ନୂଆଦିଲ୍ଲୀ,୨୧।୭: ବାଂଲାଦେଶୀ ଲେଖିକା ତସଲିମା ନସରୀନ୍ଙ୍କ ଭାରତରେ ରହିବା ସମୟକୁ ପୁଣି ବର୍ଷେ ପାଇଁ ବଢ଼ାଇ ଦିଆଯାଇଛି। ରବିବାର ଏନେଇ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ସେ ସୁଇଡ଼େନ୍ର ନାଗରିକତା ଗ୍ରହଣ କରିଥିବାବେଳେ ଗତ ୨୦୦୪ଠାରୁ ଭାରତରେ ରହି ଆସୁଛନ୍ତି। ଭାରତରେ ତାଙ୍କ ରହିବା ସମୟ ସୀମାକୁ ୨୦୨୦ ଜୁଲାଇ ପର୍ଯ୍ୟନ୍ତ ବୃଦ୍ଧି କରାଯାଇଛି। ୫୬ ବର୍ଷ ବୟସ୍କା ତସଲିମାଙ୍କର ଭାରତରେ ରହିବା ସମୟ ସୀମାକୁ ଗତ ସପ୍ତାହରେ ୩ ମାସ ପାଇଁ ବଢ଼ାଯାଇଥିଲା। ତେବେ ସେ ଏହାକୁ ଏକବର୍ଷ ବୃଦ୍ଧି ପାଇଁ ଟୁଇଟରରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହଙ୍କୁ ଅନୁରୋଧ କରିଥିଲେ। ପ୍ରତିବର୍ଷ ୫ ବର୍ଷ ଲାଗି ସେ ସମୟସୀମା ବୃଦ୍ଧି ନିମନ୍ତେ ଆବେଦନ କରୁଥିଲେ ମଧ୍ୟ ଏହାକୁ ଏକ ବର୍ଷ ବଢ଼ାଯାଉଥିବା ସେ ଟୁଇଟ୍ କରି କହିଥିଲେ। ସୂଚନାଯୋଗ୍ୟ, ତସଲିମାଙ୍କ ଉପରେ ୧୯୯୪ରେ ବାଂଲାଦେଶରେ ଫତୁଓ୍ବା ଜାରି ପରେ ସେ ଦେଶ ଛାଡ଼ିଥିଲେ।
