ପୁରୀ ଅଫିସ,୮।୫: ରଥ ନିର୍ମାଣ କାର୍ଯ୍ୟକୁ କିଭଳି ତ୍ୱରାନ୍ବିତ କରାଯିବ ସେନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରାଯାଉଛି। ବିଶେଷକରି ରଥ କାର୍ଯ୍ୟରେ ନିୟୋଜିତ ସେବାୟତମାନେ କିଭଳି ସୁରୁଖୁରୁରେ ରଥ ନିର୍ମାଣ କରିବେ ତା ଉପରେ ଗୁରୁତ୍ୱ ଦେଉଛି ପ୍ରଶାସନ। ଆବଦ୍ଧାଞ୍ଚଳ ମଧ୍ୟରେ ରଥ ନିର୍ମାଣ ହେବ। ଏଥିରେ ନିୟୋଜିତ ପ୍ରାୟ ୧୫୦ରୁ ଅଧିକ ମହାରଣା ଏବଂ ଭୋଇ ସେବକଙ୍କ ସ୍ବାସ୍ଥ୍ୟ ପରୀକ୍ଷା କରାଯିବ। ସମସ୍ତଙ୍କୁ ରଥକାର୍ଯ୍ୟ ଶେଷ ପର୍ଯ୍ୟନ୍ତ ଦୁଇଟି ଭକ୍ତ ନିବାସରେ ରଖାଯିବ। ସେଠାରେ ସେମାନଙ୍କ ଖାଦ୍ୟପେୟ ବ୍ୟବସ୍ଥା ମଧ୍ୟ ହେବ। ଭକ୍ତନିବାସରୁ ସେମାନଙ୍କୁ ବସ୍ ଯୋଗେ ରଥଖଳାରେ ପହଞ୍ଚାଯିବ। ଏସବୁ ପ୍ରସ୍ତାବ ରଥକାର୍ଯ୍ୟରେ ନିୟୋଜିତ ମହାରଣା, ଭୋଇ ସେବକମାନଙ୍କୁ ଶ୍ରୀମନ୍ଦିର ପ୍ରଶାସନ ଦେଇଛି ବୋଲି ମୁଖ୍ୟ ପ୍ରଶାସକ ଡ. କ୍ରିଷନ୍ କୁମାର ଶୁକ୍ରବାର ସୂଚନା ଦେଇଛନ୍ତି। ଏଥିସହ ଲକ୍ଡାଉନ୍ ଗାଇଡ୍ଲାଇନ୍କୁ ମାନି ଯେପରି ରଥ ନିର୍ମାଣ କରିବେ ସେନେଇ ସମସ୍ତଙ୍କୁ ସଚେତନ କରାଯିବ ବୋଲି ସେ ମଧ୍ୟ କହିଛନ୍ତି।