ଅନୁଗୋଳ ଅଫିସ/ବଅଁରପାଳ,୩।୧ – ଅନୁଗୋଳ ଜିଲା ବଅଁରପାଳ ଥାନା ତଳମୂଳ ଉଚ୍ଚ ବିଦ୍ୟାଳୟ ନିକଟରେ ବୁଧବାର ବିଳମ୍ବିତ ରାତିରେ ତୀର୍ଥଯାତ୍ରୀଙ୍କଠାରୁ ଲୁଟ୍ ଉଦ୍ୟମ ପଣ୍ଡ ହୋଇଛି। ଜଣେ ଯୁବକଙ୍କ ଉପସ୍ଥିତ ବୁଦ୍ଧି ଯୋଗୁ ୩ ଦୁର୍ବୃତ୍ତଙ୍କୁ ତୀର୍ଥଯାତ୍ରୀମାନେ କାବୁ କରି ପୋଲିସ ଜିମା ଦେଇଛନ୍ତି। ପରେ ପୋଲିସ ସେମାନଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫମାନେ ହେଲେ ଢେଙ୍କାନାଳ ଜିଲା କଣ୍ଟାବଣିଆ ଥାନା ନୂଆଗାଁ ଅଞ୍ଚଳର ଶର୍ମା ନନ୍ଦ ଗଡ଼ନାୟକ(୩୨), ବଅଁରପାଳ ଥାନା ଗଡ଼ତଳମୂଳ ଅଞ୍ଚଳର ପ୍ରକାଶ ପଟ୍ଟନାୟକ(୨୬) ଓ ସୁବାସ ଭୋଇ(୨୪)। ସେମାନଙ୍କ ନିକଟରୁ ୩ଟି ବାଇକ, ଗୋଟିଏ ଦେଶୀ ବନ୍ଧୁକ, ୩ ଜୀବନ୍ତ ଗୁଳି, ଗୋଟିଏ ସୁନାର ହନୁମାନ ଲକେଟ୍ ଓ ୪ଟି ମୋବାଇଲ ଜବତ କରାଯାଇଥିବା ବଅଁରପାଳ ଥାନା ଅଧିକାରୀ ସୁନୀଲ କୁମାର କର ସୂଚନା ଦେଇଛନ୍ତି।
ପୋଲିସ କହିଛି, ଢେଙ୍କାନାଳ ଜିଲା ପରଜଙ୍ଗ ଥାନା ସରାଙ୍ଗ ଗ୍ରାମର ୧୫ରୁ ଊର୍ଦ୍ଧ୍ୱ ତୀର୍ଥଯାତ୍ରୀ ପୁରୀ ଓ ତାରା ତାରିଣୀରୁ ତୀର୍ଥ ସାରି ୨ଟି ବୋଲେରୋରେ ଫେରୁଥିବାବେଳେ ତଳମୂଳଠାରେ ସମ୍ପୃକ୍ତ ଅଭିଯୁକ୍ତମାନେ ସେମାନଙ୍କୁ ଅଟକାଇ ଥିଲେ। ପରେ ବନ୍ଧୁକ ଦେଖାଇ ଭୟଭୀତ କରାଇଥିଲେ। ସେହି ସମୟରେ ଉକ୍ତ ଗାଡ଼ିରେ ଥିବା ଜଣେ ଯୁବକ ସାହସ କରି ଅନୁଗୋଳ ପୋଲିସ କଣ୍ଟ୍ରୋଲ ରୁମ୍କୁ ଫୋନ୍ କରିବା ସହ ଜଣେ ଦୁର୍ବୃତ୍ତ ପିନ୍ଧିଥିବା ହେଲମେଟକୁ ମୁଥ ମାରିଥିଲେ। ଫଳରେ ଦୁର୍ବୃତ୍ତ ଜଣକ ତଳେ ପଡ଼ିଯାଇଥିଲେ। ପରେ ଅନ୍ୟ ୨ ଦୁର୍ବୃତ୍ତଙ୍କୁ ତୀର୍ଥଯାତ୍ରୀମାନେ କାବୁ କରିନେଇଥିଲେ। ତଳେ ପଡ଼ିଯାଇଥିବା ଦୁର୍ବୃତ୍ତ ଜଣଙ୍କ କୌଶଳକ୍ରମେ ସେଠାରୁ ଖସି ପଳାଇଥିଲେ। ପରେ ମହୀଧରପୁର ଫାଣ୍ଡି ଓ ବଅଁରପାଳ ଥାନା ପୋଲିସ ପହଞ୍ଚତ୍ ଧରାପଡ଼ିଥିବା ୨ଜଣଙ୍କ ସହ ଖସି ପଳାଇଥିବା ଦୁର୍ବୃତ୍ତଙ୍କୁ କାବୁ କରିଥିଲେ। ଏ ନେଇ ପୋଲିସ ନଂ. ୨/୨୦୨୦ରେ ଏକ ମାମଲା ରୁଜୁ କରି ଗିରଫ ଦୁର୍ବୃତ୍ତଙ୍କୁ କୋର୍ଟ ଚାଲାଣ କରିଛି।
