ବାଲେଶ୍ୱର ଅଫିସ,୨୪।୨- ବାଲେଶ୍ୱର ସହର ଫାଣ୍ଡିଛକସ୍ଥିତ ଓଭରବ୍ରିଜ୍ ତଳେ ଦୋକାନ କରିଥିବା ବ୍ୟବସାୟୀମାନଙ୍କୁ ୧୫ଦିନ ମଧ୍ୟରେ ଉଚ୍ଛେଦ ପାଇଁ ବ୍ରିଟ୍ ପକ୍ଷରୁ ନୋଟିସ୍ ଦିଆଯାଇଛି। ଏହାର ପ୍ରତିବାଦରେ ବ୍ୟବସାୟୀ ସଂଘ ପକ୍ଷରୁ ଶନିବାର ସନ୍ଧ୍ୟାରେ ମିଳିତ ବୈଠକ କରି ଥଇଥାନ ପରେ ଉଚ୍ଛେଦ ପାଇଁ ଦାବି କରିଛନ୍ତି। ଦୀର୍ଘ ୩୫ବର୍ଷ ତଳେ ବ୍ରିଟ୍ ପକ୍ଷରୁ ୨ଶହରୁ ଅଧିକ ଦୋକାନଗୃହ ନିର୍ମାଣ କରାଯାଇ ଭଡ଼ା ସୂତ୍ରରେ ବିଭିନ୍ନବର୍ଗର ଲୋକମାନଙ୍କୁ ଦିଆଯାଇଥିଲା। ତେବେ ଓଭରବ୍ରିଜ୍ର ମରାମତି ନାମରେ ହଠାତ୍ ଦୋକାନୀମାନଙ୍କୁ ୧୫ଦିନ ମଧ୍ୟରେ ଦୋକାନ ଖାଲି କରିବା ପାଇଁ ବ୍ରିଟ୍ ପକ୍ଷରୁ ନୋଟିସ୍ ଜାରି କରାଯାଇଛି। ସେଠାରେ ଦୋକାନ କରୁଥିବା ବ୍ୟବସାୟୀମାନେ ଦୋକାନ ଉପରେ ନିର୍ଭର କରି ପରିବାର ପ୍ରତିପୋଷଣ କରୁଥିବାବେଳେ ସେମାନଙ୍କୁ ବ୍ରିଟ୍ ପକ୍ଷରୁ କୌଣସି ପ୍ରକାର ଥଇଥାନ କରାଯିବା କୁହା ନ ଯାଇ ରାତାରାତି ଦୋକାନ ଖାଲି କରିବା ପାଇଁ ନୋଟିସ୍ ଦେବା ଘଟଣାର ପ୍ରତିବାଦ କରାଯାଇଛି।
ବ୍ୟବସାୟୀ ସଂଘର ସାଧାରଣ ସମ୍ପାଦକ ରଞ୍ଜନ ବାଗ ଏହି ସଭାରେ ଅଧ୍ୟକ୍ଷତା କରି ସମସ୍ତ ବ୍ୟବସାୟୀମାନଙ୍କୁ ଏକଜୁଟ୍ ହେବା ପାଇଁ ଆହ୍ବାନ ଦେଇଥିଲେ। ସ୍ଥାନୀୟ ଜନପ୍ରତିନିଧି ଏବଂ ରାଜନେତାମାନେ ଏହି ଗରିବ ଦୋକାନୀମାନଙ୍କ ଥଇଥାନ ପ୍ରତି ଦୃଷ୍ଟି ଦେବାକୁ ସେ ଅନୁରୋଧ କରିଥିଲେ। ସଂଘର ସଭାପତି ଅଜୟ କୁମାର ବିଶ୍ୱାଳ କାର୍ଯ୍ୟକ୍ରମରେ ଯୋଗଦେଇ ବ୍ରିଟ୍ ତରଫରୁ ଦୋକାନୀମାନଙ୍କ ପ୍ରତି ଦିଆଯାଇଥିବା ନୋଟିସ୍କୁ ସମ୍ପୂର୍ଣ୍ଣ ଅଗଣତାନ୍ତ୍ରିକ ବୋଲି କହିଥିଲେ। ବ୍ରିଜ୍ ତଳେ ଥିବା ଦୋକାନ ଦ୍ୱାରା ପ୍ରତ୍ୟେକ୍ଷ ଓ ପରୋକ୍ଷ ଭାବରେ ହଜାର ହଜାର ଲୋକ ପ୍ରତିପୋଷିତ ହେଉଥିବାବେଳେ ସେମାନଙ୍କ ସ୍ବାର୍ଥକୁ ବ୍ରିଟ୍ କର୍ତ୍ତୃପକ୍ଷ ଅଣଦେଖା କରିବା ଚଳିବ ନାହଁି ବୋଲି ସେ କହିବା ସଙ୍ଗେ ସଙ୍ଗେ ବ୍ୟବସାୟୀମାନେ ଐକ୍ୟବଦ୍ଧ ହୋଇ ଏହାର ମୁକାବିଲା କରିବା ଆବଶ୍ୟକ ବୋଲି କହିଥିଲେ। ପ୍ରାକ୍ତନ କାଉନ୍ସିଲର ଶମ୍ଭୁ ସିଂ, ବ୍ୟବସାୟୀ ସଂଘର ନେତା ରାଜେନ୍ଦ୍ର ଚାଟାର୍ଜୀ, କିଶୋର ଚନ୍ଦ୍ର ମହାପାତ୍ର, ସୋମନାଥ ପ୍ରସାଦ ଦାସ ଏବଂ ସମାଜସେବୀ ମଧୁସୂଦନ ଷଡ଼ଙ୍ଗୀ ପ୍ରମୁଖ ଉଦ୍ବୋଧନ ଦେଇ ଦୋକାନୀମାନଙ୍କ ସହିତ ସେ ଯେକୌଣସି ପରିସ୍ଥିତିରେ ରହିବେ ଏବଂ ସମସ୍ତ ପ୍ରକାର ସହଯୋଗ କରିବେ ବୋଲି ପ୍ରତିଶ୍ରୁତି ଦେଇଥିଲେ। ସଭାକାର୍ଯ୍ୟ ଶେଷରେ ଦୋକାନୀମାନଙ୍କୁ ନେଇ ଏକ କାର୍ଯ୍ୟକାରୀ କମିଟି ଗଠନ କରାଯାଇଥିଲା। ବୈଠକରେ ୫ଶହରୁ ଊର୍ଦ୍ଧ୍ୱ ଦୋକାନୀ ଓ ତାଙ୍କ ପରିବାର ଲୋକେ ଯୋଗଦେଇଥିଲେ।