ପାରାଦୀପ, ୨୪।୧ (ସ୍ବ.ପ୍ର.):ତ୍ରିକୋଣୀୟ ପ୍ରେମ ସମ୍ପର୍କ ଯୋଗୁ ପାରାଦୀପ ମଡେଲ ଥାନା ଅଧୀନ ନୂଆବଜାର ମଣିମନ୍ଦିର ପାଖ ବସ୍ତିର ଶରତ ଜେନାଙ୍କୁ ହତ୍ୟା ଘଟଣାରେ ପୋଲିସ ଅଭିଯୁକ୍ତ ଇମା ଉଦ୍ଦିନଙ୍କୁ ଗୁରୁବାର କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ତାଙ୍କୁ କୁଜଙ୍ଗ ଜେଲ୍କୁ ପଠାଇ ଦିଆଯାଇଥିବା ବେଳେ ପୋଲିସ ଇମା ଉଦ୍ଦିନଙ୍କୁ ରିମାଣ୍ଡରେ ଆଣି ଜେରା କରିବ ବୋଲି ଏଏସ୍ପି ବିଷ୍ଣୁଚରଣ ମିଶ୍ର ଥାନାଧିକାରୀ ରଜନୀକାନ୍ତ ସାମଲ ଗୁରୁବାର ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ସୂଚନା ଅନୁସାରେ, ଶରତ ଗତ ୧୮ ତାରିଖରୁ ନିଖୋଜ ଥିବା ନେଇ ତାଙ୍କ ମା’୧୯ ତାରିଖରେ ଥାନାରେ ଅଭିଯୋଗ କରିଥିଲେ। ଶରତଙ୍କ ମୋବାଇଲ୍ ଟ୍ରାକ୍ କରିବା ଓ କଲ୍ ରେକର୍ଡ ଯାଞ୍ଚ କରିବା ପରେ ପୋଲିସ ତାଙ୍କ ବନ୍ଧୁ ତଥା ହତ୍ୟା ଅଭିଯୁକ୍ତ ଇମା ଉଦ୍ଦିନଙ୍କୁ ଗିରଫ କରିଥିଲା। ତେବେ ଇମା ଉଦ୍ଦିନଙ୍କୁ ଜେରା କରିବା ବେଳେ ସେ ଶରତଙ୍କୁ ହତ୍ୟା କରିଥିବା କହିଥିଲେ। ତ୍ରିକୋଣୀୟ ପ୍ରେମ ସମ୍ପର୍କ ଯୋଗୁ ଇମା ଉଦ୍ଦିନ ହତ୍ୟା ଯୋଜନା କରିବା ସହ ଗତ ୧୮ ତାରିଖ ରାତିରେ ଶରତଙ୍କୁ ଫୋନ୍ କରି ଡକାଇଥିଲେ। ଉଭୟେ ଏକ କାର୍ (ନଂ.-ଓଡି୦୫ଏକେ ୭୫୨୫)ରେ ଏକାଠି ବସି ମଦ ପିଇଥିଲେ। ଏହାପରେ ଇମା ଉଦ୍ଦିନ କାର୍ ଭିତରେ ଶରତଙ୍କ ଗୋଡ ବାନ୍ଧି ଚୌଦ୍ୱାର ଥାନା ଅଧୀନ ୫୫ ନଂ. ଜାତୀୟ ରାଜପଥ କଡ଼ରେଥିବା ଶିମିଳିହାଣ୍ଡ ଗ୍ରାମର ଏକ ନିର୍ଜନ ସ୍ଥାନକୁ ନେଇଯାଇଥିଲେ। ସେଠାରେ ତାଙ୍କ ମୁଣ୍ଡକୁ ପଥରରେ ଛେଚି ହତ୍ୟା କରିବା ପରେ ଦଳଭର୍ତ୍ତି ପୋଖରୀରେ ମୃତଦେହ ଫୋପାଡ଼ି ଦେଇଥିଲେ। ଏହାପରେ ଫେରିବା ବେଳେ ଶରତଙ୍କ ମୋବାଇଲ ଓ ଗାମୁଛାକୁ ମହାନଦୀରେ ଫୋପାଡ଼ି ଦେଇଥିଲେ ବୋଲି ଇମା ଉଦ୍ଦିନ ବୟାନ ଦେଇଥିବା ପୋଲିସ କହିଛି। ଏ ନେଇ ୧୨/୨୦ ନଂ.ରେ ଏକ ମାମଲା ରୁଜୁ ହୋଇଛି। ଚୌଦ୍ୱାର ପୋଲିସ, ସାଇଣ୍ଟିଫିକ୍ ଟିମ୍ ଓ କଟକ ଜିଲାର ଜଣେ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ମୃତଦେହ ଜବତ ଓ ବ୍ୟବଚ୍ଛେଦ କରାଯାଇଛି। ହତ୍ୟାକାଣ୍ଡରେ ବ୍ୟବହୃତ କାରକୁ ପୋଲିସ ଜବତ କରିଛି। ତେବେ ଏହି ଘଟଣାରେ ଆଉ କେହି ସମ୍ପୃକ୍ତ ଅଛନ୍ତି କି ନାହିଁ ସେ ନେଇ ପୋଲିସ ତଦନ୍ତ ଚଳାଇଛି।
ସୂଚନାଯୋଗ୍ୟ, ଗତ ୨୨ ତାରିଖରେ ଶରତଙ୍କ ବଡ଼ଭାଇ ରଜତ କୁମାର ଜେନା ଥାନାରେ ଅପହରଣ ଓ ହତ୍ୟା ଅଭିଯୋଗ କରିଛନ୍ତି।