ବାଲେଶ୍ୱର ଅଫିସ,୨୩।୯-ବାଲେଶ୍ୱର ସହରକୁ ‘ବିୟୁଟି ସିଟି’ରେ ପରିଣତ କରିବା ପାଇଁ ଆରମ୍ଭ ହୋଇଥିବା ମିଶନ କିଛିଦିନ ସ୍ଥଗିତ ହେବା ପରେ ସୋମବାର ପୁଣି ତ୍ୱରାନ୍ବିତ କରାଯାଇଛି। ସହରର ସମସ୍ତ ଜବରଦଖଲ ଶେଷ ହେବା ପର୍ଯ୍ୟନ୍ତ ଏହି ପ୍ରକ୍ରିୟା ଜାରି ରହିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। ଟ୍ରାଫିକ୍ ଜାମ୍ରୁ ମୁକ୍ତ ଏବଂ ସୁନ୍ଦର କରିବା ଉଦ୍ଦେଶ୍ୟରେ ବିଭିନ୍ନ ସ୍ଥାନରେ କରାଯାଇଥିବା ଜବରଦଖଲ ଏବଂ ହୋଡିଂକୁ ଉଚ୍ଛେଦ କରାଯାଇଛି। ମାଜିଷ୍ଟ୍ରେଟ ଭାବେ ରେମୁଣା ତହସିଲଦାର ସଞ୍ଜୟ ରାଉତ ପହଞ୍ଚିଥିବା ବେଳେ ତାଙ୍କ ସହିତ ଏସ୍ଡ଼ିପିଓ ପ୍ରଭାସ ଚନ୍ଦ୍ର ପାଲ, ଶିଳ୍ପାଞ୍ଚଳ ଥାନା ଆଇଆଇସି ଜୟନ୍ତ ବେହେରା, ସହଦେବଖୁଣ୍ଟା ମଡ଼େଲ ଥାନା ଆଇଆଇସି ପରେଶ ରାଉତ, ସଦର ଥାନା ଆଇଆଇସି ମମତା ସାହୁଙ୍କ ସମେତ ୧ ପ୍ଲାଟୁନ ପୋଲିସ ଫୋର୍ସ ଉପସ୍ଥିତ ଥିଲେ। ଏହାସହିତ ବିବାଦୀୟ ଆଇଟିଆଇସ୍ଥିତ ଲକ୍ଷ୍ମୀନାରାୟଣ ମନ୍ଦିର ଭାଙ୍ଗିବାକୁ ନେଇ କିଛି ସମୟ ଉତ୍ତେଜନା ସୃଷ୍ଟି ହୋଇଥିଲା। ସ୍ଥାନୀୟ ଲୋକମାନେ ତହସିଲଦାରଙ୍କୁ ଭାଙ୍ଗିବାର ସରକାରୀ ନିର୍ଦ୍ଦେଶନାମା ମାଗିଥିଲେ ମଧ୍ୟ ଏହାକୁ ଭ୍ରୁକ୍ଷେପ ନ କରି ପ୍ରଶାସନ ଉଚ୍ଛେଦ କାର୍ଯ୍ୟ କରିଥିଲା। ରାସ୍ତା ଓ ଡ୍ରେନ୍ ପାଇଁ ଆବଶ୍ୟକ ଥିବା ଜବରଦଖଲକୁ ବାହାର କରିବା ପାଇଁ ମନ୍ଦିରର ନାଟମଣ୍ଡପ ପର୍ଯ୍ୟନ୍ତ ଭଙ୍ଗାଯିବା ଲାଗି ସ୍ଥିର ହୋଇଛି। ପାର୍ଶ୍ୱ ମନ୍ଦିର ଭଙ୍ଗାଯାଇଛି। ପରବର୍ତ୍ତୀ ପର୍ଯ୍ୟାୟରେ ସମସ୍ତ କାର୍ଯ୍ୟ ସମ୍ପାଦନ ହେବ ବୋଲି ପ୍ରଶାସନ ପକ୍ଷରୁ କୁହାଯାଇଛି।
