ଖଣ୍ଡପଡ଼ା,୧୮ା୪(ସ୍ବ.ପ୍ର.): ସମ୍ପ୍ରତି ପ୍ରଚଣ୍ଡ ରୌଦ୍ରତାପ ଯୋଗୁ ଜନ ଜୀବନ ଅସ୍ତବ୍ୟସ୍ତ ହୋଇପଡ଼ିିଛି। ଏଥିଯୋଗୁ ମହାନଦୀର ଜଳ ତାତିଯାଉଛି । ଅସହ୍ୟ ଖରା ଯୋଗୁ କିଛିଦିନ ହେଲା ସକାଳ ୯ଟାଠାରୁ ଲୋକେ ଘରୁ ପଦାକୁ ବାହାରି ପାରୁ ନାହାନ୍ତି । ଗ୍ରୀଷ୍ମ ପ୍ରବାହ ଯୋଗୁ ହାଟ, ବଜାର, ରାସ୍ତା ଜନଶୂନ୍ୟ ହୋଇପଡୁଛି ା ଆଗକୁ ତାପମାତ୍ରା ବୃଦ୍ଧି ପାଇବାର ଆଶଙ୍କା ଥିବାରୁ ଜନ ସାଧାରଣଙ୍କ ମନରେ ଏବେଠାରୁ ଚିନ୍ତା ବଢ଼ିବାରେ ଲାଗିଛି। ତେବେ ପ୍ରଶାସନ ଓ ବିଭିନ୍ନ ମହଲରେ ଏଥିପ୍ରତି ସତର୍କତା ରହିବାକୁ କୁହାଯାଇଛି। ଏବେଠାରୁ ମହାନଦୀର ଜଳସ୍ତର ହ୍ରାସ ପାଇ ମଝିରେ ମଝିରେ ଶୁଖି ବାଲିପଠା ସୃଷ୍ଟି ହେଉଛି। ନଦୀ ମଧ୍ୟରେ ରହି ଖାଦ୍ୟ ଅନ୍ବେଷଣ କରୁଥିବା ଜଳଚର ପ୍ରାଣୀ ପାଣିକୁଆ ଓ ବଗ ତାତିଲା ପାଣିକୁ ସହ୍ୟ କରି ନ ପାରି ବାହାରକୁ ଉଠି ଆସୁଛନ୍ତି । ତେଣୁ ବାଲୁକା ଶଯ୍ୟାରେ ବଗ ଏବଂ ପାଣିକୁଆ ଦଳ ଦଳ ହୋଇ ବୁଲୁଥିବା ଦେଖିବାକୁ ମିଳୁଛି । ଶୀତଦିନରେ ଯେପରି ବିଭିନ୍ନ ଜାତିର ପକ୍ଷୀ ଦଳ ଦଳ ହୋଇ ନଦୀକୁ ଆସିଥାନ୍ତି ସେହିପରି ପାଣି କୁଆମାନେ ଏେବ ନଦୀ କୂଳରେ ଚରାବୁଲା କରୁଥିବା ଦୃଶ୍ୟ ଦେଖିବାକୁ ଜନ ସମାଗମ ବୃଦ୍ଧିପାଉଛି । ସମ୍ପୃକ୍ତ ପକ୍ଷୀମାନେ ପୂର୍ବାହ୍ନ ୧୧ଟାରୁ ଅପରାହ୍ନ ପ୍ରାୟ ସାଢେ ୪ଟା ପର୍ଯ୍ୟନ୍ତ ଏକାଠି ହୋଇ ନଦୀ କୂଳରେ ବସୁଥିବା ସୁ୍ନ୍ଦର ଦୃଶ୍ୟ ଖୁସି ଲାଗୁଥିବାବେଳେ ଗ୍ରୀଷ୍ମ ପ୍ରବାହ ଏମାନଙ୍କ ପାଇଁ କାଳ ସାଜିଥିବା ବିଭିନ୍ନ ମହଲରେ ମତ ପ୍ରକାଶ ପାଇଛି।
