କୋଏମ୍ବାଟୁର,୨୩।୧୨: କୋଏମ୍ବାଟୁରର କ୍ୟାଟେରୀ କ୍ଲବ ଦ୍ୱାରା ରବିବାର ତାମିଲନାଡୁର ପ୍ରଥମ କ୍ୟାଟ ଶୋ’ ବା ବିଲେଇ ପ୍ରଦର୍ଶନୀ ଆୟୋଜିତ ହୋଇଯାଇଛି। ଏହି ଶୋ’ରେ ପ୍ରାୟ ୨୦ ପ୍ରଜାତିର ୧୫୦ଟି ବିଲେଇ ଭାଗ ନେଇଥିଲେ। ଏମାନଙ୍କ ମଧ୍ୟରେ ସିଆମିଜ, ମେ କୌନ, ପର୍ସିଆନ୍ ଲଙ୍ଗ ହେୟାର, ବ୍ରିଟିଶ ଶର୍ଟ ହେୟାର ଆଦି ପ୍ରଜାତିଙ୍କୁ ସାମିଲ କରାଯାଇଥିଲା। ଏହି ବିଲେଇଙ୍କ ଦାମ୍ ୨ରୁ ୫ ଲକ୍ଷ ପର୍ଯ୍ୟନ୍ତ ରହିଥିବା ଜଣାପଡିଛି। ଏହାର ଆୟୋଜକ କହିଛନ୍ତି ବିଲେଇଙ୍କ ପ୍ରଜାତି, ଏହାର ଦାମ୍ ଓ ଏମାନଙ୍କ ବିଷୟରେ ଅଧିକ ଜାଣିବା ପାଇଁ ଏହି ଶୋ’ର ଆୟୋଜନ କରାଯାଇଥିଲା। ବିଲେଇର ଦାମ୍, ସୁନ୍ଦରତା, ଭଲ ପ୍ରଜାତି, ରକ୍ଷଣାବେକ୍ଷଣ ଓ ଆହୁରି କିଛି ଦିଗକୁ ନଜରରେ ରଖି ବିଜେତା ଘୋଷଣା କରାଯାଇଥିବା ବିଚାରକ ମଣ୍ଡଳୀ ପ୍ରକାଶ କରିଛନ୍ତି। ଏହି ପ୍ରଦର୍ଶନୀକୁ ଦେଖି ଲୋକେ ଖୁସି ପ୍ରକାଶ କରିଥିଲେ।