ବଇଣ୍ଡା, ୫ା୭(ଡି.ଏନ.ଏ.)-ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ ଥାନା ଠାକୁରଗଡ ଗ୍ରାମର ଜଣେ ଯୁବକଙ୍କୁ ଥାନା ସେକେଣ୍ଡ ଅଫିସର ଶଶିଭୂଷଣ ବେହେରା ଘରୁ ଉଠାଇ ଆଣି ମାଡ଼ ମାରିଥିବା ଅଭିଯୋଗ ହୋଇଛି। ଏହାକୁ କେନ୍ଦ୍ର କରି ଗ୍ରାମରେ ତୀବ୍ର ଉତ୍ତେଜନା ଦେଖାଦେଇଛି। ଉତ୍ତ୍ୟକ୍ତ ଗ୍ରାମବାସୀ ତୁରନ୍ତ ସେକେଣ୍ଡ ଅଫିସରଙ୍କୁ ନିଲମ୍ବନ ଓ ସେଠାରୁ ବଦଳି ଦାବିରେ ଥାନା ଘେରାଉ କରିବା ସହ ବଇଣ୍ଡା-ଆଠମଲ୍ଲିକ ପୂର୍ତ୍ତ ବିଭାଗ ରାସ୍ତା ଅବରୋଧ କରିଥିଲେ। ପୋଲିସ ପ୍ରଶାସନ ପକ୍ଷରୁ ଘଟଣାର ତଦନ୍ତ ନିର୍ଦ୍ଦେଶ ଦିଆଯିବା ପରେ ରାସ୍ତାରୋକୋ ହଟିଥିଲା।
ମାଡ଼ ଖାଇଥିବା ଯୁବକ ଦୀପକ ସେଠୀ(୨୦)ଙ୍କ ଅଭିଯୋଗ ମୁତାବକ, ସେ ବେସରକାରୀ ଭାବେ ବିଦ୍ୟୁତ୍ ମରାମତି କରନ୍ତି। ବୁଧବାର ଠାକୁରଗଡ ଥାନାକୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହୋଇଯାଇଥିଲା। ସେକେଣ୍ଡ ଅଫିସର ବେହେରା ଦୀପକଙ୍କୁ ଫୋନ କରି ଥାନା ଲାଇନ ମରାମତି କରିବାକୁ ଡାକିଥିଲେ। ବିଦ୍ୟୁତ୍ ସବ୍ ଷ୍ଟେଶନରୁ ବିଦ୍ୟୁତ୍ ସଂଯୋଗ କାଟିଲେ ଖୁଣ୍ଟରେ ଚଢି କାମ କରିହେବ ବୋଲି ଦୀପକ କହିଥିଲେ। ଏଥିସହ ସେତେବେଳେ ବର୍ଷା ମଧ୍ୟ ହେଉଥିବାରୁ ସେ ଥାନାକୁ ଆସି ନ ଥିଲେ। ହେଲେ ଗୁରୁବାର ସକାଳେ ଶଶିଭୂଷଣ ୪ ଜଣ ହୋମଗାର୍ଡଙ୍କୁ ସାଙ୍ଗରେ ନେଇ ଦୀପକଙ୍କୁ ଜବରଦସ୍ତ ଥାନାକୁ ଉଠାଇ ଆଣି ମାଡ଼ ମାରିବାରୁ ଦୀପକ ଅଚେତ ହୋଇପଡିଥିଲେ। ପରେ ତାଙ୍କୁ ପୋଲିସ ଘରେ ଛାଡି ଦେଇଥିଲା। ପରିବାର ଓ ଗ୍ରାମବାସୀ ଏ ସମ୍ପର୍କରେ ଜାଣିବା ପରେ ତୀବ୍ର ଅସନ୍ତୋଷ ଦେଖାଦେଇଥିଲା। ପୂର୍ବାହ୍ନ ୯ଟାରୁ ୧୧ଟା ପର୍ଯ୍ୟନ୍ତ ଲୋକେ ଥାନା ଘେରାଉ ସହ ପୂର୍ତ୍ତ ବିଭାଗ ରାସ୍ତା ଅବରୋଧ କରିଥିଲେ। ଖବରପାଇ ଆଠମଲ୍ଲିକ ଏସ୍ଡିପିଓ ଶେଖ ଅବଦୁଲ କରିମ ପହଞ୍ଚିଥିଲେ। ସମ୍ପୃକ୍ତ ପୋଲିସ ଅଧିକାରୀଙ୍କୁ ନିଲମ୍ବନ କରିବାକୁ ଗ୍ରାମବାସୀ ଦାବି କରିବାରୁ ଏସ୍ଡିପିଓ ଘଟଣାର ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ଏହାପରେ ରାସ୍ତାରୋକୋ ପ୍ରତ୍ୟାହୃତ ହୋଇଥିଲା।
ଅଭିଯୋଗ ସମ୍ପର୍କରେ ଥାନା ସେକେଣ୍ଡ ଅଫିସର ବେହେରା କହିଛନ୍ତି, ଦୀପକ ମଦ୍ୟପାନ କରି ଗଣ୍ଡଗୋଳ କରିଥିବା ଯୋଗୁ ମାଡ ମରାଯାଇଥିଲା। ଏସ୍ଡିପିଓ କରିମ କହିଛନ୍ତି, ଦୀପକଙ୍କୁ ଶଶିଭୂଷଣ ମାଡ଼ ମାରିଥିବା ଅଭିଯୋଗ ହୋଇଛି। ଘଟଣାର ତଦନ୍ତ କରାଯାଇ ଏସ୍ପିଙ୍କୁ ରିପୋର୍ଟ ଦିଆଯିବ। ଅନୁଗୋଳ ଏସ୍ପି ମିତ୍ରଭାନୁ ମହାପାତ୍ର କହିଛନ୍ତି, ଦୀପକଙ୍କୁ ମାଡ଼ ମରାଯିବା ଘଟଣାର ତଦନ୍ତ ପାଇଁ ଏସ୍ଡିପିଓଙ୍କୁ ନିର୍ଦ୍ଦେଶ ଦିଆଯାଇଛି। ରିପୋର୍ଟ ଆସିବା