ଭଦ୍ରକ ଅଫିସ, ୪।୭ – ଭଦ୍ରକ ସହରରୁ ଜବରଦଖଲ ଉଚ୍ଛେଦ ପରେ ରୋଜଗାର ହରାଇଥିବା ଦୋକାନୀମାନଙ୍କୁ ଥଇଥାନ ଦାବିରେ ସିପିଆଇ(ଏମ୍)ର ଜିଲା କମିଟି ବୁଧବାର ଜିଲାପାଳଙ୍କୁ ଭେଟିଥିଲା। କମିଟି ନେତୃତ୍ୱରେ ଶତାଧିକ ବ୍ୟବସାୟୀ ଏକତ୍ର ହୋଇ ଶୋଭାଯାତ୍ରାରେ ଯାଇ ଜିଲାପାଳ ଜ୍ଞାନରଞ୍ଜନ ଦାସଙ୍କୁ ଭେଟି ସେମାନଙ୍କୁ ତୁରନ୍ତ ଥଇଥାନ କରାଯିବାକୁ ଦାବି ଜଣାଇଥିଲେ। ଜିଲାପାଳ ଦାସ ସେମାନଙ୍କ ସହ ଆଲୋଚନା କରିଥିଲେ। ସର୍ବଦଳୀୟ ତଥା ବ୍ୟବସାୟୀ ସଂଘ ପ୍ରତିନିଧିଙ୍କ ସହ ବୈଠକ କରି ଆଲୋଚନା ପରେ ସେମାନଙ୍କୁ ଥଇଥାନ କରାଯିବ ବୋଲି ଜିଲାପାଳ ପ୍ରତିଶ୍ରୁତି ଦେଇଛନ୍ତି। ସହରକୁ ସରସ, ସୁନ୍ଦର କରିବା ପାଇଁ ରାସ୍ତା ପ୍ରଶସ୍ତିକରଣ ଏବଂ ଡ୍ରେନେଜ ପୁନଃ ନିର୍ମାଣ ସକାଶେ ସରକାରୀ ଜାଗାରେ ଥିବା ଦୋକାନ ଜବରଦଖଲମୁକ୍ତ ନିଶ୍ଚୟ କରାଯିବ ବୋଲି ଜିଲାପାଳ କହିଥିଲେ। ବ୍ୟବସାୟୀମାନେ ମଧ୍ୟ ଏହାକୁ ସମର୍ଥନ କରିଥିଲେ। ବ୍ୟବସାୟୀଙ୍କ ପ୍ରସ୍ତାବ ମୁତାବକ ପୁରୁଣା ବସ୍ଷ୍ଟାଣ୍ଡ, ବନ୍ତ ଛକରେ ଥିବା ମତ୍ସ୍ୟ ବିଭାଗ କାର୍ଯ୍ୟାଳୟ ନିକଟ, ଉପଜିଲାପାଳଙ୍କ ବାସସ୍ଥାନରେ ଥିବା ଖାଲି ଜାଗା ଏବଂ ବାଲଗୋପାଳ ମନ୍ଦିର ପଛପାଖ ଜାଗାରେ ମାର୍କେଟ୍ କମ୍ପ୍ଲେକ୍ସ ନିର୍ମାଣ କରି ବିସ୍ଥାପିତଙ୍କୁ ଥଇଥାନ କରାଯିବା ନେଇ ଏକ ସ୍ମାରକପତ୍ର ଜିଲାପାଳଙ୍କୁ ପ୍ରଦାନ କରାଯାଇଛି। କମିଟିର ଜିଲା ସମ୍ପାଦକ ଦିବ୍ୟସିଂହ ନାୟକ, ଆଞ୍ଚଳିକ କମିଟି ସମ୍ପାଦକ ରାଧା ଦାସ, ପ୍ରଫୁଲ୍ଲ ପାଢ଼ୀ, ଚନ୍ଦ୍ରଶେଖର ନାୟକ ଓ ବିନୋଦ ସାହୁ ପ୍ରମୁଖ ନେତୃତ୍ୱ ନେଇଥିଲେ।