କେନ୍ଦୁଝର,୧୬ା୪ (ସ୍ବ.ପ୍ର.): ଦେଶରେ କରୋନା ଭୂତାଣୁ ସଂକ୍ରମଣକୁ ରୋକିବା ପାଇଁ ଲକ୍ ଡାଉନ ଘୋଷଣା ହୋଇଛି। ଯିଏ ଯେଉଁଠି ଅଛନ୍ତି ସେଠାରେ ରହିବା ପାଇଁ ସରକାର ଆହ୍ବାନ କରିଛନ୍ତି। ଏହା ସତ୍ତ୍ୱେ ଅନେକ ସମୟରେ ଶ୍ରମିକମାନେ ଗାଡିରେ, ଚାଲିଚାଲି ଓ ସାଇକେଲରେ ନିଜ ନିଜ ଘରକୁ ଫେରୁଥିବାରୁ ସମସ୍ତଙ୍କ ପାଇଁ ଚିନ୍ତାର କାରଣ ହୋଇଛି। ଅନ୍ୟପକ୍ଷେ ଜିଲା ଓ ରାଜ୍ୟ ସୀମା ସିଲ୍ ଥିବା କୁହାଯାଉଥିବା ବେଳେ ଅନ୍ୟ ରାଜ୍ୟ ଓ ଜିଲାରୁ ଶ୍ରମିକମାନେ ଚାଲି ଆସୁଥିବାରୁ କରୋନା ସଂକ୍ରମଣ ବୃଦ୍ଧି ପାଇବା ଆଶଙ୍କା ପ୍ରକାଶ ପାଇଛି। ଅନୁଗୁଳ ଜିଲା ତାଳଚେର ଅଞ୍ଚଳରୁ ୭ ଜଣ ଶ୍ରମିକ କେନ୍ଦୁଝର ଜିଲା ଦେଇ ପ୍ରାୟ ୬୦୦ରୁ ଊର୍ଦ୍ଧ୍ୱ କି.ମି ଦୂର ଝାରଖଣ୍ଡ ରାଜ୍ୟର ଦେଓଘର ଜିଲା ଅଭିମୁଖେ ଯାଉଥିବା ଘଟଣା ଆଲୋଚ୍ୟର ବିଷୟ ହୋଇଛି। ସେମାନେ ଜଣେ ଠିକାଦାର ପାଖରେ ରହି କାମ କରୁଥିଲେ। କରୋନା ପାଇଁ ଲକ୍ ଡାଉନ ହେବା ପରେ କାମଧନ୍ଦା ବନ୍ଦ ହୋଇ ଯାଇଥିଲା। ବିନା କାମରେ ୧୮ଦିନ ଅସୁବିଧାରେ ବସି ରହିବା ପରେ ଘରକୁ ଫେରିବା ପାଇଁ ସେମାନେ ନିଷ୍ପତ୍ତି ନେଇଥିଲେ। ଶ୍ରମିକ ସତ୍ୟନାରାୟଣ ଗୋସ୍ବାମୀ ଓ ମନୋଜ ଗୋସ୍ବାମୀଙ୍କ କହିବା ଅନୁସାରେ ଲକ୍ ଡାଉନ ହେବା ପରେ ଠିକାଦାର କାମ ବନ୍ଦ କରି ଚାଲିଯାଇ ଥିଲେ। ଫଳରେ ସେମାନଙ୍କ ପାଖରେ ଯାହା ଅର୍ଥ ଥିଲା ତାହା ଶେଷ ହୋଇ ଯାଇଥିଲା ା ତେଣୁ ବାଧ୍ୟହୋଇ ଗତ ରବିବାରଠାରୁୁ ସେମାନେ ଘରମୁହାଁ ହୋଇଥିବା ଦେଖିବାକୁ ମିଳିଛି ା ମଙ୍ଗଳବାର ରାତି ୮ଟା ସମୟରେ ସେମାନେ ପଳାଶପଙ୍ଗା ସ୍ପଞ୍ଜ ଛକରେ ପହଞ୍ଚି ସ୍ଥାନୀୟ ଲୋକଙ୍କୁ ଝାରଖଣ୍ଡ ଯିବା ରାସ୍ତା ପଚାରିବା ସହ କିଛି ଖାଇ ନ ଥିବା କୋହଭରା କଣ୍ଠରେ କହିଥିଲେ। ସେଠାରେ ଉପସ୍ଥିତ ପଳାଶପଙ୍ଗା ପଞ୍ଚାୟତର ପୂର୍ବତନ ସରପଞ୍ଚ ରମେଶ ଚନ୍ଦ୍ର ଗିରି ଓ ସମାଜସେବୀ ହେମନ୍ତ କୁମାର ପ୍ରଧାନ କିଛି ଶୁଖିଲା ଖାଦ୍ୟ ଓ ପାଣି ବୋତଲ ସେମାନଙ୍କୁ ଯୋଗାଇ ଦେଇଥିଲେ। ପରେ ସେମାନେ ନିଜନିଜ ସାଇକେଲ ଧରି ସେଠାରୁ ଘର ଅଭିମୁଖେ ବାହାରି ଯାଇଥିଲେ। ତେବେ ଏଭଳି ପାଦଚଲା, ମୋଟରସାଇକେଲ ଓ ସାଇକେଲରେ ଯାଉଥିବା ଲୋକମାନଙ୍କ ପ୍ରତି ପ୍ରଶାସନ ନଜର ନ ଦେଲେ କରୋନା ସଂକ୍ରମଣ ବୃଦ୍ଧି ପାଇବା ଆଶଙ୍କାକୁ ଏଡାଇ ଦିଆଯାଇ ନ ପାରେ ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି ା