ନିଦ ନ ଆସିବାର ବହୁ କାରଣ ହୋଇପାରେ। ପ୍ରାୟ ସମୟରେ କୌଣସି ବନ୍ଧୁବାନ୍ଧବଙ୍କ ଘରକୁ ବା ବାହାରକୁ ଗଲେ କିଛି ଲୋକଙ୍କୁ ସୁଖଦ ନିଦ୍ରା ହୋଇ ନ ଥାଏ। ଶୋଇବା ବେଳେ ଆରାମଦାୟକ ଲାଗୁ ନ ଥିବାରୁ ସାରା ରାତି ଉଜାଗରରେ କଟିଯାଏ। ଏହାର ଏକମାତ୍ର କାରଣ ତକିଆ ମଧ୍ୟ ହୋଇପାରେ। ଆମ ଘରକୁ ଆମେ ନିଜ ଅନୁସାରେ ସଜାଇଥାଉ। ବିଶେଷକରି ଖଟରେ ଆମେ ନିଜ ପସନ୍ଦର ତକିଆରେ ଶୋଇଥାଉ। ଫଳରେ ଘରେ ସୁଖନିଦ୍ରା ଆସିଥାଏ। କିଛି ଲୋକ ତକିଆକୁ ନେଇ ଏତେ ସଜାଗ ଥାନ୍ତି ଯେ ବାହାରକୁ ଯିବା ବେଳେ ନିଜ ତକିଆକୁ ସାଙ୍ଗରେ ନେଇଯାଇଥାନ୍ତି। ତେବେ ଶୋଇବା ବେଳେ ବ୍ୟବହୃତ ହେଉଥିବା ଏହି ଗୁରୁତ୍ୱପୂର୍ଣ୍ଣ ଜିନିଷ କିଣିବା ବେଳେ ଲୋକମାନେ ବିଶେଷ ଧ୍ୟାନ ଦେଉ ନ ଥିବାରୁ ପରେ ଅସୁବିଧାର ସମ୍ମୁଖୀନ ହୋଇଥାନ୍ତି। ଆସନ୍ତୁ ଜାଣିବା ତକିଆ କିଣିବା ବେଳେ କେଉଁ କେଉଁ ଦିଗ ପ୍ରତି ଧ୍ୟାନ ଦେବା ଜରୁରୀ।
*ସୁଖଦ ନିଦ୍ରା ପାଇଁ ସବୁବେଳେ ତକିଆ କିଣିବା ବେଳେ ଧ୍ୟାନ ଦିଅନ୍ତୁ। କାରଣ ନିଦ ନ ହେଲେ ଏହା ସିଧାସଳଖ ଆପଣଙ୍କ ଶରୀର ଉପରେ ପ୍ରଭାବ ପକାଇଥାଏ। ବଜାରରେ ଭିନ୍ନ ଭିନ୍ନ କିସମର ତକିଆ ମିଳୁଥିବା ବେଳେ କିଣିବା ସମୟରେ ଉଚିତ୍ ତକିଆର ଚୟନ କରିବା ଜରୁରୀ। ସବୁବେଳେ ମେମୋରି ଫୋମ୍ଯୁକ୍ତ ତକିଆ କିଣନ୍ତୁ। ଏହି ତକିଆ ବେକ ଓ ମୁଣ୍ଡକୁ ସପୋର୍ଟ ଦେଇଥାଏ। ଏହି ତକିଆ ଅପେକ୍ଷାକୃତ ନରମ ହୋଇଥିବାରୁ ଶୋଇବା ବେଳେ କଷ୍ଟ ହୁଏ ନାହିଁ।
*ଗର୍ଭବତୀ ମହିଳାଙ୍କ ପାଇଁ ସବୁଠାରୁ ଭଲ ତକିଆ ହେଉଛି ପ୍ରେଗନାନ୍ସି ପିଲୋ। ଏହି ପିଲୋ ସାଧାରଣ ତକିଆ ଅପେକ୍ଷା ଅଧିକ ନରମ ହୋଇଥାଏ। ଏଣୁ ଗର୍ଭବତୀଙ୍କୁ ଶୋଇବା ବେଳେ ଅସୁବିଧାର ସାମ୍ନା କରିବାକୁ ପଡେ ନାହିଁ। ଅନ୍ଲାଇନ୍ରେ ଏହି ତକିଆ ଶସ୍ତାରେ ଉପଲବ୍ଧ ହେଉଛି।
* ସବୁଠାରୁ ଜରୁରୀ କଥା ହେଉଛି ତକିଆକୁ ପ୍ରାୟ ୨ବର୍ଷରେ ଥରେ ବଦଳାଇବା ଉଚିତ୍।