ଅଗରାତାଲା,୨୬।୫: ତ୍ରିପୁରାରେ ଗତ ୩ ଦିନ ଧରି ବାଦଲ ଫଟା ବର୍ଷା ଲାଗି ରହିଛି। କେତେକ ଅଞ୍ଚଳରେ ବର୍ଷାଜଳ ଜମି ରହିବାରୁ ୭ଶହ ଲୋକ ବାସ ହରାଇ ବେଘର ହୋଇଥିବା ପ୍ରଶାସନ ପକ୍ଷରୁ କୁହାଯାଇଛି। ଗତ ଶୁକ୍ରବାରଠାରୁ ଏଠାରେ ବର୍ଷା ଲାଗି ରହିଛି। ଏହାଦ୍ୱାରା ଉତ୍ତର ତ୍ରିପୁରା, ଉନାକୋଟି ଏବଂ ଧାଲାଇ ଜିଲାରେ ଅଧିକ କ୍ଷୟକ୍ଷତି ହୋଇଛି। ପୀଡିତଙ୍କୁ ଉଦ୍ଧାର କରି ଅସ୍ଥାୟୀ ଆଶ୍ରୟସ୍ଥଳରେ ରକାଯାଇଥିବା ରାଜ୍ୟ ବିପର୍ଯ୍ୟୟ ପରିଚାଳନା ବିଭାଗ ଅଧିକାରୀ ଶରତ ଦାସ ସୂଚନା ଦେଇଛନ୍ତି। ଯୁଦ୍ଧକାଳୀନ ଭିତ୍ତିରେ ଉଦ୍ଧାର ଏବଂ ଥଇଥାନ କାର୍ଯ୍ୟ ଜାରି ରହିଥିବା ସେ କହିଛନ୍ତି। ମୋଟ ୭୩୯ ଲୋକଙ୍କୁ ବିଭିନ୍ନ ଆଶ୍ରୟସ୍ଥଳରେ ରଖାଯାଇଛି। ସେମାନଙ୍କ ମଧ୍ୟରୁ ଉନାକୋଟି ଜିଲାର ୩୫୮ ଜଣଥିବାବେଳେ ଉତ୍ତର ତ୍ରିପୁରାର ୩୮୧ ଜଣ ଅଛନ୍ତି। ପ୍ରବଳ ବର୍ଷାରେ ଏକ ହଜାର ୩୯ଟି ବାସ ଗୃହ ଭାଙ୍ଗି ଯାଇଥିବା ରାଜ୍ୟ ପ୍ରଶାସନ କହିଛି। ଉଦ୍ଧାର କାର୍ଯ୍ୟରେ ୪୦ଟି ବୋଟ୍କୁ ନିୟୋଜିତ କରାଯାଇଛି।