ରାୟଗଡ଼ା ଅଫିସ,୨୦ା୫: ତେଲଙ୍ଗାନା ରାଜ୍ୟକୁ ରୋଜଗାର କରିବା ପାଇଁ ଓଡ଼ିଶାର ଗଜପତି, ରାୟଗଡ଼ା,କୋରାପୁଟ, ନବରଙ୍ଗପୁର,କନ୍ଧମାଳ ଓ ମାଲକାନଗିରି ଜିଲାର କିଛି ଲୋକ ଯାଇଥିଲେ। କରୋନା ପାଇଁ ଲକ୍ଡାଉନ ହେବାରୁ ବିଭନ୍ନ ସମସ୍ୟାର ସମ୍ମୁଖୀନ ହୋଇଥିଲେ। ଫଳରେ ସେଠାରୁ ସତନ୍ତ୍ର ଟ୍ରେନ୍ ଯୋଗେ ବୁଧବାର ସେମାନେ ରାୟଗଡ଼ାରେ ପହଞ୍ଚିଛନ୍ତି। ଗଜପତିର ୪୦, ରାୟଗଡ଼ାର ୧୫,କୋରାପୁଟ ୨୪, ନବରଙ୍ଗପୁରର ୩୧, କନ୍ଧମାଳର ୭ଜଣ ଓ ମାଲକାନଗିରି ଜିଲାର ୪୩ଜଣ ମିଶି ସର୍ବମୋଟ ୧୬୦ଜଣ ଶ୍ରମିକ ଆଜି ରାୟଗଡ଼ାରେ ପହଞ୍ଚିଛନ୍ତି। ସେହି ପ୍ରବାସୀ ଶ୍ରମିକମାନଙ୍କୁ ରାୟଗଡ଼ା ଜିଲାପାଳ ପ୍ରମୋଦ କୁମାର ବେହେରା, ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା, ପିଡିଡିଆରଡିଏ ଅମିତ ଋତୁରାଜ, ଗୁଣପୁର ଉପଜିଲାପାଳ ବିଏସ୍ ବଳରାମ, ଉପଜିଲାପାଳ ରାୟଗଡ଼ା ପ୍ରତାପ ଚନ୍ଦ୍ର ପ୍ରଧାନ ପ୍ରମୁଖ ଉପସ୍ଥିତ ରହି ସ୍ବାଗତ କରିଥିଲେ। ଅନ୍ୟରାଜ୍ୟରୁ ଆସି ରାୟଗଡ଼ାର ବିଭିନ୍ନ ଅଭ୍ୟର୍ଥନା କେନ୍ଦ୍ରରେ ରହିଥିବା ବଲାଙ୍ଗୀର ଓ ନୂଆପଡ଼ା ଶ୍ରମିକମାନଙ୍କୁ ନିଜ ନିଜ ଜିଲାକୁ ୧୩ଟି ବସ୍ରେ ପଠାଯାଇଥିଲା। ବଲାଙ୍ଗୀରକୁ ୧୨ଟି ବସ୍ ଓ ନୂଆପଡ଼ାକୁ ଗୋଟିଏ ବସ୍ରେ ପ୍ରବାସୀମାନଙ୍କୁ ପଠାଯାଇଛି।