କାନବେରା, ୫।୧୨(ପି.ଟି.)- ଏଠାରେ ଚାଲିଥିବା ତ୍ରିରାଷ୍ଟ୍ରୀୟ ହକି ଟୁର୍ନାମେଣ୍ଟରେ ଭାରତୀୟ ମହିଳା ଦଳ ବିଜୟରୁ ଅଭିଯାନ ଆରମ୍ଭ କରିଛି। ବୁଧବାର ଭାରତ ତା’ର ପ୍ରଥମ ମ୍ୟାଚ୍ରେ ନ୍ୟୁଜିଲାଣ୍ଡକୁ ୨-୦ ଗୋଲରେ ପରାସ୍ତ କରିଛି। ୧୫ତମ ମିନିଟ୍ରେ ଷ୍ଟ୍ରାଇକର ଲାଲରିଣ୍ଡିକି ଭାରତ ପାଇଁ ପ୍ରଥମ ଗୋଲ ସ୍କୋର କରିଥିଲେ। ସେହିପରି ୬୦ତମ ମିନିଟ୍ରେ ମିଡ୍ଫିଲ୍ଡର ପ୍ରଭଲିନ କୌର ୬୦ତମ ମିନିଟ୍ରେ ଦ୍ୱିତୀୟ ଗୋଲ ସ୍କୋର କରିଥିଲେ। ପୂରା ମ୍ୟାଚ୍ରେ ଭାରତ ପ୍ରଭାବ ବିସ୍ତାର କରି ଖେଳିଥିଲା।
ମ୍ୟାଚ ଆରମ୍ଭରୁ ଭାରତ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା। ନ୍ୟୁଜିଲାଣ୍ଡ ତା’ର ପ୍ରଥମ ମ୍ୟାଚ୍ରେ ଅଷ୍ଟ୍ରେଲିଆକୁ ୩-୧ ଗୋଲରେ ହରାଇଥିଲେ ମଧ୍ୟ ଭାରତଠାରୁ ହାରିଛି। ପ୍ରଥମ କ୍ୱାର୍ଟରରେ ଭାରତ ଆଧିପତ୍ୟ ବିସ୍ତାର କରି ଖେଳିଥିଲା। ଫଳରେ ତୃତୀୟ ମିନିଟ୍ର ପେନାଲ୍ଟି କର୍ନର ହାସଲ କରିଥିଲା। ତେବେ ଏହାକୁ ଗୋଲରେ ପରିଣତ କରିବାରେ ଭାରତ ବିଫଳ ହୋଇଥିଲା। ଏହାପରେ ନ୍ୟୁଜିଲାଣ୍ଡ ଡିଫେନ୍ସର ତ୍ରୁଟିରୁ ଫାଇଦା ଉଠାଇ ଲାଲରିଣ୍ଡିକି ଗୋଲ ଦେବାକୁ ସକ୍ଷମ ହୋଇଥିଲେ ଓ ଦଳକୁ ୧-୦ରେ ଅଗ୍ରଣୀ କରାଇଥିଲେ। ଦ୍ୱିତୀୟ କ୍ୱାର୍ଟରେ ନ୍ୟୁଜିଲାଣ୍ଡ ଏକ ପେନାଲ୍ଟି ସୁଯୋଗ ପାଇଥିଲା। ତେବେ ଭାରତୀୟ ଗୋଲ କିପର ବିଚୁ ଦେବୀ ଖରିବାମ ନ୍ୟୁଜିଲାଣ୍ଡର ପ୍ରୟାସକୁ ପଣ୍ଡ କରିଥିଲେ। ଏହାପରେ ଉଭୟ ଦଳ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲେ ମଧ୍ୟ ଗୋଲ ସୁଯୋଗ ସୃଷ୍ଟି କରିବାରେ ବିଫଳ ହୋଇଥିଲେ।
ତୃତୀୟ କ୍ୱାର୍ଟରରେ କିନ୍ତୁ ଦୁଇ ଦଳ ଏକାଧିକ ସୁଯୋଗ ସୃଷ୍ଟି କରିଥିଲେ। ଆରମ୍ଭରୁ ଭାରତ ଦୁଇଟି ପେନାଲ୍ଟ ସୁଯୋଗ ପାଇଥିଲା। ତେବେ ନ୍ୟୁଜିଲାଣ୍ଡ ଗୋଲ କିପର କେଲି କାରଲାଇନ୍ ଭାରତର ପ୍ରୟାସକୁ ବିଫଳ କରିଥିଲେ। ତୃତୀୟ କ୍ୱାର୍ଟର ଶେଷଆଡକୁ ନ୍ୟୁଜିଲାଣ୍ଡ ପେନାଲ୍ଟି ସୁଯୋଗ ପାଇଥିଲେ ମଧ୍ୟ ଭାରତୀୟ ଡିଫେନ୍ସକୁ ଭେଦ କରିପାରି ନ ଥିଲା। ଚତୁର୍ଥ କ୍ୱାର୍ଟରରେ ମଧ୍ୟ ସମାନ ଘଟଣା ଘଟିଥିଲା। ମ୍ୟାଚ୍ ଶେଷ ହେବାର ୧୫ ମିନିଟ ପୂର୍ବରୁ ନ୍ୟୁଜିଲାଣ୍ଡକୁ ଆଉ ଏକ ପେନାଲ୍ଟି ସୁଯୋଗ ମିଳିଥିଲା। ତେବେ ଭାରତୀୟ ଡିଫେନ୍ସ ଦୃଢ଼ ଖେଳ ପ୍ରଦର୍ଶନ କରିଥିଲା ଓ ଅଗ୍ରଣୀ ବଜାୟ ରଖିଥିଲା। ଶେଷ ୩୦ ସେକେଣ୍ଡରେ ଭାରତକୁ ଆଉ ଏକ ପେନାଲ୍ଟି କର୍ନର ମିଳିଥିଲା। ଏଥର କିନ୍ତୁ ପ୍ରଭଲିନ କୌଣସି ତ୍ରୁଟି ନ କରି ଗୋଲ ସ୍କୋର କରିଥିଲେ ଓ ଭାରତ ୨-୦ରେ ମ୍ୟାଚ୍ ହାତେଇ ନେଇଥିଲା। ଭାରତ ଦ୍ୱିତୀୟ ମ୍ୟାଚ୍ରେ ଗୁରୁବାର ଆୟୋଜକ ଅଷ୍ଟ୍ରେଲିଆକୁ ଭେଟିବ।