ବେଙ୍ଗାଲୁରୁ,୧୯।୯ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ନେଇ ସ୍ବଦେଶୀ ଜ୍ଞାନକୌଶଳରେ ନିର୍ମିତ ଯୁଦ୍ଧ ବିମାନ ତେଜସ୍ ଗୁରୁବାର ଉଡ଼ାଣ କରିଛି। ବେଙ୍ଗାଲୁରୁର ହିନ୍ଦୁସ୍ତାନ ଏରୋନୋଟିକ୍ସ୍ ଲିମିଟେଡ୍ ବିମାନ ବନ୍ଦରରୁ ଏହା ଉଡ଼ାଣ ଆରମ୍ଭ କରିଛି। ରାଜନାଥ ଏଥିରେ ଅଧଘଣ୍ଟା ପର୍ଯ୍ୟନ୍ତ ଉଡ଼ାଣ କରିଛନ୍ତି। ତାଙ୍କ ସହିତ ଏୟାର ଭାଇସ୍ ମାର୍ଶଲ ଏନ୍.ତିଓ୍ବାରୀ ଜେତସ୍ରେ ଉଡ଼ାଣ କରିଛନ୍ତି। ୩ ବର୍ଷ ତଳେ ଏହା ଭାରତୀୟ ବାୟୁସେନାରେ ସାମିଲ୍ ହୋଇଥିଲା। ୨୦୦୧ ଜାନୁୟାରୀ ୪ରେ ଏହି ଯୁଦ୍ଧ ବିମାନ ପ୍ରଥମ ଉଡ଼ାଣ କରିଥିଲା। ହିନ୍ଦୁସ୍ତାନ ଏରୋନୋଟିକ୍ସ୍ ଲିମିଟେଡ୍ ଦ୍ୱାରା ଏହାକୁ ନିର୍ମାଣ କରାଯାଇଛି। ୮୩ ତେଜସ୍ ବିମାନ ନିର୍ମାଣ ପାଇଁ ହିନ୍ଦୁସ୍ତାନ ଏରୋନୋଟିକ୍ସ୍ ଲିମିଟେଡ୍ ସହିତ ୪୫ ହଜାର କୋଟି ଟଙ୍କାର ଚୁକ୍ତି ହୋଇଛି। ତେଜସ୍ ପାକିସ୍ତାନ-ଚାଇନାର ଥଣ୍ଡରବାର୍ଡ ଯୁଦ୍ଧ ବିମାନଠାରୁ ବେଶ୍ ଶକ୍ତିଶାଳୀ। ତେଣୁ ଏହାକୁ ନେଇ ପାକିସ୍ତାନ-ଚାଇନାର ଚିନ୍ତା ବଢ଼ିବାରେ ଲାଗିଛି। ସୂଚନାଯୋଗ୍ୟ, ବାୟୁସେନା ଦ୍ୱାରା ବ୍ୟବହୃତ ହେଉଥିବା ମିଗ୍-୨୧ ଏବେ ପୁରୁଣା ହୋଇଯାଇଛି। ଏହା ଯୋଗୁ ଇତିମଧ୍ୟରେ ୪୩ ଯବାନ ଶହୀଦ୍ ହୋଇ ସାରିଛନ୍ତି। ଗତ ୪୫ ବର୍ଷ ମଧ୍ୟରେ ୪ ଶହ ୬୫ ମିଗ୍ ବିମାନ ଦୁର୍ଘଟଣା ଗ୍ରସ୍ତ ହୋଇଛି। ସେହିପରି ଯୁଦ୍ଧ କ୍ଷେତ୍ରରେ ୧୧ ମିଗ୍ ବିମାନ ଧ୍ୱଂସ ହୋଇଛି। ଦେଶର ଆବଶ୍ୟକତାକୁ ଦୃଷ୍ଟିରେ ରଖି ନୂଆ ଯୁଦ୍ଧ ବିମାନ ଲାଗି ଉଦ୍ୟମ ୧୯୮୦ରୁ ଆରମ୍ଭ ହୋଇଥିଲା।
