ନାଉଗଁ।, ୨୨।୨ (ସ୍ବ.ପ୍ର.): ନାଉଗଁ। ବ୍ଲକ ଅଧୀନ ତିରୁଣା ସେବା ସମବାୟ ସମିତିରେ ଧାନ ଦେବା ସମୟରେ ଚାଷୀମାନଙ୍କୁ ଦୁର୍ବ୍ୟବହାର କରାଯିବା ସହ କୁଇଣ୍ଟାଲ ପିଛା ୨ କି.ଗ୍ରା. ଲେଖାଏ ଧାନ କାଟି ଦିଆଯାଉଛି। ଏ ନେଇ ଜାମୁଗଁ। ପଞ୍ଚାୟତ ନନ୍ଦିଗ୍ରାମର ଚାଷୀ ଦିଲୀପ ପାଢ଼ୀ ଗୁରୁବାର ଜିଲାପାଳଙ୍କୁ ଭେଟି ଲିଖିତ ଅଭିଯୋଗ ପତ୍ର ପ୍ରଦାନ କରିଛନ୍ତି। ଅଭିଯୋଗ ମୁତାବକ, ମଣ୍ଡିରେ ଧାନ ଦେବା ପାଇଁ ଦିଲୀପ ସୋସାଇଟିରେ ନାମ ପଞ୍ଜୀକୃତ କରାଇଥିଲେ। ସେହି ତାଲିକା ଅନୁସାରେ ଗତ ୧୮ ଫେବୃୟାରୀରେ ସେ ମଣ୍ଡିରେ ଧାନ ଦେବାକୁ ଯାଇଥିଲେ। ତାଙ୍କଠାରୁ ମିଲର ୪୬ କୁଇଣ୍ଟାଲ ୬୩ କି.ଗ୍ରା. ଧାନ ନେଇଥିଲେ, କିନ୍ତୁ ୪୫ କୁଇଣ୍ଟାାଲ ୭୦ କିଗ୍ରାର ଟୋକନ ପ୍ରଦାନ କରିଥିଲେ। ଏ ନେଇ ସେ ସୋସାଇଟି ସମ୍ପାଦକଙ୍କୁ ପଚାରିବାରୁ ପ୍ରତି କୁଇଣ୍ଟାଲ ପିଛା ୨ କି.ଗ୍ରା. ଲେଖାଏ ଧାନ କଟା ଯାଇଥିବା କହିଥିଲେ। ମିଲରର ଗାଡ଼ିକୁ ଧାନ ଉଠାଇବା ବାବଦକୁ ତାଙ୍କୁ ୫ ଶହ ଟଙ୍କା ମଗାଯାଇଥିଲା। ମାତ୍ର ସେ ଏହାର ପ୍ରତିବାଦ କରିବାରୁ ମିଲରଙ୍କ ଏଜେଣ୍ଟ ତାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ। ଉକ୍ତ ମଣ୍ଡିରେ ଧାନ ଦେଉଥିବା ସମସ୍ତ ଚାଷୀ ଶୋଷଣର ଶିକାର ହେଉଛନ୍ତି ବୋଲି ଦିଲୀପ ଅଭିଯୋଗ ପତ୍ରରେ ଦର୍ଶାଇଛନ୍ତି।ଏ ବିଷୟରେ ଜିଲା ଯୋଗାଣ ଅଧିକାରୀଙ୍କ ଦୃଷ୍ଟିଆକର୍ଷଣ କରାଯାଇଥିଲେ ମଧ୍ୟ କିଛି ସୁଫଳ ମିଳୁନି। ତେଣୁ ଉକ୍ତ ସୋସାଇଟିରେ ହେଉଥିବା ଅନିୟମିତତାର ତଦନ୍ତ କରାଯାଇ ସମ୍ପୃକ୍ତ କର୍ମଚାରୀ ଓ ମିଲରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦିଲୀପ ଦାବି କରିଛନ୍ତି। ଏ ନେଇ ଜିଲା ଯୋଗାଣ ନିରୀକ୍ଷକଙ୍କୁ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ବି ତାହା ସମ୍ଭବ ହୋଇପାରିନାହିଁ।