୁ ସେଟାକେ ପାସର କେଁଦୁପତର ଫଡି ଘରେ ବେଉଁତ କରି ରଖାଯାଇସି। ଲାଖ୍ ଲାଖ୍ ଟଁକାର କେଁଦୁପତର ଫଡି ଲାଗି ଏହେଦ୍କା ରାଏଜ୍ ସରକାରକଁର ତରଫୁ ଗୁଦାମ ଘର ତିଆରି କାମ୍ ଚାଲିଛେ। ହେଲେ ଏହେଦେ ସୋଲବଗା ରେଞ୍ଜ ଅଧୀନ ରେଙ୍ଗଲାବେଡ଼ା କେଁଦୁପତର ଫଡିଟା ଭଂଗା ଦଦ୍ରା ଅବସ୍ତାରେ ଥିବାର ଦେଖ୍ବାକେ ମିଲୁଛେ। ଫଡି ଘରର କାଠ୍ କବାଟ ମେଲା ହେଇ ଝୁଲୁଛେ। ଘର ଭିତରେ ଛେଲି, କୁକୁର, ଘୁଷ୍ରା, କୁକ୍ରା ବୁଲୁଛନ୍। ଇ ବାବ୍ଦେ ଫଡିର ମୁନସୀ ଚକ୍ରଧର ନାଏକକୁଁ ପଚରାଲାରୁ ତାଲା ତ ନାଇଁ, ମୁଇଁ କାଣା କରମି ବଲି କହିଥିଲେ। ସେନ୍ତା ଇ ବାବ୍ଦେ ସୋଲବଗା ରେଞ୍ଜର ଭ୍ରମରବର ପ୍ରଧାନକୁଁ ପଚରାଲାରୁ ମୁଇଁ ଇ ବାବ୍ଦେ କିଛି ନାଇଁ ଜାନି, ପରିଦରଶନରେ ଯାଇ ଦେଖ୍ମି ବଲି ସେ କହିଥିଲେ।