ତାଳଚେର, ୧୦ା୧୨(ନି.ପ୍ର.)
ତାଳଚେର ବିଧାୟକ ବ୍ରଜ କିଶୋର ପ୍ରଧାନଙ୍କ ଭରତପୁରସ୍ଥିତ କ୍ୟାମ୍ପ କାର୍ଯ୍ୟାଳୟରେ ଶନିବାର ରାତିରେ କେହି ଦୁର୍ବୃତ୍ତ ତାଙ୍କ କାର ପୋଡ଼ିଦେବା ଏବଂ ପୂର୍ବରୁ ତାଙ୍କ ପୈତୃକ ବାସଭବନରେ ନିଆଁ ଲଗାଇଦେବାକୁ ଉଦ୍ୟମ କରିବା ଘଟଣାରେ ସୋମବାର ପୋଲିସ ପକ୍ଷରୁ ତଦନ୍ତ କରାଯାଇଛି। ଉତ୍ତର କେନ୍ଦ୍ରାଞ୍ଚଳ ଡିଆଇଜି ନରସିଂହ ଭୋଳ, ଜିଲା ଆରକ୍ଷୀ ଅଧୀକ୍ଷକ ଜଗମୋହନ ମୀନା ପ୍ରମୁଖ ଘଟଣାସ୍ଥଳ ପରିଦର୍ଶନ କରିଛନ୍ତି। ଅଧିକାରୀମାନେ ବିଧାୟକଙ୍କ ଭରତପୁର କାର୍ଯ୍ୟାଳୟର କର୍ମଚାରୀଙ୍କଠାରୁ ଘଟଣା ସମ୍ପର୍କରେ ପଚାରି ବୁଝିଥିଲେ। ବିଧାୟକ ବ୍ୟବହାର କରୁଥିବା ଗାଡ଼ିକୁ ମଧ୍ୟ ଦେଖିଥିଲେ। ପରେ ଅଧିକାରୀମାନେ ବିଧାୟକଙ୍କ ହାଣ୍ଡିଧୂଆଁସ୍ଥିତ ପୈତୃକ ବାସଭବନରେ ପହଞ୍ଚି ସେଠାରେ ପୂର୍ବରୁ ଦୁର୍ବୃତ୍ତଙ୍କ ଦ୍ୱାରା ନିଆଁ ଲଗା ସ୍ଥାନକୁ ଅନୁଧ୍ୟାନ କରିଥିଲେ। ଏହି ସମୟରେ ତାଳଚେର ଏସ୍ଡିପିଓ ସିଦ୍ଧାର୍ଥ କାଟାରିଆ, ବିକ୍ରମପୁର ଆଇଆଇସି, କଲିୟରୀ ଆଇଆଇସି ଏବଂ ଅନ୍ୟ କର୍ମଚାରୀମାନେ ଉପସ୍ଥିତ ଥିଲେ। ଏ ସମ୍ପର୍କିତ ପ୍ରତ୍ୟେକ ଘଟଣାବଳୀର ଗୁରୁତ୍ୱକୁ ଉପଲବ୍ଧ କରି ବର୍ତ୍ତମାନର କେସ୍ ଏବଂ ପୁରୁଣା କେସ୍ଗୁଡ଼ିକର ଛାନଭିନ୍ ତ୍ୱରାନ୍ବିତ କରିବାକୁ ଡିଆଇଜି ଭୋଳ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଏହି ଘଟଣାକୁ ପୋଲିସ ଗୁରୁତ୍ୱର ସହ ବିଚାର କରୁଥିବା ଏସ୍ପି ମୀନା ପ୍ରକାଶ କରିଥିଲେ। ବିଧାୟକଙ୍କ ଗାଡ଼ି ପୋଡ଼ା ଘଟଣା ନେଇ ବିକ୍ରମପୁର ଥାନାରେ ନଂ୧୪୨/୧୯ରେ ଏକ ମାମଲା ରୁଜୁ କରାଯାଇଛି। କଲିୟରୀ ଥାନା ଆଇଆଇସି ଏବଂ ବିକ୍ରମପୁର ଥାନା ଆଇଆଇସି, ତାଳଚେର ଏସ୍ଡିପିଓଙ୍କ ନେତୃତ୍ୱରେ ଏକ ଟିମ୍ ଏହି ମାମଲାର ତଦନ୍ତ କରୁଛନ୍ତି ବୋଲି ଏସ୍ପି ପ୍ରକାଶ କରିଥିଲେ। ଅପରପକ୍ଷେ ଯେଉଁମାନେ ଏହି ଘଟଣାରେ ସମ୍ପୃକ୍ତ ଅଛନ୍ତି ସେମାନଙ୍କୁ ଧରାଯିବା ସହ ଏପରି କାମ ପଛର କାରଣ ତୁରନ୍ତ ଖୋଜାଯିବା ଆବଶ୍ୟକ ବୋଲି ତାଳଚେର ବିଧାୟକ ବ୍ରଜ କିଶୋର ପ୍ରଧାନ ପ୍ରକାଶ କରିଛନ୍ତି।