ଭୋଗରାଇ, ୧୪।୬(ଡି.ଏନ.ଏ.)-ଚାକିରି ପଛରେ ନ ଧାଇଁ ଆମତ୍ନିର୍ଭରଶୀଳ ହେବାକୁ ସ୍ବପ୍ନ ଦେଖିଥିଲେ ବାଲେଶ୍ୱର ଜିଲା ଭୋଗରାଇ ବ୍ଲକ ହରିପୁର ଗ୍ରାମର ପ୍ରଶାନ୍ତ ତ୍ରିପାଠୀ ଓ ବାଟଗ୍ରାମ ଗ୍ରାମର ଆଲୋକ ସାହୁ। ସେମାନେ ଦୁଇ ବନ୍ଧୁ। ଭୋଗରାଇ ଗ୍ରାମ୍ୟ ଉଚ୍ଚଶିକ୍ଷା ପ୍ରତିଷ୍ଠାନରେ ସାଙ୍ଗ ହୋଇ ବିଏ ପଢୁଥିଲେ। ପାଠ ପଢିବା ବେଳରୁ ୨ଜଣ ସଫଳ ଚାଷୀ ହେବା ଲାଗି ମନୋବଳ ଦୃଢ଼ କରିଥିଲେ। ବିଏ ପାସ୍ କରିବା ପରେ ଉନ୍ନତ ପ୍ରଣାଳୀରେ ଅମୃତଭଣ୍ଡା ଚାଷ କରି ଆମତ୍ନିର୍ଭରଶୀଳ ହେବା ସହ ବାଲେଶ୍ୱର ଜିଲାରେ ଭଲ ଚାଷୀ ହେବାକୁ ଲକ୍ଷ୍ୟ ରଖିଥିଲେ। ସେହି ଅନୁସାରେ କାମ ମଧ୍ୟ ଆରମ୍ଭ କରିଥିଲେ। ହେଲେ ଅମ୍ପାନ ବାତ୍ୟା ସେମାନଙ୍କ ସବୁ ସ୍ବପ୍ନକୁ ଧୂଳିସାତ୍ କରିଦେଲା। ତଥାପି ଯୁବକଦ୍ୱୟ ଆଶା ଛାଡ଼ିନାହାନ୍ତି। ସେମାନେ କୁହନ୍ତି ବିକଳ୍ପ ଚାଷ କରିବୁ। କଠିନ ପରିଶ୍ରମ କରିବୁ। ଆଗକୁ ବଢ଼ିବୁ।
ପ୍ରଶାନ୍ତ ଓ ଆଲୋକ ପ୍ରଥମେ କୁକୁଡ଼ିଆ ଗ୍ରାମର ବଳରାମ କରଙ୍କ ବଗିଚାକୁ ବର୍ଷକୁ ୨୦ହଜାର ଟଙ୍କାରେ ଲିଜ୍ ସୂତ୍ରରେ ନେଇଥିଲେ। ଭୁବନେଶ୍ୱର ଏକ ନର୍ସରୀରୁ ଉନ୍ନତ କିସମର ଅମୃତଭଣ୍ଡା ଚାରା ଗୋଟାକୁ ୨୫ଟଙ୍କା ଦାମ୍ରେ କିଣି ୧ ଏକର ଚାଷ କରିଥିଲେ। ଗୋଟିଏ ଗଛରେ ଏକ କୁଇଣ୍ଟାଲ ଫଳ ଅମଳ ହେବାର ନର୍ସରୀ ବିଶେଷଜ୍ଞମାନେ ପ୍ରତିଶ୍ରୁତି ଦେବା ପରେ ଦୁଇବନ୍ଧୁଙ୍କ ଆଶା ଉଜ୍ଜୀବିତ ହୋଇଥିଲା। ୯ଶହ ଚାରାରୋପଣରେ ତାଙ୍କର ୧ଲକ୍ଷ ୩୫ହଜାରରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଥିଲା। ତିନିମାସରେ ଭଲ ଗଛ ହୋଇ ଫଳ ଧରିବା ଆରମ୍ଭ କରିଥିଲା। କିନ୍ତୁ ‘ଅମ୍ଫାନ’ ବାତ୍ୟା ଯୁବକଦ୍ୱୟଙ୍କ ଆଶାକୁ ଧୂଳିସାତ୍ କରିଦେଲା। ଅମୃତଭଣ୍ଡା ଗଛଗୁଡ଼ିକ ଭାଙ୍ଗିରୁଜି ଯାଇଥିବା ବେଳେ ହଠାତ୍ ପତ୍ରପୋଡ଼ାଜନିତ ରୋଗ ହୋଇ ଫଳନ୍ତି ଗଛଗୁଡ଼ିକ ଝାଉଁଳି ମରିଯାଉଛି। ସେମାନେ ନର୍ସରୀ ଓ ଉଦ୍ୟାନ ବିଭାଗର ପରାମର୍ଶ ଓ ପରୀକ୍ଷା ପାଇଁ ବାରମ୍ବାର ନିବେଦନ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ । ଭୋଗରାଇ ଉଦ୍ୟାନ କୃଷି ବିଭାଗକୁ ଦୁଇ ଯୁବକ ଦୌଡ଼ି ଦୌଡ଼ି ଖର୍ଚ୍ଚାନ୍ତ କରି ନୟାନ୍ତ ହୋଇପଡିଲେଣି। ଏହି ବିଭାଗ ନିଦାବିଷ୍ଣୁ ସାଜିଥିବା ଅଭିଯୋଗ ହୋଇଛି। ମୃତ୍ତିକା ପରୀକ୍ଷା କିମ୍ବା କେଉଁ ରୋଗ କାରଣରୁ ଏପରି ହେଉଛି ତାହା ସ୍ପଷ୍ଟ ଜାଣିବାକୁ ଚାହିଁବାରୁ ବିଭାଗୀୟ କର୍ମଚାରୀ କିଛି କହିପାରିବେନି ବୋଲି କହିଛନ୍ତି। ଏନେଇ ଦୁଇ ଯୁବକ କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀ ଓ ବିଧାୟକ ଅନନ୍ତ ଦାସଙ୍କ ଦୃଷ୍ଟି ଆକର୍ଷଣ କରିଛନ୍ତି।