କଣିହାଁ, ୨୫ା୨(ଡି.ଏନ.ଏ.): ଅନୁଗୋଳ ଜିଲା କଣିହାଁ ବ୍ଲକର ବିଜିଗୋଳ ପଞ୍ଚାୟତ ହାଇସ୍କୁଲରେ ସୋମବାର ତୃତୀୟ ଦିନ ମାଟ୍ରିକ ପରୀକ୍ଷା ଅନୁଷ୍ଠିତ ହୋଇଯାଇଛି। ତୃତୀୟ ଭାଷା ପରୀକ୍ଷାରେ ମୋଟ ୭୬ ଛାତ୍ରୀଛାତ୍ର ଅନୁପସ୍ଥିତ ଥିବା ଜଣାପଡିଛି। ସେହିପରି କପି କରି ୨ ଜଣ ସେଣ୍ଟ୍ରାଲ ସ୍କ୍ବାଡ ହାତରେ ଧରାପଡିଛନ୍ତି। କଣିହାଁ ନୋଡାଲ କେନ୍ଦ୍ର ସୂଚନାରୁ ଜଣାଯାଏ, ବିଜିଗୋଳ ପରୀକ୍ଷା କେନ୍ଦ୍ରରେ ୨ଟି ସିଟିଂରେ ମାଟ୍ରିକ ପରୀକ୍ଷା ହୋଇଛି। ପ୍ରଥମ ସିଟିଂରେ ରେଗୁଲାର ଓ କରେସପଣ୍ଡେସ ପରୀକ୍ଷାର୍ଥୀ ୨୩୨ ଜଣଙ୍କ ମଧ୍ୟରୁ ସୋମବାର ୩୪ ଜଣ ଅନୁପସ୍ଥିତ ଥିଲେ। ପ୍ରଥମ ଦିନରେ ୧୨ ଜଣ ଅନୁପସ୍ଥିତ ଥିବାବେଳେ ଏବେ ଅଧିକ ଛାତ୍ରୀଛାତ୍ର ପରୀକ୍ଷା ନ ଦେବାକୁ ନେଇ ବିଭିନ୍ନ ଚର୍ଚ୍ଚା ହେଉଛି। ସେହିପରି ସେକେଣ୍ଡ ସିଟିଂରେ ରାଜ୍ୟ ମୁକ୍ତ ବିଦ୍ୟାଳୟ ପରୀକ୍ଷାର୍ଥୀ ୧୭୨ ଜଣଙ୍କ ମଧ୍ୟରୁ ୪୨ ଜଣ ଅନୁପସ୍ଥିତ ଥିଲେ। ଅନ୍ୟପକ୍ଷରେ ଏହି ପରୀକ୍ଷାକେନ୍ଦ୍ରରେ ସିସିଟିଭି ଲଗା ନ ଯିବାକୁ ନେଇ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏ ସମ୍ପର୍କରେ କଣିହାଁ ବ୍ଲକ ଶିକ୍ଷାଧିକାରୀ ଖଗେଶ୍ୱର ବେହେରାଙ୍କ ସହ ଯୋଗାଯୋଗ ନ ହେବାରୁ ମତାମତ ମିଳିପାରି ନାହିଁ।