ପାତ୍ରପୁର,୨୭।୧୧(ଡି.ଏନ୍.ଏ.): ତିତ୍ଲି କ୍ଷୟକ୍ଷତି ପ୍ରଦାନ ଦାବି ନେଇ ଦ୍ୱିତୀୟ ଦିନରେ ୩ଟି ଆଦିବାସୀ ପଞ୍ଚାୟତର ଲୋକେ ପାତ୍ରପୁର ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ଗତ ତିତ୍ଲି ବାତ୍ୟା ବେଳେ ଏହି ତହସିଲର ତୁମ୍ବା, ବୁରାତାଲ ଏବଂ ଆଙ୍କୁଲି ପଞ୍ଚାୟତର ପାହାଡ଼ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଥିଲା। ଏହା ପରେ ରାଜସ୍ବ ବିଭାଗ ପକ୍ଷରୁ କ୍ଷୟକ୍ଷତି ଆକଳନ ପୂର୍ବକ କ୍ଷତିପୂରଣ ପ୍ରଦାନ କରାଯାଇଥିଲା। ତେବେ ତାଲିକା ପ୍ରସ୍ତୁତ ବେଳେ ଅଣଦେଖା କରାଯାଇ ଅନେକଙ୍କୁ ବାଦ୍ ଦିଆ ଯାଇଥିବା ଲୋକେ ଅଭିଯୋଗ କରିଥିଲେ। ପରେ ପୁଣି ତହସିଲ କର୍ମଚାରୀମାନଙ୍କ କ୍ଷୟକ୍ଷତି ଆକଳନ କରାଯାଇଥିଲା। ଯାହାକୁ ନେଇ ଗତ ୧୫ ତାରିଖରେ ଆଦିବାସୀମାନେ ବ୍ଲକ ଏବଂ ତହସିଲ କାର୍ଯ୍ୟାଳୟରେ ଦାବିପତ୍ର ପ୍ରଦାନ କରିଥିଲେ। ଏପରିକି ୨୫ ତାରିଖ ମଧ୍ୟରେ ଦ୍ୱିତୀୟ ସର୍ଭେରେ ଚିହ୍ନଟ ବ୍ୟକ୍ତିମାନଙ୍କୁ ସହାୟତା ଯୋଗାଇଦେବାକୁ ଦୃଷ୍ଟି ନ ଦେଲେ ୨୬ ତାରିଖରେ ଧାରଣା ଦେବାକୁ ଘୋଷଣା କରିଥିଲେ। ଇତିମଧ୍ୟରେ ସହାୟତା ମିଳି ନାହିଁ। ଯାହାକୁ ନେଇ ୩ ପଞ୍ଚାୟତର ଲୋକେ ପହଞ୍ଚି ତହସିଲଦାରଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି।