ପୁନେ, ୨୩।୬- ଲକ୍ ଡାଉନ୍ ସମୟରେ ପୁନେରେ ଚକିତ କଲା ଭଳି ଏକ ଘଟଣା ସାମ୍ନାକୁ ଆସିଛି। ପୁନେର ବାବୁ ଜନ୍ ନାମକ ଜଣେ ଶିଳ୍ପପତିଙ୍କ ନିକଟକୁ ମେ ମାସର ବିଦ୍ୟୁତ ବିଲ୍ ବାବଦକୁ ୮୦ କୋଟି ଟଙ୍କାର ବିଲ୍ ଆସିଥିଲା। ମହାରାଷ୍ଟ୍ର ବିଦ୍ୟୁତ ବିଭାଗ ପକ୍ଷରୁ ଆସିଥିବା ଏହି ବିଲ୍କୁ ଦେଖି ପ୍ରଥମେ ଜନ୍ଙ୍କୁ ଶକ୍ତ ଧକ୍କା ଲାଗିଥିଲା। କିନ୍ତୁ ସେ ଏନେଇ ବିଦ୍ୟୁତ ବିଭାଗ ନିକଟରେ ଅଭିଯୋଗ କରିଥିଲେ। ଏହି ଘଟଣା ସ୍ଥାନୀୟ ଗଣମାଧ୍ୟମରେ ପ୍ରକାଶ ପାଇବା ପରେ ବିଲ୍ରେ ତ୍ରୁଟି ରହିଥିବା ବିଦ୍ୟୁତ ବିଭାଗ ଜାଣିପାରିଥିଲା। ତ୍ରୁଟି ସଂଶୋଧନ ପରେ ଏହି ବିଲ୍ ୮୫ ହଜାର ଟଙ୍କା ହୋଇଥିବା ଜଣାପଡ଼ିଛି।
ପ୍ରକାଶ ଯେ ଜନ୍ଙ୍କର ଏକ ଛୋଟିଆ କମ୍ପାନୀ ରହିଛି। ଲକ୍ ଡାଉନ୍ ପୂର୍ବରୁ ଜନ୍ ମାସିକ ଲକ୍ଷେରୁ ଦେଢ଼ଲକ୍ଷ ଟଙ୍କା ପର୍ଯ୍ୟନ୍ତ ବିଦ୍ୟୁତ ବିଲ ପଇଠ କରିଥାନ୍ତି। କିନ୍ତୁ ମେ ମାସର ବିଲ୍ ଦେଖି ସେ ଚକିତ ହୋଇଯାଇଥିଲେ। ଏହି ବିଲ୍ରେ ୭୯ କୋଟି ୭ ଲକ୍ଷ ୬ ହଜାର ୧୯୦ ଟଙ୍କାର ରାଶି ଆସିଥିଲା। ତୁରନ୍ତ ଏହି ବିଲ୍ ନେଇ ସେ ମହାରାଷ୍ଟ୍ର ରାଜ୍ୟ ବିଦ୍ୟୁତ ବିତରଣ କମ୍ପାନୀ ନିକଟରେ ଅଭିଯୋଗ କରିଥିଲେ। ବିଦ୍ୟୁତ ବିଭାଗର ଜଣେ ଅଧିକାରୀଙ୍କ କହିବା ମୁତାବକ, ଗ୍ରାହକଙ୍କୁ ବିଲ୍ ଦେବା ପୂର୍ବରୁ ଭଲ ଭାବରେ ଚେକ୍ କରାଯାଇଥାଏ। କିନ୍ତୁ ଏହି ବିଲ୍ରେ କୌଣସି ତ୍ରୁଟି ରହିଯାଇଛି। ତ୍ରୁଟି ସୁଧାରିବା ପରେ ଜନ୍ଙ୍କ ବିଲ୍ ୮୫ ହଜାର ଟଙ୍କା ହୋଇଥିବା ଅଧିକାରୀ ଜଣଙ୍କ କହିଛନ୍ତି।