ଭୁବନେଶ୍ୱର,୯ା୪(ବ୍ୟୁରୋ): ସତ୍ୟନଗରରେ ୪ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ ଜଣେ ନିୟମିତ ଭାବେ ତୋଷାଳି ଭବନ ନିକଟରେ ଥିବା ଓମ୍ଫେଡ୍ ପାର୍ଲରକୁ ଯାଇଥିବା ବିଏମ୍ସି ଜାଣିବାକୁ ପାଇଛି। ଏଥିପାଇଁ ଯେଉଁମାନେ ବି ଉକ୍ତ ଓମ୍ଫେଡ୍ ପାର୍ଲରକୁ ଗତ ୧୪ଦିନ ମଧ୍ୟରେ ଯାଇଛନ୍ତି ସେମାନେ ୧୦୪କୁ ଫୋନ୍ କରି ନିଜ ନାମ ପଞ୍ଜୀକରଣ କରିବାକୁ ବିଏମ୍ସି ଅନୁରୋଧ କରିଛି। ସୂଚନାଯୋଗ୍ୟ, ଲକ୍ଡାଉନ୍ରେ ଓମ୍ଫେଡ୍ ପାର୍ଲର ଖୋଲା ରଖିବାକୁ ନିର୍ଦ୍ଦେଶ ରହିଛି। ଅନ୍ୟ ଦୋକାଗୁଡିକ ବନ୍ଦ ଥିବାରୁ ସେଠାକୁ ପ୍ରତିଦିନ ବହୁ ଲୋକ ଯାଇଥାନ୍ତି। ତେଣୁ ଶତାଧିକ ଲୋକ ଆକ୍ରାନ୍ତଙ୍କ ସିଧାସଳଖ କିମ୍ବା ପରୋକ୍ଷ ସଂସ୍ପର୍ଶରେ ଆସିଥିବା ଅନୁମାନ କରାଯାଉଛି।