ନୂଆଦିଲ୍ଲୀ/କୋଲକାତା/ ଓ୍ବାଶିଂଟନ,୨୮ା୧: ନାଗରିକତ୍ୱ ସଂଶୋଧନ ଆଇନ (ସିଏଏ) ବିରୋଧରେ ଆନ୍ଦୋଳନ ଥମିବାର ନାଁ ନେଉନାହିଁ। ଗୋଟିଏ ପରେ ଗୋଟିଏ ରାଜ୍ୟ ବିଧାନସଭାରେ ସିଏଏ ବିରୋଧୀ ସଂକଳ୍ପନାମା ଗୃହୀତ ହେବାରେ ଲାଗିଛି। କେରଳ, ପଞ୍ଜାବ, ରାଜସ୍ଥାନ ପରେ ସୋମବାର ପଶ୍ଚିମବଙ୍ଗ ବିଧାନସଭାରେ ସଂକଳ୍ପନାମା ଗୃହୀତ ହୋଇଛି। ସିଏଏ ସହିତ ଏନ୍ପିଆର୍ ଏବଂ ପ୍ରସ୍ତାବିତ ଏନ୍ଆର୍ସି ଜଡ଼ିତ ରହିଥିବାରୁ ତାହାର ପ୍ରତ୍ୟାହାର ପାଇଁ ଦାବି ହୋଇଛି। ସିଏଏ ଦେଶର ସମ୍ବିଧାନ ଓ ମାନବିକତା ବିରୋଧୀ ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିବା ସହ ସରକାର ଏହାକୁ ରଦ୍ଦ କରନ୍ତୁ ବୋଲି ଦାବି କରିଛନ୍ତି। ରାଜ୍ୟ ବିଧାନସଭାରେ ସରକାରଙ୍କ ତରଫରୁ ଅଣାଯାଇଥିବା ସଂକଳ୍ପନାମାକୁ ବିରୋଧୀ ଦଳ କଂଗ୍ରେସ ଏବଂ ସିପିଏମ୍ ନେତୃତ୍ୱାଧୀନ ବାମ ସାମ୍ମୁଖ୍ୟ ସମର୍ଥନ ଜଣାଇଛି। ଗତବର୍ଷ ସେପ୍ଟେମ୍ବରରେ ପଶ୍ଚିମବଙ୍ଗ ବିଧାନସଭା ଏନ୍ଆର୍ସି ବିରୋଧରେ ସଂକଳ୍ପନାମା ଗୃହୀତ କରାଇଥିଲା।
ସିଏଏକୁ କେବଳ ବିରୋଧୀ ରାଜନୈତିକ ଦଳଗୁଡ଼ିକ ବିରୋଧ କରୁନାହାନ୍ତି, ବିଭିନ୍ନ ସଂଗଠନ ଏହାର ପ୍ରତିବାଦ କରୁଛନ୍ତି। ମାସେରୁ ଊର୍ଦ୍ଧ୍ୱ ସମୟ ଧରି ଏହି ବିକ୍ଷୋଭ ଲାଗି ରହିଥିବାବେଳେ ବିଭିନ୍ନ ସ୍ଥାନରେ ହିଂସାତ୍ମକ ରୂପ ନେଇଥିଲା। ଏବେ ଏହି ପ୍ରସଙ୍ଗ ଅନ୍ତର୍ଜାତୀୟ ସ୍ତରରେ ପହଞ୍ଚତ୍ଲାଣି। ୟୁରୋପୀୟ ପାର୍ଲାମେଣ୍ଟରେ ସିଏଏ ଏବଂ କଶ୍ମୀର ପ୍ରସଙ୍ଗକୁ ନେଇ ୬ଟି ପ୍ରସ୍ତାବ ଅଣାଯାଇଛି। ୟୁରୋପୀୟ ସଂଘ (ଇୟୁ) ପାର୍ଲାମେଣ୍ଟର ମୋଟ ୭୫୧ ସଦସ୍ୟଙ୍କ ମଧ୍ୟରୁ ୬୨୬ ଜଣ ସିଏଏ ଏବଂ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ବିରୋଧରେ ୬ଟି ସଂକଳ୍ପନାମା ଆଣିଛନ୍ତି। କେତେକ ପ୍ରସ୍ତାବରେ ଆସାମରେ ଲାଗୁ ହୋଇଥିବା ଏନ୍ଆର୍ସିକୁ ମଧ୍ୟ ବିରୋଧ କରାଯାଇଛି। ଇୟୁ ପାର୍ଲାମେଣ୍ଟରେ ୨୯ରେ ଏହା ଉପରେ ଆଲୋଚନା ହୋଇ ୩୦ରେ ଭୋଟ ନିଆଯିବ। ମାର୍ଚ୍ଚରେ ଭାରତ-ଇୟୁ ସମିଟ୍ରେ ଯୋଗଦେବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବ୍ରସେଲ୍ସ ଗସ୍ତରେ ଯିବାକୁ ଥିବାବେଳେ ଏହା ପୂର୍ବରୁ ଇୟୁ ପାର୍ଲାମେଣ୍ଟରେ ପ୍ରସ୍ତାବ ଅଣାଯିବା ଭାରତ ପାଇଁ ବଡ଼ କୂଟନୈତିକ ଝଟ୍କା ହୋଇଛି। ଏହା ଉପରେ ପ୍ରତିକ୍ରିୟା ଦେଇ କେନ୍ଦ୍ର ସରକାର କହିଛନ୍ତି, ସିଏଏ ଭାରତର ସମ୍ପୂର୍ଣ୍ଣ ଆଭ୍ୟନ୍ତରୀଣ ବ୍ୟାପାର। ପାର୍ଲାମେଣ୍ଟର ଉଭୟ ଗୃହରେ ପର୍ଯ୍ୟାପ୍ତ ଆଲୋଚନା ପରେ ଗଣତାନ୍ତ୍ରିକ ଉପାୟରେ ଓ ଉପଯୁକ୍ତ ପ୍ରକ୍ରିୟାରେ ଏହା ଗୃହୀତ ହୋଇଛି। ଇୟୁ ଏହାକୁ ବିରୋଧ କରିବା ଅନୁଚିତ ବୋଲି ଲୋକ ସଭା ବାଚସ୍ପତି ଓମ୍ ବିର୍ଲା କହିଛନ୍ତି।
ଆମେରିକାରେ ଭାରତର ୭୧ତମ ସାଧାରଣତନ୍ତ୍ର ଦିବସ ପାଳନ ସହିତ ସିଏଏ ବିରୋଧରେ ଶାନ୍ତିପୂର୍ଣ୍ଣ ବିକ୍ଷୋଭ ଶୋଭାଯାତ୍ରା ଆୟୋଜନ ହୋଇଯାଇଛି। ଆମେରିକାର ବିଭିନ୍ନ ସହରରୁ ବହୁସଂଖ୍ୟାରେ ଭାରତୀୟ-ଆମେରିକୀୟମାନେ ଏହି ଶୋଭାଯାତ୍ରାରେ ଅଂଶଗ୍ରହଣ କରିଥିଲେ। ତେବେ ସେଠାରେ ଅନ୍ୟ କେତେଜଣ ଭାରତୀୟ-ଆମେରିକୀୟ ସିଏଏକୁ ସମର୍ଥନ କରିଥିଲେ।