ନୂଆଦିଲ୍ଲୀ,୧୬।୨: ଦିଲ୍ଲୀର ମୁଖ୍ୟମନ୍ତ୍ରୀ ଭାବେ ତୃତୀୟଥର ଲାଗି ରବିବାର ଶପଥ ନେଇଛନ୍ତି ଆମ ଆଦମୀ ପାର୍ଟି(ଏଏପି) ମୁଖ୍ୟ ଅରବିନ୍ଦ କେଜରିଓ୍ବାଲ। ଉପରାଜ୍ୟପାଳ ଅନିଲ ବେଜଲ ତାଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି। ରାମଲୀଳା ମଇଦାନରେ ଆୟୋଜିତ ଶପଥ ଗ୍ରହଣ ସମାରୋହରେ କେଜରିଓ୍ବାଲଙ୍କ ସମେତ ତାଙ୍କର ପୂରୁଣା ମନ୍ତ୍ରିମଣ୍ଡଳର କେତେଜଣ ସଦସ୍ୟ ଶପଥପାଠ କରିଛନ୍ତି। ଏହି ସମାରୋହରେ କୌଣସି ରାଜ୍ୟର ମୁଖ୍ୟମନ୍ତ୍ରୀ ଅବା ନେତା ନୁହେଁ ବରଂ ସାଧାରଣ ଜନତାଙ୍କୁ ଦେଖିବାକୁ ମିଳିଥିଲା। ମଞ୍ଚ ଉପରେ ଏମିତି ୫୦ ଜଣ ନାୟକଙ୍କୁ ଦେଖିବାକୁ ମିଳିଥିଲା ଯେଉଁମାନେ ନିଜ ଇଚ୍ଛାଶକ୍ତି ବଳରେ ଦିଲ୍ଲୀର ରୂପ ବଦଳାଇବାକୁ ଚେଷ୍ଟା କରିଛନ୍ତି। ଏମାନେ ସମସ୍ତେ ସାଧାରଣ ଜନତା ହୋଇଥିବା ବେଳେ ଏମାନଙ୍କ ମଧ୍ୟରେ ରହିଛନ୍ତି କେତେଜଣ ଶିକ୍ଷାବିତ୍, ବସ୍ ମାର୍ଶାଲ ତ ଆଉ କେତେଜଣ ସଡ଼କ ଦୁର୍ଘଟଣାରେ ଶିକାର ଲୋକଙ୍କ ଚିକିତ୍ସା କରୁଥିବା ବ୍ୟକ୍ତି। ଏହି ଶପଥ ଗ୍ରହଣ ସମାରୋହରେ କେବଳ ଦିଲ୍ଲୀର ସାଧାରଣ ଜନତାକୁ ନିମନ୍ତ୍ରଣ କରାଯାଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କେଜରିଓ୍ବାଲ ନିମନ୍ତ୍ରଣ ଜଣାଇଥିଲେ ମଧ୍ୟ ସେ ବାରାଣସୀ ଗସ୍ତ କରିଥିବାରୁ ଏହି ସମାରୋହରେ ଯୋଗ ଦେଇ ପାରି ନାହାନ୍ତି।