ନୂଆଦିଲ୍ଲୀ, ୧୬।୧୧(ପି.ଟି.)-
ଅଷ୍ଟ୍ରେଲିଆର କାନ୍ବେରାଠାରେ ତ୍ରିରାଷ୍ଟ୍ରୀୟ ଜୁନିୟର ମହିଳା ହକି ଟୁର୍ନାମେଣ୍ଟ ଡିସେମ୍ବର ୩ରୁ ୮ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିପାଇଁ ଶୁକ୍ରବାର ଘୋଷିତ ୧୮ ଜଣିଆ ଭାରତୀୟ ଦଳରେ ଓଡ଼ିଶାର ୨ ଖେଳାଳି ସ୍ଥାନ ପାଇଛନ୍ତି। ସେମାନେ ହେଲେ ମାରିଆନା କୁଜୁର ଓ ଆଜମିନା କୁଜୁର। ଆଗାମୀ ଟୁର୍ନାମେଣ୍ଟରେ ଭାରତ, ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ଅଂଶଗ୍ରହଣ କରିବେ। ଏଥିରେ ଭାରତ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ବିପକ୍ଷରେ ୨ଟି ଲେଖାଏ ଏହିପରି ୪ଟି ମ୍ୟାଚ ଖେଳିବ। ପ୍ରତିଯୋଗିତାର ପ୍ରଥମ ମ୍ୟାଚରେ ଅଷ୍ଟ୍ରେଲିଆ-ନ୍ୟୁଜିଲାଣ୍ଡ ମୁକାବିଲା ହେବାକୁ ଥିବାବେଳେ ଭାରତ ଏହାର ପ୍ରଥମ ମ୍ୟାଚ ଡିସେମ୍ବର ୪ରେ ନ୍ୟୁଜିଲାଣ୍ଡ ବିପକ୍ଷରେ ଖେଳିବ।
ଆଗାମୀ ତ୍ରିରାଷ୍ଟ୍ରୀୟ ପାଇଁ ସୁମନ ଦେବୀ ଥୌଡାମଙ୍କୁ ଭାରତୀୟ ଦଳର ଅଧିନାୟିକା ଓ ଈଶିକା ଚୌଧାରୀଙ୍କୁ ଉପଅଧିନାୟିକା ମନୋନୀତ କରାଯାଇଛି। ”ଚଳିତବର୍ଷ ପ୍ରାରମ୍ଭରେ ଆମେ ଆୟର୍ଲାଣ୍ଡ ଓ ବେଲାରୁଷ ବିପକ୍ଷରେ ମ୍ୟାଚ ଖେଳି ଅଭିଜ୍ଞତା ହାସଲ କରିଥିଲୁ। ଏଥର ଆମେ ଅଷ୍ଟ୍ରେଲିଆରେ ମଧ୍ୟ ଭଲ ପ୍ରଦର୍ଶନ ନେଇ ଆଶାବାଦୀ। ମନୋନୀତ ଖେଳାଳିଙ୍କୁ ଦେଖିଲେ ଉଭୟ ଡିଫେନ୍ସ ଓ ଫରଓ୍ବାର୍ଡ ବିଭାଗରେ ଆମ ପାଇଁ ପର୍ଯ୍ୟାପ୍ତ ବିକଳ୍ପ ରହିଛି। ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ବିପକ୍ଷରେ ଖେଳିଲେ ଆମ ଖେଳାଳିଙ୍କ ପ୍ରଦର୍ଶନ ନିଶ୍ଚିତ ଶାଣିତ ହେବ“ ବୋଲି କୋଚ୍ ବଲଜିତ ସିଂ ପ୍ରକାଶ କରିଛନ୍ତି।
ଭାରତୀୟ ଦଳ: ବିଚୁ ଦେବୀ କାରିବାମ୍, ରଶନପ୍ରୀତ କୌର, ସୁମନ ଦେବୀ ଥୌଡାମ (ଅଧିନାୟିକା), ଈଶିକା ଚୌଧାରୀ(ଉପଅଧିନାୟିକା), ପ୍ରିୟଙ୍କା, ମହିମା ଚୌଧାରୀ, ମାରିନା ଲାଲରାମଙ୍ଗାକି, ଗଗନଦୀପ କୌର, ପ୍ରଭଲିନ କୌର, ମାରିଆନା କୁଜୁର, ଚେତନା, ରୀତ, ବଲଜିତ କୌର, ଆଜମିନା କୁଜୁର, ବିଉଟି ଡୁଙ୍ଗଡୁଙ୍ଗ୍, ଶର୍ମିଳା ଦେବୀ, ଦୀପିକା, ଲାଲରିଣ୍ଡିକି।