ଚିକିଟି,୨୭ା୫(ଡି.ଏନ.ଏ.)- କ୍ୱାରାଣ୍ଟାଇନ୍ ସେଣ୍ଟର ନିକଟରେ କ୍ରିକେଟ ଖେଳୁଥିବାବେଳେ ବାରଣ କରିବାରୁ ପାତ୍ରପୁର ତହସିଲଦାରଙ୍କୁ ଗାଳିଗୁଲଜ ଓ ଧମକ ମାମଲାରେ କେ.ନୂଆଗାଁ ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି। ସେ ହେଲେ ନୂଆ ମୈଶାନପୁର ଗ୍ରାମର ତ୍ରିପତି ସାହୁ।
ଚିକିଟି ବ୍ଲକ ନୂଆ ମୈଶାନପୁର ଗ୍ରାମ କ୍ବାରାଣ୍ଟାଇନ୍ ସେଣ୍ଟର ନିକଟରେ ଗତ ୨୧ ତାରିଖରେ ଗ୍ରାମର କେତେଜଣ ଯୁବକ କୋଭିଡ୍ ନିୟମ ଉଲ୍ଲଘଂନ କରି କ୍ରିକେଟ୍ ଖେଳୁଥିଲେ। ସେହି ରାସ୍ତାଦେଇ ଯାଉଥିବା ପାତ୍ରପୁର ତହସିଲ୍ଦାର ଡ. ଶ୍ରୀନିବାସ ବେହେରା ସେମାନଙ୍କ ପାଖକୁ ଯାଇ ଖେଳ ବନ୍ଦ କରିବାକୁ କହିଥିଲେ। ପରେ ଯୁବକମାନେ ତାଙ୍କୁ ଗାଳିଗୁଲଜ ସହ ଧମକ ଦେଇଥିବା ନେଇ ତହସିଲ୍ଦାର ବେହେରା କେ.ନୂଆଗାଁ ଥାନାରେ ଏତଲା ଦେଇଥିଲେ। ନଂ.୧୧୪/୨୦ରେ ମାମଲା ରୁଜୁକରି ପୋଲିସ ତଦନ୍ତ ଚଳାଇଥିଲା। ତ୍ରିପତିଙ୍କୁ ଗିରଫ କରି ମଙ୍ଗଳବାର ଅପରାହ୍ନରେ ପାତ୍ରପୁର କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ବ୍ରହ୍ମପୁର ଜେଲ ହାଜତକୁ ପଠାଯାଇଥିବା ଥାନା ଅଧିକାରୀ ମାଧବାନନ୍ଦ ନାୟକ ସୂଚନା ଦେଇଛନ୍ତି।